ଅହମ୍ମଦାବାଦ: ବଲିଉଡ୍ ଗାୟକ ମହମ୍ମଦ ରଫିଙ୍କ ଗୀତ ଶୁଣିବାକୁ ପ୍ରାୟ ସମସ୍ତେ ପସନ୍ଦ କରୁଥିବା ବେଳେ ଏବେବି ତାଙ୍କ ଗୀତ ମତୁଆଲା କରେ ଶ୍ରୋତାଙ୍କୁ। ରଫିଙ୍କ ଗୀତର ଅନେକ ଦିଓ୍ବାନା ରହିଛନ୍ତି। ହେଲେ ଗୁଜରାଟ ଅହମ୍ମଦାବାଦରେ ଏମିତି ଜଣେ ଭକ୍ତ ଅଛନ୍ତି ଯାହାଙ୍କ କଥା ଶୁଣିଲେ ଯେ କେହି କିଛି ସମୟ ପାଇଁ ନିରବ ହୋଇଯାଆନ୍ତି। କାହିଁକି ନା ସେ ରଫି ସାହେବଙ୍କୁ ଭଗବାନ ଭଳି ପୂଜା କରନ୍ତି। ସାରା ବିଶ୍ୱରେ ମହମ୍ମଦ ରଫିଙ୍କର ଏକମାତ୍ର ମନ୍ଦିର ରହିଛି ଅହମ୍ମଦାବାର ଉମେଶ ମାଖିଜାଙ୍କ ଘରେ। ସେ ତାଙ୍କ ଘରର ଏକ କୋଠରୀକୁ ସମ୍ପୂର୍ଣ୍ଣ ଭାବେ ରଫିଙ୍କ ନାଁରେ କରିଦେଇଛନ୍ତି। ସେହି କୋଠରୀରେ ରଫିଙ୍କ ଫଟୋ ସହ କିଛି ପେଣ୍ଟିଂ, ରଫି ବ୍ୟବହାର କରୁଥିବା କିଛି ଜିନିଷ ଯେମିତି ଗୋଲଡେନ୍ କଲରର ଏକ କଲମ, ତାଙ୍କ ଚାଦଣ ଆଦି ସଂରକ୍ଷିତ ହୋଇ ରହିଛି। ସାରା ଦେଶରୁ ଅନେକ ରଫିଙ୍କ ପ୍ରଶଂସକ ଏହି ମନ୍ଦିରକୁ ବୁଲିବାକୁ ଆସନ୍ତି। ଉମେଶ ପ୍ରତିଦିନ ସେଠାରେ ରଫିଙ୍କ ଫଟୋକୁ ପୂଜା କରୁଥିବାରୁ ଏହା ରଫିଙ୍କର ଏକମାତ୍ର ମନ୍ଦିର ବୋଲି କୁହାଯାଏ।
କେବଳ ସେତିକି ନୁହେଁ ସବୁଠାରୁ ବଡ କଥା ହେଲା ସେଠାରେ ଲାଗିଥିବା ଘଣ୍ଟା ୧୦ଟା ୨୯ରେ ବନ୍ଦ ରହିଛି। କାରଣ ଏହି ସମୟରେ ୩୧ ଜୁଲାଇ, ୧୯୮୦ରେ ରଫିଙ୍କର ପରଲୋକ ହୋଇଥିଲା। ପ୍ରତି ରବିବାର ଦିନ ୨ଟାରୁ ୫ଟା ପର୍ଯ୍ୟନ୍ତ ଯେ କହି ଉମେଶଙ୍କ ଦ୍ୱାରା ତିଆରି କରାଯାଇଥିବା ରଫିଙ୍କର ଏହି ମନ୍ଦିରକୁ ଆସିବା ସହ ତାଙ୍କ ସୁମଧୁର କଣ୍ଠର ଗୀତ ଶୁଣିବା ଓ ରଫିଙ୍କ ବିଷୟରେ କଥା ହୋଇପାରିବାର ସୁବିଧା ରହିଛି।
