ଜାକର୍ତ୍ତା,୨୯।୫: କରୋନା ମହାମାରୀ ଏବେ ସାରା ବିଶ୍ୱରେ ଚିନ୍ତା ବଢାଇ ଚାଲିଥିବା ବେଳେ ଏବେ ଏଥିରୁ ମୁକ୍ତି ପାଇବାକୁ ସମସ୍ତେ ଚେଷ୍ଟା ଜାରି ରଖିଛନ୍ତି। ନିକଟରେ କରୋନା ଭାଇରସକୁ ନେଇ ଦେଇଥିବା ମନ୍ତବ୍ୟକୁ ନେଇ ଇଣ୍ଡୋସେନିଆର ସିକ୍ୟୁରିଟି ମନ୍ତ୍ରୀ ମହମ୍ମଦ ମହଫୁଦ ଏମ୍ଡି ବିବାଦ ଘେରକୁ ଚାଲି ଆସିଛନ୍ତି। ସେ କରୋନା ଭାଇରସକୁ ପତ୍ନୀ ସହ ତୁଳନା କରିଥିବାରୁ ବିବାଦ ମୁଣ୍ଡ ଟେକିଛି। କୁହାଯାଉଛି କି କରୋନାକୁ ନେଇ ଲୋକଙ୍କ ମନରୁ ଭୟ ଦୂର କରିବାକୁ ସେ ଏପରି କହିଥିବା ବେଳେ ଏବେ ଏହାକୁ ଇଣ୍ଡୋନେସିଆର କେତେକ ମହିଳା ସଙ୍ଗଠନ ଓ ସୋସିଆଲ ମିଡିଆ ୟୁଜର୍ସ ବିରୋଧ କରିଛନ୍ତି। ସେ ଅନ୍ଲାଇନରେ ଏକ ସମ୍ବୋଧନ ଦେବା ସମୟରେ ଏହା କହିଥିବା ଜଣାପଡିଛି। ସେ କହିଥିଲେ ଆମକୁ ଏବେ କରୋନା ଭାଇରସ ସହ ବଞ୍ଚିବାକୁ ପଡିବ ସେଥିପାଇଁ ଆମେ ଆମ ସ୍ବାସ୍ଥ୍ୟ ଉପରେ ବିଶେଷ ଧ୍ୟାନ ଦେବା ଦରକାର। ସେ ତାଙ୍କର ଜଣେ ବନ୍ଧୁଙ୍କର ମଜାଳିଆ ଉକ୍ତିର ଉଦାହରଣ ଦେଇ କହିଥିଲେ, କରୋନା ହେଉଛି ଆପଣଙ୍କ ପତ୍ନୀ ସଦୃଶ। ଆରମ୍ଭରୁ ଆପଣ ଏହାକୁ ନିୟନ୍ତ୍ରଣ କରିବାକୁ ଚେଷ୍ଟା କରୁଛନ୍ତି। ଆଉ ପରେ ଏହାସହ ମିଶି ବଞ୍ଚିବା ଶିଖି ଯିବେ। ତେଣୁ ଆମକୁ କରୋନା ସହ ମିଶି ବଞ୍ଚିବା ଶିଖିବାକୁ ପଡିବ।
