ନୂଆଦିଲ୍ଲୀ,୧୮ା୪(ପି.ଟି.): କରୋନା ସଂକ୍ରମଣକୁ ପ୍ରତିହତ କରିବା ଲାଗି ପ୍ରଧାନମନ୍ତ୍ରୀ ଦ୍ୱିତୀୟ ପର୍ଯ୍ୟାୟରେ ମେ’ ୩ ପର୍ଯ୍ୟନ୍ତ ଲକ୍ଡାଉନ ବଢ଼ାଇଥିବାବେଳେ ୨୦ ତାରିଖରୁ ଗ୍ରାମାଞ୍ଚଳରେ ବିଭିନ୍ନ ଅର୍ଥନୈତିକ କାର୍ଯ୍ୟ କରିବା ପାଇଁ ଅନୁମତି ଦିଆଯିବ ବୋଲି କହିଥିଲେ। ତଦନୁଯାୟୀ ୨୦ ପରେ ଲକ୍ଡାଉନରୁ ବାଦ୍ ପଡ଼ିବାକୁ ଥିବା କେତେକ କାର୍ଯ୍ୟର ତାଲିକା ଗତ ୧୫ରେ କେନ୍ଦ୍ର ସରକାର ପ୍ରକାଶ କରିଥିଲେ। ପୁନର୍ବାର ଶୁକ୍ରବାର ଆଉ କେତେକ କାର୍ଯ୍ୟକୁ ସରକାର ଲକ୍ଡାଉନ କଟକଣାରୁ ବାଦ୍ ଦେଇଛନ୍ତି। ଏହି ସମୟରେ ଗ୍ରାମାଞ୍ଚଳରେ ଜଳଯୋଗାଣ, ପରିମଳ ସମେତ ଅନ୍ୟ ନିର୍ମାଣ କାର୍ଯ୍ୟ କରାଯାଇପାରିବ। ବିଦ୍ୟୁତ ଲାଇନ ଟଣାଯାଇପାରିବ ଓ ଟେଲିକମ୍ ଅପ୍ଟିକାଲ ଫାଇବର ତଥା କେବୁଲ ବିଛାଯାଇପାରିବ। ଏଥିସହିତ ଅଣବ୍ୟାଙ୍କିଙ୍ଗ ଫାଇନାନ୍ସ ସଂସ୍ଥା ଏବଂ କୋଅପରେଟିଭ୍ କ୍ରେଡିଟ୍ ସୋସାଇଟି ଏହି ସମୟରେ ଖୋଲା ରଖିବାକୁ କେନ୍ଦ୍ର ସରକାର ଅନୁମତି ଦେଇଛନ୍ତି। ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ମୁଖ୍ୟ ସଚିବମାନଙ୍କୁ ପତ୍ର ଲେଖି ସ୍ବରାଷ୍ଟ୍ର ସଚିବ ଅଜୟ ଭାଲା କହିଛନ୍ତି, ଲକ୍ଡାଉନ ବେଳେ ଅନୁସୂଚିତ ଜନଜାତି ଓ ଅନ୍ୟ ବନବାସୀମାନଙ୍କୁ ଲଘୁ ବନଜାତ ଦ୍ରବ୍ୟ ସଂଗ୍ରହ, ଅମଳ ଓ ପ୍ରକ୍ରିୟାକରଣ ପାଇଁ ସୁଯୋଗ ମିଳିବ। ହାଉସିଂ ଫାଇନାନ୍ସ କମ୍ପାନୀ, ମାଇକ୍ରୋ ଫାଇନାନ୍ସ ସଂସ୍ଥାଗୁଡ଼ିକ ସର୍ବନିମ୍ନ କର୍ମଚାରୀରେ ଚାଲୁ କରିବାକୁ କୁହାଯାଇଛି। ଲକ୍ଡାଉନ ବେଳେ ବାଉଁଶ, ନଡିଆ, ଗୁଆ ଓ ମସଲା ଚାରାରୋପଣ ସହ ସେଗୁଡିକର ଅମଳ, ପ୍ରକ୍ରିୟାକରଣ, ପ୍ୟାକେଜିଂ, ବିକ୍ରି ଓ ବିପଣନକୁ ଅନୁମତି ମିଳିଛି।
