ଖୋର୍ଦ୍ଧା ଅଫିସ,୪ା୯:ନବନିର୍ମାଣ କୃଷକ ସଙ୍ଗଠନ ପକ୍ଷରୁ ଖୋର୍ଦ୍ଧାର ମଙ୍ଗଳା ମଣ୍ଡପଠାରେ ଜିଲାସ୍ତରୀୟ ବୈଠକ ମଙ୍ଗଳବାର ଅନୁଷ୍ଠିତ ହୋଇଯାଇଛି। ଜିଲା ସଭାପତି ସୁରେଶ ମାନସିଂଙ୍କ ନେତୃତ୍ୱରେ ଅନୁଷ୍ଠିତ ସଭାରେ ସଙ୍ଗଠନର ରାଜ୍ୟ ସଂଯୋଜକ ଶେଷଦେବ ନନ୍ଦ, ମନୱର ଅଲ୍ଲି, ଚାଷୀ ନେତା ରମେଶ ସ୍ବାଇଁ, ଜୟନ୍ତ ତ୍ରିପାଠୀ, ହାଡିବନ୍ଧୁ ମହାରଣା, ନିରଞ୍ଜନ ପ୍ରଧାନ ପ୍ରମୁଖ ଯୋଗଦେଇ କହିଥିଲେ କାଳିଆ ଯୋଜନାରେ ରାଜନୀତି ଚାଲିଛି। ଯୋଜନା ହେଲା ଚାଷୀଙ୍କ ନଁାରେ, ଫାଇଦା ନେଲେ ରାଜନୈତିକ ଦଳର କର୍ମୀ। ନିର୍ବାଚନ ପୂର୍ବରୁ ଭୋଟ ଲାଗି କାଳିଆ ଯୋଜନାରେ ଆଖିବୁଜା ହିତାଧିକାରୀଙ୍କ ତାଲିକା ପ୍ରସ୍ତୁତ କରାଗଲା। ଯୋଗ୍ୟ ଅଯୋଗ୍ୟ ଖୋଜା ଗଲାନି। ସମସ୍ତଙ୍କୁ ୫ ହଜାର ଟଙ୍କା ଦିଆଗଲା। ତେବେ ଯୋଗ୍ୟ ପାଇଲେନି, ଅଯୋଗ୍ୟ ନେଇଗଲେ ମଧ୍ୟ ସରକାର ହାତ ଟେକି ଦେଲେ। ବିରୋଧୀ ଦଳ ବାରମ୍ବାର ଅନିୟମିତତା ନେଇ ପ୍ରଶ୍ନ ଉଠାଇଲେ ମଧ୍ୟ ସରକାର ଶୁଣିଲେନି। ସରକାର ଚାଷୀଙ୍କ ଜୀବନଜୀବିକା ସହ ଖେଳିଲେ। ଭୋଟ ଶେଷ ପରେ ସରକାର ସେହି ଅଯୋଗ୍ୟ ହିତାଧିକାରୀଙ୍କୁ ଚିହ୍ନଟ କରି ବାଦ୍ ଦେଲେ। ତେବେ ଅଯୋଗ୍ୟ ହିତାଧିକାରୀଙ୍କୁ ବାଦ୍ ଦେବାକୁ ନବ ନିର୍ମାଣ କୃଷକ ସଙ୍ଗଠନ ସ୍ବାଗତ କରିଛି। କିନ୍ତୁ ଅଯୋଗ୍ୟ ନଁାରେ ଯୋଗ୍ୟ ହିତାଧିକାରୀଙ୍କୁ ବାଦ୍ ଦେବା ଠିକ୍ ନୁହେଁ। ଯାହାକି ଚାଷୀ ଆନ୍ଦୋଳନ ପାଇଁ ପ୍ରୋତ୍ସାହନ ଯୋଗାଇ ଚାଲିଛି। ଏଭଳିସ୍ଥଳେ ଯୋଗ୍ୟ ହିତାଧିକାରୀଙ୍କୁ ବାଦ୍ ଦେଉଥିବା କର୍ମଚାରୀଙ୍କୁ ଦଣ୍ଡବିଧାନ କରାଯାଉ। ବାଦ୍ ପଡିଥିବା ଯୋଗ୍ୟ ହିତାଧିକାରୀଙ୍କୁ ଚିହ୍ନଟ କରି କାଳିଆ ଯୋଜନା ଅର୍ଥ ଦିଆଯାଉ। ସେହିପରି ଚାଷୀଙ୍କ ପ୍ରସ୍ତାବଗୁଡିକୁ ଶୀଘ୍ର କେନ୍ଦ୍ର ସରକାରଙ୍କୁ ରାଜ୍ୟ ସରକାର ପ୍ରଦାନ କରନ୍ତୁ ବୋଲି ଦାବି କରାଯାଇଛି। ଅପରପକ୍ଷେ କାଳିଆ ଯୋଜନାର ଅନିୟମିତତାକୁ ନେଇ ସେପ୍ଟେମ୍ବର ୨୦ରେ ଖୋର୍ଦ୍ଧା ଜିଲାପାଳଙ୍କ କାର୍ଯ୍ୟାଳୟ ଘେରାଉ କରାଯିବ। ସେହିପରି ନଭେମ୍ବର ୬ରେ ବରମୁଣ୍ଡାରେ ସର୍ବଭାରତୀୟ ସମ୍ମିଳନୀ ହେବ। ଏଥିପାଇଁ ଗଁା ଓ ସହରରୁ ପାଣ୍ଠି ସଂଗ୍ରହ କରାଯିବା ସହ ସମ୍ମିଳନୀ ଏବଂ ଆନ୍ଦୋଳନକୁ ସଫଳ କରିବାକୁ ସମସ୍ତଙ୍କର ସହଯୋଗ ଲୋଡା ଯାଇଛି।
