ସୋନପୁର,୨୭।୩(ନି.ପ୍ର.):ମ୍ୟାଜିକ୍ ପ୍ରଦର୍ଶନ କରିବାକୁ ସୁବର୍ଣ୍ଣପୁର ଜିଲା ଡୁଙ୍ଗୁରିପାଲି ବ୍ଲକ ଅନ୍ଧାରୀବାଞ୍ଜିର ୮ଟି ପରିବାର କେନ୍ଦୁଝର ଜିଲା ଚମ୍ପୁଆ ଅଞ୍ଚଳକୁ ଯାଇ ସେଠାରେ ଫସି ରହିଥିଲେ। ପ୍ରଶାସନର ଉଦ୍ୟମକ୍ରମେ ମୋଟ ୨୫ଜଣ ଗୁରୁବାର ରାତିରେ ଗାଁରେ ପହଞ୍ଚତ୍ଛନ୍ତି । ସେମାନଙ୍କ ମଧ୍ୟରେ ୭ଜଣ ଶିଶୁ ଓ ୧୦ଜଣ ମହିଳା ଅଛନ୍ତି। ଲକ୍ ଡାଉନ ଯୋଗୁଁ ପୁରୁଷମାନେ ରାସ୍ତା ପାର୍ଶ୍ୱରେ ମ୍ୟାଜିକ୍ ପ୍ରଦର୍ଶନ କରି ପାରୁ ନ ଥିଲେ । ମହିଳାମାନେ ଗାଁକୁ ଚୁଡି ବିକ୍ରି କରିବାକୁ ଯିବା ସମୟରେ ଗ୍ରାମବାସୀଙ୍କ ବିରୋଧର ସମ୍ମୁଖୀନ ହୋଇଥିଲେ । ଗାଡି ଚଳାଚଳ ବନ୍ଦ ଯୋଗୁଁ ସେମାନେ ଘରକୁ ଫେରି ପାରି ନଥିଲେ । ଚମ୍ପୁଆ ଥାନା ରଘୁଆସାହିରେ ରହି ଯାଇଥିଲେ। ପାଖରେ ଟଙ୍କା ନଥିବାରୁ ଖାଇବା ପିଇବାରେ ଅସୁବିଧା ଭୋଗିଥିଲେ। ଏ ସମ୍ପର୍କରେ ଅନ୍ଧାରୀବାଞ୍ଜିର ଜଣେ ବ୍ୟକ୍ତି ସୁବର୍ଣ୍ଣପୁରର ଅତିରିକ୍ତ ଜିଲାପାଳ ଶରତ ଚନ୍ଦ୍ର ପଣ୍ଡାଙ୍କୁ ଫୋନ ଯୋଗେ ଜଣାଇଥିଲେ । ଜିଲାପାଳ ମୋନିଷା ବାନାର୍ଜୀ ଏ ସମ୍ପର୍କରେ କେନ୍ଦୁଝର ଜିଲାପାଳଙ୍କ ସହିତ କଥା ହୋଇଥିଲେ। ପରେ ଦୁଇ ଜିଲାର ଶ୍ରମ ବିଭାଗ ମଧ୍ୟରେ ସୂଚନା ଆଦାନ ପ୍ରଦାନ ହୋଇଥିଲା। କେନ୍ଦୁଝର ଜିଲା ପ୍ରଶାସନ ଏକ ଗାଡିରେ ସେମାନଙ୍କୁ ଘରକୁ ପଠାଇବାର ବ୍ୟବସ୍ଥା କରିଥିଲା। ସୁବର୍ଣ୍ଣପୁର ଜିଲା ପ୍ରଶାସନ ରେଡକ୍ରସରୁ ଗାଡି ଭଡା ପ୍ରଦାନ କରିବା ସହିତ ଖାଦ୍ୟପେୟର ବ୍ୟବସ୍ଥା କରିଥିଲେ। ଡାକ୍ତରୀ ଟିମ୍ ସ୍ବାସ୍ଥ୍ୟବସ୍ଥା ଯାଞ୍ଚ କରିବା ପରେ ସମସ୍ତଙ୍କୁ ସ୍ଥାନୀୟ ଉଚ୍ଚ ବିଦ୍ୟାଳୟର ସଙ୍ଗରୋଧ କେନ୍ଦ୍ରରେ ରଖାଯାଇଛି ।
