ଢେଙ୍କାନାଳ ଅଫିସ,୨୯ା୧୨ – ଢେଙ୍କାନାଳର କଳାପରିଷଦ ଅନୁଷ୍ଠାନ ପକ୍ଷରୁ ୩୯ତମ ବାର୍ଷିକ ଉତ୍ସବ ଅବସରରେ ସ୍ଥାନୀୟ ମିନି ଷ୍ଟାଡିୟମ ଗଜଲକ୍ଷ୍ମୀ କଳାମଣ୍ଡପଠାରେ ଚାଲିଥିବା ଜାତୀୟ ବହୁଭାଷୀ କପିଳାସ ନାଟ୍ୟ ମହୋତ୍ସବର ଶନିବାର ଚତୁର୍ଥ ସନ୍ଧ୍ୟାରେ ନୂଆଦିଲ୍ଲୀର ଡ୍ରାମାଟୋଲୋଜୀ ଥିଏଟର ଗ୍ରୁପ୍ ଦ୍ୱାରା ହିନ୍ଦୀ ନାଟକ ‘କାହାନୀ ଏକ୍ କଂସ୍ କୀ’ ମଞ୍ଚସ୍ଥ ହୋଇଥିଲା। ନାଟକର ନାଟ୍ୟକାର ଥିଲେ ଡିପି ସିହ୍ନା ଓ ନିର୍ଦ୍ଦେଶନା ଦେଇଥିଲେ ସୁନୀଲ ଚୌହ୍ବାନ। ବିଡ଼ମ୍ବିତ ଶୈଶବର ଅକୁହା କଥା ବଖାଣିଥିଲା ନାଟକ ‘କାହାନୀ ଏକ୍ କଂସ୍ କୀ’ । ପୁରାଣ ପୃଷ୍ଠାକୁ ଅବଲୋକନ କଲେ ପ୍ରତ୍ୟେକ ଭାରତୀୟ ଜାଣନ୍ତି ଯେ ମଥୁରାର ରାଜା କଂସ ଜଣେ ଉଗ୍ର ଓ ଖଳ ପ୍ରକୃତିର ରାଜା ଥିଲେ। ତାଙ୍କ ରାଜତ୍ୱ ଥିଲା ଏକ ଚ୍ଛତ୍ରବାଦ। କିନ୍ତୁ ନାଟକରେ ଦର୍ଶାଯାଇଛି ଯେ, ଶୈଶବରୁ କଂସ ଜଣେ ଭଲ ରାଜକୁମାର ଥିଲେ। ବହୁ ଦୟାଳୁ ମଧ୍ୟ ଥିଲେ। ନିଜ ଭଉଣୀ ଦେବକୀଙ୍କୁ ସେ ଅତି ଭଲ ପାଉଥିଲେ। ଏପରିକି ପିଲାମାନେ ଦେବକୀଙ୍କ କଣ୍ଢେଇ ନଦୀରେ ପଡିଯିବାରୁ ସେ ନଦୀକୁ ଡେଇଁ କଣ୍ଢେଇଟିକୁ ଆଣିଥିଲେ। କିନ୍ତୁ ଶୈଶବ ଅବସ୍ଥାରେ ତାଙ୍କୁ ରାଜା ହେବାର ସ୍ବପ୍ନ ଦେଖାଇ ଦିଆଗଲା। ଯେତେବେଳେ ସେ ବଡହେଲେ ସେ ଜାଣିବାକୁ ପାଇଲେ ଯେ, ଦେବକୀଙ୍କ ଗର୍ଭର ୮ମ ସନ୍ତାନ ହିଁ ତାଙ୍କ ମୃତ୍ୟୁର କାରଣ ହେବ। ଏହିସବୁ କଥା ତାଙ୍କୁ ଅତ୍ୟନ୍ତ ବିଚଳିତ କରିଥିଲା। ତାଙ୍କ ପିତା ତାଙ୍କୁ ରାଜା କରିବା ପାଇଁ ଚାହିଁଥିଲେ। ଶୈଶବରୁ ଜଣେ ଶାନ୍ତ ଓ ଦୟାଳୁ ଭାବ ଥିବା ଜଣେ ଶିଶୁ ଧୀରେ ଧୀରେ ବଡ ହେଉଥିବା ବେଳେ ତାଙ୍କ ଉପରେ ଏହିସବୁ ମାନସିକତା ଲଦିଦେବା ଯୋଗୁ ତାଙ୍କର ଶୈଶବ ବିଡମ୍ବିତ ହେବାରେ ଲାଗିଲା। ବଡହେବା ପରେ କଂସ କିଭଳି ରାଜା ହୋଇଥିଲେ ତାହାହିଁ ବଖାଣିଛି ନାଟକ ‘କାହାନୀ ଏକ୍ କଂସ୍ କୀ’। କୌଣସି ଶିଶୁକୁ ତାର ଶୈଶବରେ ନିଜ ଭିତରେ ଥିବା ଇଚ୍ଛାଶକ୍ତି ଓ ମାନସିକତାକୁ ବଦଳାଇ ତାଙ୍କ ଉପରେ ଅନ୍ୟ କୌଣସି ଚାପ ପକାଇଲେ ଭବିଷ୍ୟତରେ ଏହାର ପରିଣତି ଭୟାବହ ହୁଏ ବୋଲି ନାଟକର ସାରାଂଶରେ ଦର୍ଶାଯାଇଛି। ଏହି ନାଟକରେ ବିଭିନ୍ନ ଭୂମିକାରେ ଶତିନ୍ଦ୍ର ଯାଦବ, ସେହେଲା ଖାନ, ଗୌରବ ରାୟ, କ୍ରିଷ୍ଣା ଦାସ, ଦେବେଶ ଯାଦବ, ଶିଖର ମିଶ୍ର, ସାକ୍ଷୀ ଶର୍ମା, ରାନୁ ଶର୍ମା, ନିଶାନ୍ତ ଶୁକ୍ଲା, ହାରି କଶ୍ୟପ, ସଞ୍ଜୟ, ଅଜୟ ମୋସ୍ତି, ରୋଜିତ ଚୌଧୁରୀ, ତାଉବ୍ ଖାନ, ଅଙ୍କିତ, ଭୁଙ୍କଲ, ଅଭିଷେକ, ଅଙ୍କିତ ଗିରି ପ୍ରମୁଖ ଅଭିନୟ କରିଥିଲେ। ସଙ୍ଗୀତ ନିର୍ଦ୍ଦେଶନା ଦେଇଥିଲେ ଦେବଙ୍ଗ ପ୍ରତାପ ସିଂହ। ଆଲୋକ ସଜାଇଥିଲେ ସୁନୀଲ ଚୌହ୍ବାନ। ମେକପ୍ ସୋନାଲ ଓ ମନୀଷା ଏବଂ ମଞ୍ଚସଜ୍ଜା କରିଥିଲେ ଶିଖର ମିଶ୍ର । ପ୍ରାରମ୍ଭରେ ଆୟୋଜିତ ସଭାରେ ଶିଳ୍ପପତି ଗଙ୍ଗାଧର ସାମଲ ମୁଖ୍ୟ ଅତିଥି ଓ ଓଡ଼ିଶା ଲେଖିକା ସଂସଦ ସଭାପତି ପ୍ରଭା ପଟ୍ଟନାୟକ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ। କଳାପରିଷଦ ସଭାପତି ଦିଲ୍ଲୀଶ୍ୱର ମହାରଣା ଉତ୍ସବରେ ଅଧ୍ୟକ୍ଷତା କରିଥିଲେ। ଇନ୍ଦ୍ରମଣି ବେହେରା ଧନ୍ୟବାଦ ପ୍ରଦାନ କରିଥିଲେ। କାର୍ଯ୍ୟକ୍ରମକୁ ଅବନୀ ମିଶ୍ର ସଂଯୋଜନା କରିଥିଲେ। ରବିବାର ଉଦ୍ଯାପନୀ ସନ୍ଧ୍ୟାରେ କଲିକତାର ବିଭବ ନାଟ୍ୟ ଏକାଡେମୀ ପକ୍ଷରୁ ବଙ୍ଗଳା ନାଟକ ‘ଚରନ୍ ଏ ସୋମୋୟେ’ ମଞ୍ଚସ୍ଥ ହେବ ।
