ସାମାନ୍ୟ କଥାକୁ ନେଇ ମଧ୍ୟ ବେଳେ ବେଳେ ଦାମ୍ପତ୍ୟ ଜୀବନରେ ଝଡ଼ ଆସିଥାଏ। ପରିଶେଷରେ ଏହି ଝଡ଼ ଉଗ୍ର ରୂପ ଧାରଣ କରିଥାଏ। ଏପରିକି ବିଚ୍ଛେଦ ପର୍ଯ୍ୟନ୍ତ ମଧ୍ୟ କଥା ଯାଇଥାଏ। ମାତ୍ର ସମ୍ପର୍କକୁ ସୁଦୃଢ଼ କରିବା କୌଣସି ଯାଦୁଗରି କଥା ନାହିଁ। କିଛି ଛୋଟ କଥା ପ୍ରତି ଗୁରୁତ୍ୱ ଦେଲେ ଦାମ୍ପତ୍ୟ ଜୀବନ ମଧୁମୟ ହୋଇଥାଏ। ଜାଣନ୍ତୁ ଏ ସମ୍ପର୍କରେ…
ପରସ୍ପରକୁ ହସାଇବା ଲାଗି ଚେଷ୍ଟା କରନ୍ତୁ
ଦୁହେଁ ଦୁହିଁଙ୍କ ସହ ଖୁବ୍ ମନ ଖୋଲା ହସ ହସନ୍ତୁ। କାରଣ ହସିବା ଦ୍ୱାରା ଶରୀରରେ ଅକ୍ସିଟୋସିନ୍ ନାମକ ହର୍ମୋନ ସୃଷ୍ଟି ହୋଇଥାଏ। ଯାହା ମନୋବଳକୁ ଦୃଢ଼ କରିଥାଏ। ସବୁବେଳେ ହସୁଥିବା ଦମ୍ପତି ବହୁତ ସୁଖୀ ହୋଇଥାନ୍ତି। ଏପରି ଲୋକମାନେ ହସିବା ଏବଂ ହସାଇବା ଦ୍ୱାରା ଜୀବନର ଅନେକ ଅସୁବିଧାକୁ ସହଜରେ ସାମ୍ନା କରିବାରେ ସକ୍ଷମ ହୋଇଥାନ୍ତି। ଏପରି କଲେ ସମ୍ପର୍କ ଦୀର୍ଘସ୍ଥାୟୀ ହେବ।
ପରସ୍ପର ପ୍ରତି ସମ୍ବେଦନଶୀଳ ହୁଅନ୍ତୁ:
ସମ୍ପର୍କକୁ ଉପଭୋଗ କରିବାକୁ ହେଲେ ପରସ୍ପର ପ୍ରତି ସମ୍ବେଦନଶୀଳ ହେବା ନିହାତି ଜରୁରୀ। ପ୍ରତ୍ୟେକ ମୁହୂର୍ତ୍ତକୁ ଏକାଠି ଉପଭୋଗ କରନ୍ତୁ। ଯଦି ସାଥୀଙ୍କ ସହିତ ଖୋଲା ଜୀବନ ବିତାଇବ ନାହିଁ ତେବେ ସମ୍ପର୍କ ଦୀର୍ଘସ୍ଥାୟୀ ହୋଇପାରିବ ନାହିଁ। ତେଣୁ ପ୍ରତ୍ୟେକ ମୁହୂର୍ତ୍ତକୁ ଉପଭୋଗ କରନ୍ତୁ। ଭୟ, ଆନନ୍ଦ ଏବଂ ଚାପ ବିଷୟରେ ପରସ୍ପର ସହିତ କଥାବାର୍ତ୍ତା କରନ୍ତୁ। ଏହା ସମ୍ପର୍କକୁ ଆହୁରି ମଜଭୁତ କରିବ।
କୌଣସି କଥା ସାଥୀଙ୍କୁ ଲୁଚାନ୍ତୁ ନାହିଁ:
ସାଥୀଙ୍କୁ କୌଣସି କଥା ଲୁଚାଇବା ଆଦୌ ଠିକ୍ ନୁହେଁ। ଏହା ପରବର୍ତ୍ତୀ ସମୟରେ ସମ୍ପର୍କରେ ଫାଟ ସୃଷ୍ଟି କରିପାରେ। ବିଶେଷକରି ଯଦି ତୁମେ କିଛି କଥା ଜାଣିଛ ହେଲେ ସାଥୀଙ୍କୁ କହିନାହଁ; ସେ ପରବର୍ତ୍ତୀ ସମୟରେ ଅନ୍ୟ କାହାଠାରୁ ଜାଣିବାକୁ ପାଇଲେ। ତେବେ ତୁମ ଉପରୁ ତାଙ୍କର ବିଶ୍ୱାସ ତୁଟିଯିବାର ସମ୍ଭାବନା ଥାଏ। ଟଙ୍କା, ସମ୍ପର୍କୀୟ କିମ୍ବା ଘରର ଅନ୍ୟ କୌଣସି ସଦସ୍ୟ ତୁମକୁ ହଇରାଣ କରୁଛନ୍ତି ସେ ବିଷୟରେ ସାଥୀଙ୍କ ସହ ଶେୟାର କରନ୍ତୁ। ସେ ତୁମକୁ ଏ ବିଷୟରେ କିଛି ଉତ୍ତମ ପରାମର୍ଶ ଦେଇପାରନ୍ତି। ଯାହାକି ସୁଖୀ ଦାମ୍ପତ୍ୟ ଜୀବନରେ ସହାୟକ ହେବ।
ସାଥୀଙ୍କୁ କହିବାକୁ ସୁଯୋଗ ଦିଅନ୍ତୁ:
ସମସ୍ତେ ଚାହାନ୍ତି ଯେ, ସେମାନେ ନିଜ କଥାକୁ ଖୋଲାଖୋଲି ଭାବରେ କହିବାକୁ ସମର୍ଥ ହୁଅନ୍ତୁ। ଖାଲି ନିଜ କଥା କହିଲେ ହେବ ନାହିଁ, ସାଥୀଙ୍କୁ ବି ଏହି ବିଷୟରେ କଥାବାର୍ତ୍ତା କରିବାକୁ ପୂର୍ଣ୍ଣ ସୁଯୋଗ ଦିଅନ୍ତୁ।
ପରସ୍ପରକୁ ସମ୍ମାନ କରନ୍ତୁ:
ସମ୍ପର୍କକୁ ଦୀର୍ଘସ୍ଥାୟୀ କରିବା ପାଇଁ ପରସ୍ପରକୁ ସମ୍ମାନ କରନ୍ତୁ। ସାଥୀଙ୍କ ସ୍ବପ୍ନକୁ ସମର୍ଥନ କରନ୍ତୁ। କୌଣସି ମତଭେଦ ହୋଇଥିଲେ ଆପୋଷ ସମାଧାନ କରି ନିଜର ଦୋଷକୁ ସ୍ବୀକାର କରନ୍ତୁ। ଏହା ଦ୍ୱାରା ସମ୍ପର୍କ ମଧୁମୟ ହୋଇଉଠିବ।
