ହାଟଡ଼ିହୀ, ୧୫।୫(ଡି.ଏନ୍.ଏ.): କେନ୍ଦୁଝର ଜିଲା ହାଟଡ଼ିହୀ ବ୍ଲକ ଗୋପ ଗ୍ରାମର ସୁବାଷ ଘୋଷଙ୍କ ପୁଅ ବିମଳ(୨୫) ଚେନ୍ନାଇରୁ ପ୍ରାୟ ୧୯୦୦ କିଲୋମିଟର ସାଇକେଲରେ ଯାତ୍ରା କରି ନିଜ ଗ୍ରାମରେ ଗତ ଗୁରୁବାର ରାତିରେ ପହଞ୍ଚିଛନ୍ତି। ହାଟଡିହୀ ପଞ୍ଚାୟତ ତରଫରୁ ତାଙ୍କୁ କ୍ୱାରାଣ୍ଟାଇନ ସେଣ୍ଟରରେ ରଖାଯାଇଛି। ବିମଳଙ୍କ କହିବା ଅନୁଯାୟୀ, ଗତ ୪ ତାରିଖରେ ସେ ଚେନ୍ନାଇରୁ ସାଇକେଲ ଧରି ଘର ଅଭିମୁଖେ ବାହାରିଥିଲେ। ଦୀର୍ଘ ୧୧ ଦିନ ପରେ ସେ ନିଜ ଅଞ୍ଚଳରେ ପହଞ୍ଚିଛନ୍ତି। ସାଥିରେ ସେ ବିସ୍କୁଟ ଓ ପାଣି ନେଇ ଆସିଥିବା ବେଳେ ରାସ୍ତାରେ ଭୋକ ଲାଗିଲେ ସେ ଖାଉଥିବା କହିଛନ୍ତି। ରାସ୍ତାରେ ଥକା ଲାଗିଲେ ଗଛ କିମ୍ବା ରାସ୍ତା କଡ଼ ଘର ପାଖରେ ସୁବିଧା ଦେଖି ବିଶ୍ରାମ ନେଉଥିଲେ। ଦୃଢ଼ ମନୋବଳ ଓ ଭଗବାନଙ୍କ ଆଶୀର୍ବାଦରେ ସେ ଚେନ୍ନାଇରୁ ନିଜ ଅଞ୍ଚଳରେ ପହଞ୍ଚିପାରିଥିବା କହିଛନ୍ତି।
