ଠାକୁରମୁଣ୍ଡା,୨୦।୩(ଡି.ଏନ୍.ଏ.): ମୟୂରଭଞ୍ଜ ଜିଲା ଠାକୁରମୁଣ୍ଡା ନିକଟ ଜୁଡାମ୍ବ ଗ୍ରାମରେ ଗୁରୁବାର ସନ୍ଧ୍ୟାରେ ଏକ ଘର ଉପରେ ବଜ୍ରପାତ ଘଟିଛି। ଏଥିରେ ଜଣଙ୍କ ମୃତ୍ୟୁ ଘଟିଥିବା ବେଳେ ୨ ଜଣ ଗୁରୁତର ହୋଇଛନ୍ତି। ମୃତକ ହେଲେ ଦିଗଧର ପଞ୍ଚାୟତ ସୁନିନ୍ଦା ଗ୍ରାମର ଦଶରା ସିଂଙ୍କୁ(୫୦)। ତେବେ ଗୁରୁତରଙ୍କୁ ଘଟଣାର ୧୨ ଘଣ୍ଟା ପରେ ଉଦ୍ଧାର କରାଯାଇ ଚିକିତ୍ସା ନିମନ୍ତେ ଠାକୁରମୁଣ୍ଡା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି।
ସୂଚନାଯେଗ୍ୟ, ଦଶରା ଜୁଡାମ୍ବ ଗ୍ରାମର ଜଣେ ସମ୍ପର୍କୀୟ ଘରକୁ ଦଶାହ କର୍ମରେ ଯୋଗଦେବାକୁ ଆସିଥିଲେ। ଦଶାହ କର୍ମ ସରିଯାଇଥିବା ବେଳେ ଦଶରା ସାହି ଆଡେ ବୁଲିବାକୁ ଯାଇଥିଲେ। ସନ୍ଧ୍ୟାରେ କାଳବୈଶାଖୀ ବର୍ଷା ପବନ ସାଙ୍ଗକୁ ବିଜୁଳି ମାରିବାରୁ ଦଶରା ସାହିର ଫୁଲ ଚାମ୍ପିଆ ନାମ୍ନୀ ଜଣେ ମହିଳାଙ୍କ ଘର ଭିତରେ ଯାଇ ଆଶ୍ରୟ ନେଇଥିଲେ। ଫୁଲ ବାହାରକୁ ଯାଇଥିବାରୁ ପଡ଼ୋଶୀ ରଥିଆ ପୂର୍ତ୍ତି ଓ ତାଙ୍କ ସ୍ତ୍ରୀ ବାଲମା ଫୁଲଙ୍କ ଘରକୁ ଜଗିଥିଲେ । ଘରର ଏକ କୋଠରି ଭିତରେ ଏହି ୩ ଜଣ ବସିଥିବା ବେଳେ ହଠାତ୍ ଘର ଉପରକୁ ବଜ୍ରପାତ ହୋଇଥିଲା। ଘଟଣାସ୍ଥଳରେ ଘର ଭିତରେ ଆଶ୍ରୟ ନେଇଥିବା ଦଶରାଙ୍କ ମୃତ୍ୟୁ ଘଟିଥିଲା । ବଜ୍ରପାତରେ ଦଶରାଙ୍କ ଦେହର କିଛି ଅଂଶ ପୋଡ଼ିଯାଇଥିଲା। ଘରେ ଥିବା ରଥିଆ ଓ ତାଙ୍କ ସ୍ତ୍ରୀ ବାଲମା ସଂଜ୍ଞାହୀନ ଅବସ୍ଥାରେ ଘର ଭିତରେ ପଡିରହିଥିଲେ। ଏହି ଘଟଣା ଘଟିଥିଲେ ମଧ୍ୟ ପାଖ ପଡ଼ୋଶୀ ଜାଣିପାରି ନ ଥିଲେ। ସକାଳେ ପଡ଼ୋଶୀ ଦେଖି ଘର ଭିତରୁ ମୃତ ଦଶରାଙ୍କୁ ଉଦ୍ଧାର କରିଥିଲେ। ସଂଜ୍ଞାହୀନ ହୋଇ ପଡ଼ିରହିଥିବା ସ୍ବାମୀ, ସ୍ତ୍ରୀକୁ ଉଦ୍ଧାର କରାଯାଇ ଠାକୁରମୁଣ୍ଡା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସା କରାଯାଉଛି। ଠାକୁରମୁଣ୍ଡା ପୋଲିସ ମୃତଦେହ ବ୍ୟବଚ୍ଛେଦ ନିମନ୍ତେ ପଠାଇଛି।
