କର୍ଲାମୁଣ୍ଡା, ୧୧।୧୧(ଡି.ଏନ୍.ଏ.)-
ସରକାର ଅଙ୍ଗନଓ୍ବାଡି କେନ୍ଦ୍ର ଜରିଆନେ ଜନସାଧାରନକୁଁ ଭିନେ ଭିନେ ସେବା ଯୁଗେଇ ଦେଉଛନ୍। ସେଥିରଲାଗି କେନ୍ଦ୍ରରେ ଝନେ କରମୀ ଆର ସହାୟିକାକୁଁ ନିଯୁକ୍ତ କରିଛନ୍। ହେଲେ ଅନେକ ଜାଗାରେ ଭିତିଭୂମି ଅଭାବୁ ସରକାରକଁର ଇ ମହତ୍ ଯୋଜନା ବାଟ୍ବନା ହେଉଛେ। ଏନ୍ତା ଉଦାହରନ୍ ଦେଖ୍ବାକେ ମିଲିଛେ କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକରେ।
ସୂଚନା ଅନ୍ସାରେ କର୍ଲାମୁଣ୍ଡା ବ୍ଲକର ୧୨ଟା ପଁଚେତ୍ରେ ମୋଟ ୭୪ଟା ଅଙ୍ଗନଓ୍ବାଡି କେନ୍ଦ୍ର ରହିଛେ। ସେ ଭିତରୁ ବିଜାପାଟି, ରିଞ୍ଜା(ଧରଣୀପଡ଼ା), ବାଗବୁରାଇ, ଝାରମୁଣ୍ଡା ପରମୁଖ ଗଁାରେ ଅଙ୍ଗନଓ୍ବାଡି କେନ୍ଦ୍ରର ଘର ତିଆର ହେଇ ନାଇଁପାରବାର। ସେନ୍ତା କର୍ଲାମୁଣ୍ଡା (ବସ୍ତି), ଗୋଇନ୍ଦମୁଣ୍ଡା, ଫଲସାପଡ଼ା, ଝିଲାପିପଡ଼ା, ତେରେକେଲା, କୁଶୁର୍ଲା(୧), ଏକାତରା ଆର ରେଙ୍ଗାଲି କେନ୍ଦ୍ରର ଘର ଦରଖଁଡ଼ିଆ ହେଇ ପଡ଼ିଛେ। ଇଆଡ଼େ ଭଟାପଲା, ସାପଲହରା, ବୋରପଦର, ସାନଡୁଙ୍ଗୁରୀଗୁଡ଼ାରେ ଥିବାର ଅଙ୍ଗନଓ୍ବାଡି କେନ୍ଦ୍ରମାନ ବିପଦ୍ ଅବସ୍ତାରେ ରହିଛେ। ସେନ୍ତା ବ୍ଲକର ଡଙ୍ଗରମୁଣ୍ଡା, ସାଲେପାଲି, ସିଆଲପଲା, ଟିକିରାପଡ଼ା, ଭଟାପଲା(ଧରଣୀପଡ଼ା), ସରଦାପୁର, କେର୍ଣ୍ଣାପଲା, ଭୀମଖୋଜପଡ଼ାରେ ନୂତନ ଅଙ୍ଗନଓ୍ବାଡି କେନ୍ଦ୍ର ଦରକାର ଥିଲାବେଲେ ପରଶାସନ ତରଫୁ କେହେନ୍ସି ପରକାର ପଦକ୍ଷେପ ନାଇଁ ନିଆଯିବାର। ଯେନ୍ଥିରଲାଗି ଇ ଗଁାମାନକର ଜନସାଧାରନ ଅନେକ ସୁବିଧା ସୁଯୋଗରୁ ବଁଚିତ ହେଉଛନ୍। ଇ ବାବ୍ଦେ ଥାନୀଅ ସିଡିପିଓ ପାର୍ବତୀ ସାହୁକୁଁ ପଚରାଲାରୁ ଅଙ୍ଗନଓ୍ବାଡି କେନ୍ଦ୍ରର ଘର ତିଆରି କାମ ଶେଷ ନାଇଁପାରବାର। ସେଥିରଲାଗି କେତେ ଜାଗାରେ ପାସର ସ୍କୁଲମାନକେ ଅଙ୍ଗଓ୍ବାଡି କେନ୍ଦ୍ର ଚାଲୁଛେ ବଲି ସେ କହିଥିଲେ। ସୂଚନା ହିସାବେ ପଁଚେତ୍ ସମିତି ଜରିଆରେ ଅଙ୍ଗନଓ୍ବାଡି କେନ୍ଦ୍ର ଘର ତିଆରି କରାଯାଉଛେ। ହେଲେ ଦାଇତିଅରେ ଥିବାର ଯନ୍ତ୍ରୀମାନକର ଅଁାତରିକତା ଅଭାବ ସଂଗେ ପିସି କାରବାର ଲାଗି ଅନେକ କେନ୍ଦ୍ରର ତିଆରି କାମ୍ ସରି ନାଇଁ ପାରବାର ବଲି ଝନେ ଠିକାଦାର ନିଜର ନାଁ ଗୁପତ୍ ରଖି କହିଛନ୍। ଇ ବାବ୍ଦେ ମତାମତ ଲାଗି ଥାନୀଅ ବିଡିଓ ପ୍ରିୟଦର୍ଶନୀ ମିର୍ଦ୍ଧାକୁଁ ମୋବାଇଲ ଫୋନ୍ରେ ଯୋଗାଯୋଗ କରାଯାଇଥିଲେ ବି ଯୋଗାଯୋଗ ସମ୍ଭବ ନାଇଁ ହେଇପାରି।
