ଖଇରା, ୯।୩-କଳା, ସଂସ୍କୃତି, ଆଧ୍ୟାତ୍ମିକତା ଓ ଐତିହ୍ୟର ପ୍ରତୀକ ଭାବେ ବାଲେଶ୍ୱର ଜିଲାର ପତିରାଜପୁର ମେଳା ପ୍ରସିଦ୍ଧ। ସୋମବାର ରାତିରୁ ମେଳା ପଡିଆରେ ଦୋଳମେଳନ ଆରମ୍ଭ ହେଉଥିବାରୁ ସମଗ୍ର ଖଇରା ଅଞ୍ଚଳ ଚଳଚଞ୍ଚଳ ହୋଇଉଠିଛି। ସୁସଜ୍ଜିତ ଆଲୋକ ସାଜସଜ୍ଜା, ଠାକୁରଙ୍କ ବିମାନ ପାଇଁ ଆସ୍ଥାନ, ସାଂସ୍କୃତିକ ମଞ୍ଚ ଓ ୭ଶହରୁ ଅଧିକ ଉଠାଦୋକାନୀଙ୍କ ପସରା ମେଳାକୁ ଅଧିକ ଆକର୍ଷଣୀୟ କରିଛି। ଏଥର ୮୦ରୁ ଊର୍ଦ୍ଧ୍ୱ ରାଧାକୃଷ୍ଣଙ୍କ ବିମାନ ଦୋଳମଣ୍ଡପରେ ଶୋଭାପାଇବ। ୮ଦିନ ଧରି ଆୟୋଜିତ ହୋଇଥିବା ମେଳାରେ ଅନ୍ୟ ବର୍ଷ ଭଳି ଏଥର ଲକ୍ଷାଧିକ ଦେଖଣାହାରିଙ୍କ ସମାବେଶକୁ ଦୃଷ୍ଟିରେ ରଖି ମେଳା କମିଟି ଓ ପ୍ରଶାସନ ପକ୍ଷରୁ ବ୍ୟାପକ ଆୟୋଜନ କରାଯାଇଛି। ୧ ପ୍ଲାଟୁନ ପୋଲିସ ଫୋର୍ସ ସହିତ ଅଗ୍ନିଶମ କର୍ମଚାରୀ ଓ ଦର୍ଶକଙ୍କୁ ସେବା ଯୋଗାଇବା ଲାଗି ବହୁ ସ୍ବେଚ୍ଛାସେବୀ ମୁତୟନ ବ୍ୟବସ୍ଥା କରାଯାଇଛି।
ସୁସଜ୍ଜିତ ବିମାନରେ ଠାକୁରଙ୍କୁ ଆକର୍ଷଣୀୟ ଶୋଭାଯାତ୍ରାରେ ଦୋଳ ପଡିଆ ଆସ୍ଥାନକୁ ଅଣାଯିବା ବେଳେ ସମଗ୍ର ଅଞ୍ଚଳ ଝଲସି ଉଠିଥାଏ। ଶଙ୍ଖ, ହୁଳହୁଳି, ଖୋଳ କରତାଳରେ ପୂରି ଉଠେ ପରିବେଶ। ଜନମାନସରୁ ହଜିଯାଉଥିବା ପାରମ୍ପରିକ ପ୍ରାଚୀନ ଲୋକକଳା ପ୍ରଦର୍ଶନ ଶୋଭାଯାତ୍ରାର ଗୁରୁତ୍ୱ ବଢାଇଥାଏ। ଗତ କିଛିବର୍ଷ ଭଳି ଚଳିତବର୍ଷ ମେଳା ପରିସରରେ ପୂର୍ଣ୍ଣମୀ ଦିନ ଡିଜେ ବାଦ୍ୟ ଓ ବାଣକୁ ସମ୍ପୂର୍ଣ୍ଣ ରୂପେ ନିଷିଦ୍ଧ କରାଯାଇଛି ା ମେଳା ପଡିଆରେ ଚାନ୍ଦିନୀର ପୁନରୁଦ୍ଧାର ଓ ଆଲୋକ ବ୍ୟବସ୍ଥା ପର୍ଯ୍ୟଟନ ଓ ସଂସ୍କୃତି ମନ୍ତ୍ରୀ ଜ୍ୟୋତି ପ୍ରକାଶ ପାଣିଗ୍ରାହୀଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଉଦ୍ଘାଟିତ ହୋଇଯାଇଛି। ପାଣି ସମସ୍ୟାର ସମାଧାନ ପାଇଁ ପାନୀୟ ଜଳ ପ୍ରକଳ୍ପ କାର୍ଯ୍ୟକ୍ଷମ କରାଯାଇଛି।
ବାଲେଶ୍ୱର, ଭଦ୍ରକ, କେନ୍ଦୁଝର ଓ ମୟୂରଭଞ୍ଜ ଜିଲାରୁ ଅଗଣିତ ଶ୍ରଦ୍ଧାଳୁ ପ୍ରତିବର୍ଷ ଏହି ମେଳା ଦେଖିବାକୁ ଆସିଥାନ୍ତି। ଦେଶବିଦେଶରେ ରହୁଥିବା ଖଇରା ଅଞ୍ଚଳର ଲୋକେ ପର୍ବ ପାଇଁ ଘରକୁ ଫେରିଆସିଥାନ୍ତି। ୮ ଦିନର ମହୋତ୍ସବ ଶେଷ ହେବା ସତ୍ତ୍ୱେ ଓଡିଶାର କୋଣ ଅନୁକୋଣରୁ ଆସିଥିବା ଅନେକ ଛୋଟବଡ ବ୍ୟବସାୟୀ ମେଳା ପଡିଆରେ ପ୍ରାୟ ୧ ମାସ ଧରି ରହିଥାନ୍ତି। ହେଲେ କ୍ରମାଗତ ବର୍ଷା ଲାଗି ରହିବା ବ୍ୟବସାୟୀଙ୍କ ଚିନ୍ତା ବଢାଇଛି। ମେଳା କମିଟି ସଭାପତି ପୀତାମ୍ବର ପଟ୍ଟନାୟକ କହିଛନ୍ତି ଯେ, ଶାନ୍ତିଶୃଙ୍ଖଳାରେ କାର୍ଯ୍ୟକ୍ରମ ପରିଚାଳନା ପାଇଁ ପଦକ୍ଷେପ ଗ୍ରହଣ କରାଯାଇଛି। ଶ୍ରଦ୍ଧାଳୁଙ୍କୁ ସ୍ବାସ୍ଥ୍ୟସେବା ଯୋଗାଇବା ପାଇଁ ଖଇରା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରୁ ଆସୁଥିବା ଟିମ୍ ଏଠାରେ ଅଧିକ ଦିନ କ୍ୟାମ୍ପ କରିବା ପାଇଁ ବ୍ୟବସ୍ଥା କରାଯାଇଛି। ସାଧାରଣ ସମ୍ପାଦକ ଭରତ ଚନ୍ଦ୍ର ରାଉତ ଯୋଗାଣ ବିଭାଗ ପକ୍ଷରୁ ପୂର୍ବଭଳି ଉଠାଦୋକାନୀଙ୍କୁ କିରୋସିନ ଯୋଗାଇ ଦେବାକୁ ଦାବି କରିଛନ୍ତି। ମେଳା ପରିସରରେ କେହି ନିଶାଦ୍ରବ୍ୟ ବିକ୍ରି କଲେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଥାନା ଅଧିକାରୀ ସୁବ୍ରତ ବେହେରା କହିଥିବା ବେଳେ ମେଳା ପରିସରକୁ ସ୍ବଚ୍ଛ ଓ ଆବର୍ଜନାମୁକ୍ତ ରଖିବାକୁ କମିଟି ସମ୍ପାଦକ ଗୌରାଙ୍ଗ ପାଣି ବ୍ୟବସାୟୀ ଓ ଆସୁଥିବା ଦର୍ଶକଙ୍କୁ ନିବେଦନ କରିଛନ୍ତି ା
