ବଲାଙ୍ଗୀର ଅଫିସ, ୨୪ା୪: ବଲାଙ୍ଗୀର ଜିଲା ଲାଠୋର ଥାନା ଅନ୍ତର୍ଗତ ଚାନ୍ଦିଲି ସଂରକ୍ଷିତ ଜଙ୍ଗଲରେ ଗୁରୁବାର ମାଓବାଦୀ ଓ ପୋଲିସ ମଧ୍ୟରେ ଗୁଳି ବିନିମୟ ହୋଇଥିଲା । ଏହି ଗୁଳି ବିନିମୟ ପରେ ମାଓବାଦୀ ଦଳ ସେଠାରୁ ଛତ୍ରଭଙ୍ଗ ଦେଇ ପଳାଇଥିଲେ । ପୋଲିସ ମାଓବାଦୀଙ୍କ କ୍ୟାମ୍ପ ଠାବ କରି ସେଠାରୁ ବହୁ ସାମଗ୍ରୀ ଜବତ୍ କରିଥିଲା । ତେବେ ପୋଲିସ ପକ୍ଷରୁ ଶୁକ୍ରବାର ମଧ୍ୟ କୋମ୍ବିଂ ଅପରେଶନ୍ ଜାରି ରହିଛି ଏବଂ ଚାନ୍ଦିଲି ପାହାଡକୁ ପୋଲିସ ଘେରି ରଖିଛି ବୋଲି ବଲାଙ୍ଗୀର ଏସ୍ପି ସନ୍ଦୀପ ମାଡକର ଜିଲା ପୋଲିସ କାର୍ଯ୍ୟାଳୟରେ ଅନୁଷ୍ଠିତ ଖବରଦାତା ସମ୍ମିଳନୀରେ ପ୍ରକାଶ କରିଛନ୍ତି । ତାଙ୍କ ସୂଚନା ଅଦୁସାରେ ଚାନ୍ଦିଲି ପାହାଡ ଅଞ୍ଚଳରେ ବଲାଙ୍ଗୀର-ବରଗଡ-ମହାସମୁନ୍ଦ ଡିଭିଜନର ଏକ ମାଓବାଦୀ ଦଳଙ୍କ ଗତିବିଧି ସମ୍ପର୍କରେ ନିର୍ଦ୍ଦିଷ୍ଟ ସୂଚନା ପାଇବା ପରେ ମଙ୍ଗଳବାରଠାରୁ ପୋଲିସ ପକ୍ଷରୁ ସେହି ଅଞ୍ଚଳରେ କୋମ୍ବିଂ ଅପରେଶନ୍ ଆରମ୍ଭ କରାଯାଇଥିଲା । ପୋଲିସର ଦୁଇଟି ସ୍ପେଶାଲ ଅପରେଶନ୍ ଗ୍ରୁପ ପକ୍ଷରୁ କୋମ୍ବିଂ ପରେ ବୁଧବାର ପୂର୍ବାହ୍ନ ୯ଟାରେ ଚାନ୍ଦିଲି ଜଙ୍ଗଲ ଉପରେ ଥିବା ମାଓବାଦୀମାନେ ପ୍ରଥମେ ପୋଲିସ ଉପରକୁ ଗୁଳିଚାଳନା କରିଥିଲେ । ପୋଲିସର ଜବାବୀ କାର୍ଯ୍ୟାନୁଷ୍ଠାନ ପରେ ମାଓବାଦୀମାନେ ସେହି ସ୍ଥାନ ଛାଡି ପଳାଇଥିଲେ। ତେବେ ପୋଲିସ ସେହି ଜଙ୍ଗଲରେ ସେମାନଙ୍କ ଏକ କ୍ୟାମ୍ପ ଠାବ କରିଥିଲା । ସେଠାରୁ ଦୁଇଟି ଜୀବନ୍ତ ଗୁଳି ସହ ମାଓବାଦୀମାନଙ୍କ ରନ୍ଧନ ସାମଗ୍ରୀ, ପନିପରିବା, ଲୁଗାପଟା, ଦୁଇଟି ଗୁଲେଟ୍ ବାଡି, ଗୋଳା ଓ ଅନ୍ୟ ସାମଗ୍ରୀ ଜବତ କରାଯାଇଥିଲା। ଏହି ଘଟଣା ପରେ ସିଆରପିଏଫ୍, ଏସ୍ଓଜି ଏବଂ ଡିଭିଏଫ୍ ପୋଲିସ ଦଳ ସମଗ୍ର ଚାନ୍ଦିଲି ପାହାଡର ବିଭିନ୍ନ ଦିଗରେ ଥିବା ରାସ୍ତାକୁ ଘେରି ରହିଥିବା ଏସ୍ପି ମାଡକର ସୂଚନା ଦେଇଛନ୍ତି । ସେହି ଜଙ୍ଗଲରୁ ଏହି ମାଓବାଦୀ ଦଳ ଯେପରି ଖସି ନ ଯିବେ ସେଥିପ୍ରତି ତୀକ୍ଷ୍ଣ ଦୃଷ୍ଟି ରଖାଯାଇଛି ବୋଲି ସେ ସୂଚନା ଦେଇଛନ୍ତି । ଗୁଳି ବିନିମୟ ବେଳେ ପୋଲିସ ପକ୍ଷରୁ କାହାରି କିଛି କ୍ଷତି ହୋଇ ନ ଥିବାବେଳେ ମାଓବାଦୀଙ୍କ ମଧ୍ୟରୁ କେହି ଆହତ ହୋଇଥିବା ଏସ୍ପି ମାଡକର ସନ୍ଦେହ ପ୍ରକାଶ କରିଛନ୍ତି । ପ୍ରାୟ ୪ମାସ ପୂର୍ବରୁ ଗନ୍ଧମାର୍ଦ୍ଦନ ଜଙ୍ଗଲରେ ପୋଲିସ-ମାଓବାଦୀଙ୍କ ମଧ୍ୟରେ ଗୁଳି ବିନିମୟ ହୋଇଥିଲା ।
