ଅନୁଗୋଳ ଅଫିସ, ୨୪।୯
ଅନୁଗୋଳ ନୂଆମୌଜା ପଞ୍ଚାୟତ ଶରଧାପୁର ଗ୍ରାମର ଅନେକ ଲୋକ ସରକାରୀ ଯୋଜନା ଓ ସହାୟତାରୁ ବଞ୍ଚିତ ରହିଛନ୍ତି। ଏ ନେଇ ଗ୍ରାମର ୧୮ ଜଣ ସୋମବାର ଜିଲାପାଳଙ୍କ ଦ୍ୱାରସ୍ଥ ହୋଇଛନ୍ତି। ସେମାନେ ଅତିରିକ୍ତ ଜିଲାପାଳ ତପନ କୁମାର ଶତପଥୀଙ୍କୁ ଭେଟି ତୁରନ୍ତ ସମସ୍ୟା ସମାଧାନ ପାଇଁ ଦାବି କରିଛନ୍ତି।
ଗ୍ରାମବାସୀ ଦର୍ଶାଇଛନ୍ତି ଯେ, ଗ୍ରାମର ସୁବାସ ଚନ୍ଦ୍ର ପ୍ରଧାନଙ୍କ ଘର ବର୍ଷାରେ ଭାଙ୍ଗି ଯାଇଛି। ହେଲେ ତାଙ୍କୁ ଏଯାଏ ସରକାରୀ ସହାୟତା ମିଳିପାରି ନାହିଁ। ଭିନ୍ନକ୍ଷମ ହୋଇଥିଲେ ବି ବବୁଲୁ ସାହୁ ଓ ବାସନ୍ତୀ ସାହୁଙ୍କୁ ସରକାରଙ୍କ ଭତ୍ତା ଯୋଜନାରେ ସାମିଲ କରାଯାଇ ନାହିଁ। ଗାଁର ନେକୁରୀ ସାହୁ, ପରମା ସାହୁ, ଶିକର ସାହୁ, କୁନି ସ୍ବାଇଁ, ଦୁହିତା ବେହେରା, ଶ୍ରୀବତ୍ସ ସାହୁ, ଟିକିଲି ସାହୁ, ବିଛିଲି ପାତ୍ର, କମାର ପାତ୍ର, ଅରକ୍ଷିତ ବେହେରା, ବୁଧେଇ ସାହୁ, ମଙ୍ଗୁଳୁ ସାହୁ, କବିତା ସାହୁ, ଶୁକଦେବ ସାହୁ ପ୍ରମୁଖ ବୃଦ୍ଧାବୃଦ୍ଧଙ୍କୁ ଏଯାଏ ଭତ୍ତା ମିଳିପାରି ନାହିଁ। ଏ ନେଇ ପଞ୍ଚାୟତ ଠାରୁ ଆରମ୍ଭ କରି ବ୍ଲକ ପ୍ରଶାସନ ପର୍ଯ୍ୟନ୍ତ ବାରମ୍ବାର ଧାଉଁଥିଲେ ମଧ୍ୟ କିଛି ସୁଫଳ ମିଳୁ ନ ଥିବା ସେମାନେ ଅଭିଯୋଗରେ ଦର୍ଶାଯାଇଛି। ଏ ନେଇ ନୂଆମୌଜା ସରପଞ୍ଚ ଜ୍ୟେତ୍ସ୍ନାରାଣୀ ନାୟକ କହିଛନ୍ତି, ପଞ୍ଚାୟତର ଲୋକେ କିଭଳି ସରକାରୀ ସୁବିଧା ପାଇବେ ସେଥିପାଇଁ କାର୍ଯ୍ୟ କରାଯାଉଛି। ଲୋକମାନେ ସେମାନଙ୍କ କାଗଜପତ୍ର ଦାଖଲ କଲେ ସେମାନଙ୍କୁ ସରକାରୀ ଯୋଜନା ସହ ଅନ୍ୟାନ୍ୟ ସହାୟତା ମିଳିପାରିବ।
