ଭୁବନ, ୨୭।୩(ଡି.ଏନ.ଏ.):କରୋନା ମହାମାରୀ ଆତଙ୍କରେ ବିଶ୍ୱ ଥରହର। ଗଡୁଛି ହଜାର ହଜାର ମୁଣ୍ଡ। ଆକ୍ରାନ୍ତଙ୍କ ସଂଖ୍ୟା କଳିବା ଅସମ୍ଭବ। କେତେବେଳେ ଆଉ କେମିତି ଏହି ମାରାତ୍ମକ ଭାଇରସ୍ କାହାକୁ ଗ୍ରାସିବ ତାହାର ଜଣାପଡୁନାହିଁ। ଏକ ଅନିଶ୍ଚିତ ଭବିଷ୍ୟତ ଆଡ଼କୁ ସାରା ବିଶ୍ୱ ବଢୁଥିବାବେଳେ ସବୁଠାରୁ ବେଶି ପ୍ରଭାବିତ ହେଉଛନ୍ତି ଗରିବ, ଖଟିଖିଆ ଏବଂ କ୍ଷୁଦ୍ର ବ୍ୟବସାୟୀ ଗୋଷ୍ଠୀ। କହିବାକୁ ଗଲେ କରୋନା ସମସ୍ତଙ୍କ ମୁହଁରୁ ହସ ଛଡ଼ାଇ ନେଇଛି। ଏବେ କେବଳ ଗୋଟିଏ ଚିନ୍ତା ଦିନକୁ ଦି ଓଳି ଦାନା ଯୋଗାଡ଼ ହେବ କିପରି।
ବିମୁଦ୍ରୀକରଣ ପରେ ବୁଡ଼ିଯାଇଥିଲା ବେପାର। ଅଣ୍ଟା ସଳଖି ଛିଡ଼ା ହେବା ବେଳକୁ ଏବେ କରୋନା ମାଡ଼। ଖଟିଲେ ଖାଇବା ଲୋକ। ହାତ ବନ୍ଦ ତ ଭାତ ବି ବନ୍ଦ। ଲକ୍ଡାଉନ ପାଇଁ ଦୋକାନ ବଜାର ଖୋଲୁନାହିଁ। କାମ ବି ନାହିଁ। କେତେବେଳେ ସବୁ ପୁଣି ଠିକ୍ ହବ ତାହା କହିବା ମୁସ୍କିଲ। ହସ ହସ ମୁହଁରେ ଘରକୁ ଫେରିବି ତାହା ଭାବିବା ବେଳକୁ ଆଖିରେ ଲୁହ ଆସିଯାଉଛି ବୋଲି କହିଛନ୍ତି ଢେଙ୍କାନାଳ ଜିଲା ଭୁବନର କଂସା କାରିଗର ଛାୟାକାନ୍ତ ସାହୁ। କରୋନା ପାଇଁ ଏବେ ଭୁବନର ପ୍ରସିଦ୍ଧ କଂସା କାରିଗରି କାମ ଉପରେ ପଡ଼ିଛି ଚଡ଼କ। ପ୍ରଶାସନିକ କଟକଣା ଯୋଗୁ ଶାଳ ବନ୍ଦ ହୋଇଯାଇଛି। ତେଣୁ ଛାୟାକାନ୍ତଙ୍କ ପରି ଅନେକେ ହାତ ବାନ୍ଧି ବସିଛନ୍ତି।
ସମାନ କଥା ଦୋହରାଇଛନ୍ତି ପରିବା ବ୍ୟବସାୟୀ ହେମନ୍ତ ସାହୁ ଏବଂ ରବୀନ୍ଦ୍ର ସ୍ବାଇଁ। ମନ୍ଦାର ଗ୍ରାମରୁ ପରିବା ଆଣି ଭୁବନ ଅଞ୍ଚଳରେ ବ୍ୟବସାୟ କରନ୍ତି ରବୀନ୍ଦ୍ର। ଦୀର୍ଘ ୨୫ ବର୍ଷ ହେଲା ପରିବା ବେପାର ତାଙ୍କ ଜୀବିକା ପାଲଟିଛି। ଲକ୍ଡାଉନ୍ ଘୋଷଣା ହେବା ପରେ ଭୟଆତଙ୍କର ବାତାବରଣ ସୃଷ୍ଟି ହୋଇଛି। ଲୋକମାନେ ଭୟଭୀତ ହୋଇ ବାହାରକୁ ଆସୁନାହାନ୍ତି। ଜମିରେ ଫସଲ ନଷ୍ଟ ହେଉଥିବାବେଳେ ବେପାର ବି ସେତେଟା ଭଲ ହେଉନାହିଁ। ଗଁା ଗଁା ବୁଲି ପରିବା ବିକିବାକୁ ପଡୁଛି। ଘରକୁ ପହଞ୍ଚତ୍ବା ବେଳକୁ ଖାଇବା ଖର୍ଚ୍ଚ ବି ଉଠୁନି। ମୁଣ୍ଡ ଉପରେ କରଜ ବଢୁଛି। ଏମିତି ଆଉ ସପ୍ତାହେ ଲାଗି ରହିଲେ ଦାନା ବି ମିଳିବନି ବୋଲି କହିଛନ୍ତି ରବୀନ୍ଦ୍ର। ହେମନ୍ତ କହିଛନ୍ତି, ଲୋକ ଆସୁନାହାନ୍ତି। ବିକିବାକୁ ଆଣିଥିବା ପରିବା ଘରକୁ ଫେରାଇ ନେବାକୁ ପଡୁଛି। ଏମିତି ବ୍ୟବସାୟ କରିବା ଅପେକ୍ଷା ଆଉ ନ ଆସିବାକୁ ଚିନ୍ତା କରୁଛି। କେବଳ କଂସା କାରିଗର କି ପରିବା ବ୍ୟବସାୟୀ ନୁହନ୍ତି ଅଞ୍ଚଳର ସମସ୍ତ କ୍ଷୁଦ୍ର ବ୍ୟବସାୟୀଙ୍କୁ ଏବେ ଘାରିଛି ପେଟପାଟଣା ଚିନ୍ତା। କରୋନା ପାଇଁ ଆରମ୍ଭ ହୋଇଥିବା ଜୀବନ ଯୁଦ୍ଧରେ ଲଢ଼େଇରେ କେଉଁଠି ନା କେଉଁଠି ପ୍ରଭାବିତ ହୋଇଛି ଜୀବିକା, ଯାହା ଏବେ ଛାୟାକାନ୍ତ, ହେମନ୍ତ ଏବଂ ରବୀନ୍ଦ୍ରଙ୍କ ପରି ଅଞ୍ଚଳର ହଜାର ହଜାର ବ୍ୟବସାୟୀଙ୍କ ଆଖିରୁ ନିଦ ହଜାଇ ଦେଇଛି।
ଭୁବନରେ ଦୈନିକ ପରିବା ମାର୍କେଟକୁ ଯାଜପୁର ସମେତ ଢେଙ୍କାନାଳ ଜିଲାର ବିଭିନ୍ନ ସ୍ଥାନରୁ ବ୍ୟବସାୟୀମାନେ ପରିବା ବିକ୍ରି କରିବାକୁ ଆସିଥାନ୍ତି। କଟକଣା ପାଇଁ ବ୍ୟବସାୟ ଘାଟା ଆଶଙ୍କାରେ ହାତଗଣିତ ବ୍ୟବସାୟୀ ଆସୁଛନ୍ତି। ସେହିପରି ସକାଳୁ ଏବଂ ଅପରାହ୍ନରେ ଦୁଇ ପର୍ଯ୍ୟାୟରେ ତେଜରାତି, ମାଛ, ମାଂସ, ଅଣ୍ଡା ଓ ପରିବା ଦୋକାନ ଖୋଲା ରହୁଛି। ସମୟ କଟକଣା ଯୋଗୁ ବ୍ୟବସାୟରେ ମାନ୍ଦା ଉପୁଜିଥିବା ବ୍ୟବସାୟୀମାନେ କହିଛନ୍ତି।
