ଭୁବନେଶ୍ୱର, ୧୯ା୮ (ସ୍ପୋଟର୍ସ ବ୍ୟୁରୋ)- ଓଡ଼ିଶା କ୍ରିକେଟ୍ ଆସୋସିଏଶନ (ଓସିଏ)ର ନିର୍ବାଚନ ଆସନ୍ତା ମାସରେ ହେବାକୁ ଥିବାବେଳେ ଏହାକୁ ନେଇ ଏବେ ତତ୍ପରତା ପ୍ରକାଶ ପାଇଛି। ରାଜ୍ୟରେ ଥିବା ବିଭିନ୍ନ କ୍ଲବର ଭବିଷ୍ୟତ ନିର୍ଦ୍ଧାରଣ ପାଇଁ ରବିବାର ୫ ଜଣିଆ ଯାଞ୍ଚ କମିଟି ଗଠନ କରାଯାଇଛି। ଫୁଲବାଣୀ ଜିଲା ଆଥ୍ଲେଟିକ ଆସୋସିଏଶନର ସମ୍ପାଦକ ଶିବ ପ୍ରସାଦ ତ୍ରିପାଠୀଙ୍କ ଅଧ୍ୟକ୍ଷତାରେ ଏହି ୫ ଜଣିଆ କମିଟି ଗଠନ କରାଯାଇଛି। ଓସିଏର ସଦସ୍ୟ ହେବା ପାଇଁ ଆଗ୍ରହୀ ରହିଥିବା କ୍ଲବଗୁଡ଼ିକ ସପ୍ତାହକ ମଧ୍ୟରେ ଏହି କମିଟିକୁ ଆଦେବନ କରିବେ। ସମ୍ପୃକ୍ତ କ୍ଲବ କ୍ରିକେଟ୍ ନା ସାମାଜିକ କ୍ଲବ ଏହି ୫ ଜଣିଆ କମିଟି ତାହା ଉପରେ ନିଷ୍ପତ୍ତି ନେବ। ଓସିଏ ପରିଚାଳନା ସମିତିର ବୈଠକରେ ରବିବାର ଏ ନେଇ ଆଲୋଚନା ହେବାପରେ ଏହି କମିଟି ଗଠନ କରାଯିବା ନେଇ ନିଷ୍ପତ୍ତି ହୋଇଥିଲା। ଶବି ପ୍ରସାଦଙ୍କୁ କମିଟିର ଅଧ୍ୟକ୍ଷ ନିଯୁକ୍ତ କରାଯାଇଥିବାବେଳେ ଅଶୋକ ସାହୁ (ଗଞ୍ଜାମ ଜିଲା କ୍ରିକେଟ୍ ଆସୋସିଏଶନ ସମ୍ପାଦକ), ଚିନ୍ମୟାନନ୍ଦ ଜେନା (ପୂର୍ବତନ ଖେଳାଳି ତଥା ଚୟନକର୍ତ୍ତା), ସିଦ୍ଧାର୍ଥ କୁମାର ସାହୁ (ଖ୍ରୀଷ୍ଟ କଲେଜ ଅଧ୍ୟକ୍ଷ) ଓ ଏଫ୍.ସି. ନର୍ଥ (ଷ୍ଟିଓ୍ବାର୍ଟ ସ୍କୁଲ ଅଧ୍ୟକ୍ଷ)ଙ୍କୁ ଏହି କମିଟିର ସଦସ୍ୟ ରଖାଯାଇଛି। ଯେହେତୁ କ୍ଲବଗୁଡ଼ିକ ଉପରେ ବିଚାର କରାଯିବାକୁ ଥିବାରୁ ସ୍କୁଲ, କଲେଜ ଓ ଜିଲାର ସଦସ୍ୟମାନଙ୍କୁ ଏହି ୫ ଜଣିଆ ଯାଞ୍ଚ କମିଟିରେ ସ୍ଥାନ ମିଳିଛି।
ଉଲ୍ଲେଖଯୋଗ୍ୟ, ଓଡ଼ିଶା କ୍ରିକେଟ୍ ଆସୋସିଏଶନ ଅଧିନରେ ପୂର୍ବରୁ ରାଜ୍ୟର ୨୦ କ୍ଲବକୁ ସଦସ୍ୟଭାବେ ସମ୍ବିଧାନରେ ସ୍ଥାନିତ କରାଯାଇଛି। ଏହି ୨୦ କ୍ଲବର ସ୍ଥାନ ସୁରକ୍ଷିତ ରହିଥିବା ସମ୍ଭାବନା ରହିଛି। କିନ୍ତୁ ଓସିଏ ଅଧିନରେ ସଦସ୍ୟ ହେବା ପାଇଁ ଆଗ୍ରହୀ ରହିଥିବା ନୂତନ କ୍ଲବଗୁଡ଼ିକ ଏହି ୫ ଜଣିଆ କମିଟିକୁ ଆବେଦନ କରିପାରିବେ। ସଦସ୍ୟତା ବିବାଦ ସମୟରେ ପୂର୍ବରୁ ୫୪ କ୍ଲବ ଓସିଏ ସଦସ୍ୟ ହେବା ପାଇଁ ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ (ବିସିସିଆଇ) ନିକଟରେ ଆବେଦନ କରିଥିଲେ। ଏବେ ଏହିସବୁ କ୍ଲବଗୁଡ଼ିକ ନୂତନ କରି ଗଠିତ ହୋଇଥିବା ୫ ଜଣିଆ ଯାଞ୍ଚ କମିଟି ନିକଟରେ ସଦସ୍ୟତା ପାଇଁ ପୁନଃ ଆବେଦନ କରିପାରିବେ ବୋଲି ଜଣାପଡ଼ିଛି। ଯେଉଁ କ୍ଲବଗୁଡ଼ିକ କ୍ରିକେଟ୍ ପାଇଁ କାର୍ଯ୍ୟ କରୁଥିବେ ସେମାନଙ୍କୁ ସଦସ୍ୟତା ଭାବେ ଗ୍ରହଣ କରିବା ପାଇଁ ଏହି କମିଟି ପରିଚାଳନା ସମିତିକୁ ସୁପାରିସ କରିବ। ନୂତନ କରି ଗଠିତ ହୋଇଥିବା କମିଟି ପକ୍ଷରୁ ଏହା କୁହାଯାଇଛି। ସଦସ୍ୟତା ପାଇଁ ଓସିଏ ଓ୍ବେବସାଇଟ୍ରେ ସୋମବାର ବିଜ୍ଞପ୍ତି ପ୍ରକାଶ ପାଇବ। ଏହାପରେ ଯେଉଁ କ୍ଲବଗୁଡ଼ିକ ସଦସ୍ୟତା ପାଇଁ ଆଗ୍ରହୀ ରହିଛନ୍ତି ସେମାନେ ବିଜ୍ଞପ୍ତିର ସପ୍ତାହକ ମଧ୍ୟରେ ଆବେଦନ କରିପାରିବେ। ୫ ଜଣିଆ ଯାଞ୍ଚ କମିଟି ଦ୍ୱାରା ଏହାପରେ ମାନଦଣ୍ଡ ଅନୁଯାୟୀ କ୍ଲବଗୁଡ଼ିକ ନାମ ପରିଚାଳନା ସମିତିକୁ ସୁପାରିସ କରାଯିବ ବୋଲି ଜଣାପଡ଼ିଛି।
