ମାଲକାନଗିର,୬।୧୨ (ଡି.ଏନ୍.ଏ.)-
ମାଲକାନଗିରି ଜିଲାରେ ଏକମାସରୁ ଊର୍ଦ୍ଧ୍ୱ ହେବ କ୍ରଶର ମିଲଗୁଡିକ ବନ୍ଦ ରହିଛି ା ଫଳରେ ବହୁ ଘରୋଇ କାର୍ଯ୍ୟ ଏବଂ ଉନ୍ନୟନ କାର୍ଯ୍ୟ ବନ୍ଦ ହୋଇଯାଇଛି। ଏନେଇ ଠକାଦାରମାନେ ଅଭିଯୋଗ କରି ବିଭାଗୀୟ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିଛନ୍ତି। ରାସ୍ତା ଓ ଗୃହ ନିର୍ମାଣ ବିଭାଗର ଆର୍ସିପିଏଲ୍ ରାସ୍ତା ନିର୍ମାଣ, ଗ୍ରାମ୍ୟ ଉନ୍ନୟନ ରାସ୍ତା ନିର୍ମାଣ, ପ୍ରଧାନମନ୍ତ୍ରୀ ଗ୍ରାମ ସଡକ ଯୋଜନାର କାର୍ଯ୍ୟ, ସମନ୍ବିତ ଆଦିବାସୀ ଉନ୍ନୟନ ସଂସ୍ଥା, ଜଳସମ୍ପଦ ବିଭାଗ ସହ କୋଠା ନିର୍ମାଣ ପାଇଁ ହେଉଥିବା କାର୍ଯ୍ୟଗୁଡିକ ଚିପ୍ସ ଓ ମେଟାଲ ଅଭାବରୁ ବନ୍ଦ ହୋଇଯାଇଛି। ଦେଢ ମାସ ହେବ ଜିଲାର ଗୋଟିଏ କିମ୍ବା ଦୁଇଟି କ୍ରଶରକୁ ବ୍ଲାଷ୍ଟିଂ ଓ ମେଟାଲ ସପ୍ଲାଇ ପାଇଁ ଅନୁମତି ମିଳିଥିବା ବେଳେ ପ୍ରାୟ ୧୨ଟି କ୍ରଶରକୁ ଏଯାଏ ଅନୁମତି ମିଳିନାହିଁ। ଜିଲା ପ୍ରଶାସନ ପକ୍ଷରୁ ଗ୍ରୀନ୍ ଟ୍ରିବ୍ୟୁନାଲ ଦ୍ୱାରା ଧାର୍ଯ୍ୟ ନୀତିନିୟମ ଅନୁଯାୟୀ କ୍ରଶର ଚଲାଇବାକୁ ସମସ୍ତ କାଗଜପତ୍ର ଯାଞ୍ଚ ଚାଲିଥିବାରୁ କ୍ରଶରଗୁଡିକ ଚାଲିବାକୁ ଅନୁମତି ପ୍ରଦାନ କରାଯାଉ ନ ଥିବା ଜଣାପଡଛି। ଅନ୍ୟପକ୍ଷରେ ଏହା ଜାରି ରହିଲେ ଆସନ୍ତା ମାର୍ଚ୍ଚ ସୁଦ୍ଧା ଉନ୍ନୟନ ବିଭାଗ କାର୍ଯ୍ୟ ଶେଷ ନେଇ ଯେଉଁ ଲକ୍ଷ୍ୟ ଧାର୍ଯ୍ୟ କରାଯାଇଛି ତାହା ସଫଳ ହେବା ନେଇ ଆଶଙ୍କା ପ୍ରକାଶ ପାଇଛି। କ୍ରଶର ବନ୍ଦ ଯୋଗୁ ଜିଲାରେ ଆବାସ ଯୋଜନାରେ ଗୃହ ନିର୍ମାଣ ମଧ୍ୟ ବନ୍ଦ ରହିଛି। ତେବେ ଜିଲା ପ୍ରଶାସନ ପକ୍ଷରୁ କ୍ରଶର ମାଲିକମାନଙ୍କୁ ଡକାଇ କ୍ରଶର ପରିଚାଳନା ଲାଗି ଜରୁରୀ କାଗଜପତ୍ର ଦାଖଲ କରିବାକୁ କୁହାଯାଇଥିବା ଜଣାପଡିଛି।
