ବ୍ରହ୍ମପୁର ଅଫିସ,୧୭ା୯-ଓଡ଼ିଶା ଆଦର୍ଶ ବିଦ୍ୟାଳୟ ଚତୁର୍ଥ ଶ୍ରେଣୀ କର୍ମଚାରୀ ୟୁନିୟନ ଗଞ୍ଜାମ ଜିଲା ଶାଖା ପକ୍ଷରୁ ସୋମବାର ବ୍ରହ୍ମପୁରସ୍ଥ ଜିଲା ଶ୍ରମ ଅଧିକାରୀଙ୍କ କାର୍ଯ୍ୟାଳୟ ଆଗରେ ବିକ୍ଷୋଭ ସମାବେଶ କରାଯାଇଥିଲା। କାର୍ଯ୍ୟରତ ଆଉଟସୋର୍ସିଂ କର୍ମଚାରୀଙ୍କ ମୌଳିକ ସମସ୍ୟା ସମାଧାନ ଏବଂ ସରକାର ଧାର୍ଯ୍ୟ କରିଥିବା ସର୍ବନିମ୍ନ ମଜୁରି ପ୍ରଦାନ ସମେତ ୧୦ ଦଫା ଦାବି ନେଇ ଏହି ଆନ୍ଦୋଳନ କରାଯାଇଥିଲା। ବହୁ ସଂଖ୍ୟକ କର୍ମଚାରୀ ଏଥିରେ ସାମିଲ ହୋଇଥିଲେ ା ଦାବିପତ୍ର ଜିଲା ଶ୍ରମ ଅଧିକାରୀଙ୍କୁ ଦିଆଯାଇଥିଲା ।
ଦାବିଗୁଡ଼ିକ ମଧ୍ୟରେ କାର୍ଯ୍ୟରତ ଆଉଟସୋର୍ସିଂ କର୍ମଚାରୀଙ୍କ ପାଇଁ ସରକାର ଦେଉଥିବା ପ୍ରାପ୍ୟର ଏକ ପଞ୍ଚମାଂଶ ଅର୍ଥାତ୍ ୧୮% ଜିଏସ୍ଟି ବାବଦରେ ସମ୍ପୃକ୍ତ ଏଜେନ୍ସି କାଟି ଦେଉଛି। ତେଣୁ ଆଉଟସୋର୍ସିଂ ବ୍ୟବସ୍ଥାରୁ ଜିଏସ୍ଟିକୁ ବାଦ ଦେବା, ବର୍ତ୍ତମାନ ବଜାର ଦରକୁ ଦୃଷ୍ଟିରେ ରଖି ମଜୁରି ବୃଦ୍ଧି, ପ୍ରତି ମାସ ପ୍ରଥମ ସପ୍ତାହ ସୁଦ୍ଧା ମଜୁରି ପ୍ରଦାନକୁ ନିଶ୍ଚିତ କରାଯିବା ଇତ୍ୟାଦି ଅନ୍ତର୍ଭୁକ୍ତ। ସେହିପରି ଏଜେନ୍ସି ବଦଳିଲେ ପୂର୍ବ ଏଜେନ୍ସି ଦ୍ୱାରା କାର୍ଯ୍ୟରତ ଆଉଟସୋର୍ସିଂ କର୍ମଚାରୀଙ୍କୁ ରଖାଯିବା, ଏଜେନ୍ସି ଦ୍ୱାରା ସଂଗୃହୀତ ଇପିଏଫ ଟଙ୍କା ନିୟମିତ ଓ ଠିକଣା ଭାବେ ଜମା ହେବାର ବ୍ୟବସ୍ଥା କରାଯିବା, ଇଏସ୍ଆଇ ସୁବିଧା ଉପଲବ୍ଧ ପାଇଁ ମଧ୍ୟ ଦାବି ପତ୍ରରେ ଦର୍ଶାଯାଇଛି।
ଆଦର୍ଶ ବିଦ୍ୟାଳୟଗୁଡିକରେ ରାତ୍ର ଜଗୁଆଳିଙ୍କୁ ଝାଡ଼ୁଦାର ଦାୟିତ୍ୱକୁ ସଂଘ ବିରୋଧ କରିଛି। ପୃଥକ କର୍ମଚାରୀ ନିୟୋଜିତ କରାଯିବା, ସରକାରୀ କର୍ମଚାରୀଙ୍କ ଭଳି ଛୁଟି ବ୍ୟବସ୍ଥା, ସାମାଜିକ ସୁରକ୍ଷା ବ୍ୟବସ୍ଥାନୁସାରେ ଆଉଟସୋର୍ସିଂ କର୍ମଚାରୀଙ୍କୁ ବୀମାଭୁକ୍ତ ସହ ପେନସନ ବ୍ୟବସ୍ଥା କରାଯିବା ଏବଂ ମହିଳା ଆଉଟସୋର୍ସିଂ କର୍ମଚାରୀଙ୍କୁ ସବେତନ ମାତୃତ୍ୱ ଛୁଟି ପାଇଁ ମଧ୍ୟ ସଂଘ ଦାବି କରିଛି । ଆନ୍ଦୋଳନର ନେତୃତ୍ୱ ଜିଲା ସଭାପତି ପୂର୍ଣ୍ଣପ୍ରିୟା ପାତ୍ର, ସମ୍ପାଦକ ପ୍ରଶାନ୍ତ ପରିଚ୍ଛା, ଯୁଗ୍ମ ସମ୍ପାଦକ ବଳରାମ ପାତ୍ର ଓ ଗଣେଶ ସାହୁ ନେଇଥିଲେ ।
