ଛତ୍ରପୁର,୧୫ା୧୨(ଡି.ଏନ.ଏ)-ଗାଡି ରେଜିଷ୍ଟ୍ରେଶନଠାରୁ ଆରମ୍ଭ କରି ଇନ୍ସ୍ୟୁରାନ୍ସ ସାର୍ଟିଫିକେଟ୍, ଡ୍ରାଇଭିଂ ଲାଇସେନ୍ସ ଓ ପଲ୍ୟୁସନ ସାର୍ଟିଫିକେଟ ପ୍ରସ୍ତୁତ କରିବା ପାଇଁ ରାଜ୍ୟ ସରକାରଙ୍କ ପକ୍ଷରୁ ଅବଧିକୁ ଆଉ ୩ ମାସ ବଢାଇ ଦିଆଯାଇଛି । ଅପରପକ୍ଷରେ ଛତ୍ରପୁରସ୍ଥିତ ଆରଟିଓ ଅଫିସ ପରିସରରେ ପୂର୍ବରୁ ଦଲାଲ କାମ କରୁଥିବା ଲୋକେ ସେମାନଙ୍କ ତରିକା ବଦଳାଇ ଲୋକଙ୍କୁ ଶୋଷଣ କରୁଛନ୍ତିି । ବିଭିନ୍ନ ଡ୍ରାଇଭିଂ ଟ୍ରେନିଂ ସେଣ୍ଟର କର୍ମଚାରୀ ବୋଲି ପରିଚୟପତ୍ର ଝୁଲାଇ ଦଲାଲ କାମ କରୁଥିବା ଦେଖିବାକୁ ମିଳୁଛି । ଏପରିକି କୋର୍ଟ ସମ୍ମୁଖ ବର ଗଛଠାରୁ ଆରମ୍ଭ କରି ଆରଟିଓ ଅଫିସ ନିକଟ ବିଭିନ୍ନ ଦୋକାନ ଓ ଘରେ ଏବେ ଦଲାଲ ସକ୍ରିୟ ହୋଇଛନ୍ତିି । ଫୋନ୍ ଦ୍ୱାରା ଲୋକଙ୍କ ଗାଡି ସମ୍ବନ୍ଧୀୟ କାଗଜପତ୍ର ପ୍ରସ୍ତୁତ କରୁଥିବା ଜଣାପଡିଛି । ଏବେ ବି ଦୈନିକ ଛତ୍ରପୁରସ୍ଥିତ ଗଞ୍ଜାମ ଆରଟିଓ ଅଫିସ୍ରେ ଲୋକେ ଡ୍ରାଇଭିଂ ଲାଇସେନ୍ସ ପାଇଁ ଲମ୍ବା ଲାଇନ୍ରେ ଠିଆ ହେଉଛନ୍ତି। ଏଥିସହ ପଲ୍ୟୁସନ ସାର୍ଟିଫିକେଟ୍ ପାଇଁ ମଧ୍ୟ ଚଢା ଦର ଲୋକଙ୍କଠାରୁ ଆଦାୟ ହେଉଥିବା ଅଭିଯୋଗ ହୋଇଛି । କୋର୍ଟ ନିକଟରୁ ଆରଟିଓ ଅଫିସ ପର୍ଯ୍ୟନ୍ତ ରାସ୍ତାରେ କାହାରିକୁ ଗାଡିରେ ଯିବାକୁ ଅନୁମତି ଦିଆଯାଉନି । ଏଠାରେ ଆରଟିଓ ଅଫିସ ପକ୍ଷରୁ ଜନୈକ ଘରୋଇ ସୁରକ୍ଷା କର୍ମୀଙ୍କୁ ମୁତୟନ କରାଯାଇଛି। ଅପରପକ୍ଷରେ କେତେକ ନିର୍ଦ୍ଦିଷ୍ଟ ଗାଡିକୁ ଆରଟିଓ ଅଫିସ୍କୁ ଛଡାଯାଉଛି । ଦୈନିକ ଶତାଧିକ ଲୋକ ଏଠାକୁ ଆସୁଥିବାରୁ ଜିଲାପାଳଙ୍କ କାର୍ଯ୍ୟାଳୟଠାରୁ ଆରମ୍ଭ କରି ଉପଜିଲାପାଳଙ୍କ ଅଫିସ ପର୍ଯ୍ୟନ୍ତ ଟ୍ରାଫିକ୍ ସମସ୍ୟା ବିପର୍ଯ୍ୟସ୍ତ ହେଉଛି । ଅପରପକ୍ଷରେ ପୋଲିସ ଓ ପ୍ରଶାସନ ନୀରବଦ୍ରଷ୍ଟା ସାଜିଛନ୍ତି ା ଆହୁରି ଜଣାଯାଇଛି, ବିଭିନ୍ନ ଗାଡି କାଗଜପତ୍ର ପ୍ରସ୍ତୁତ ପାଇଁ ସରକାର ୩ ମାସ ଅବଧି ବଢାଇଥିବା ବେଳେ ବିପଦପୂର୍ଣ୍ଣ ଓ ଜୀବନ ପ୍ରତି ବିପଦକୁ ନେଇ ଗାଡି ଚାଳକ ଓ ଟ୍ରାଫିକ୍ ନିୟମ ଉଲ୍ଲଂଘନକାରୀଙ୍କ ଉପରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶନାମା ଆସିଛି। ରାଜ୍ୟ ପରିବହନ କମିଶନରଙ୍କ ପକ୍ଷରୁ ଏହି ନିର୍ଦ୍ଦେଶନାମା ଗଞ୍ଜାମ ଜିଲାପାଳ, ଗଞ୍ଜାମ ଏସ୍ପି, ବ୍ରହ୍ମପୁର ଏସ୍ପିଙ୍କ ନିକଟକୁ ଆସିଛି ା ଦ୍ରୁତଗତିରେ ଗାଡି ଚାଳନା, ଲାଲ୍ ସିଗନାଲକୁ ନ ମାନି ଆଗକୁ ଗାଡି ନେବା, ମଦ୍ୟପାନ କରି ଗାଡି ଚଳାଇବା, ମୋବାଇଲ୍ରେ କଥା ହୋଇ ଗାଡି ଚଳାଇବା, ବିପଦପୂର୍ଣ୍ଣ ଭାବେ ଗାଡି ଚାଳନା, ୩ ଜଣଙ୍କୁ ବସି ଗାଡି ଚଳାଇବା, ହେଲମେଟ୍ ନ ପିନ୍ଧି ଓ ସିଟ୍ ବେଲ୍ଟ ନ ବାନ୍ଧିି ଗାଡି ଚଳାଇବା ଓ ଓଭରଲୋଡିଂ କରୁଥିବା ଚାଳକଙ୍କ ଉପରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦିଆଯାଇଛି। ଏନେଇ ଏନ୍ଫୋର୍ସମେଣ୍ଟ କଡାକଡି କରିବାକୁ କୁହାଯାଇଛି। ତେବେ ଏହି ଏନ୍ଫୋର୍ସମେଣ୍ଟ ଓ ଗାଡି ଯାଞ୍ଚ ବେଳେ ଟ୍ରାଫିକ୍ ବ୍ୟବସ୍ଥା ପ୍ରତି ଧ୍ୟାନ ଦେବାକୁ ନିର୍ଦ୍ଦେଶ ଆସିଛି ା
