ରୂପ୍ସା, ୬।୩(ବାଞ୍ଛାନିଧି ଦେ)-ସେମାନେ ଥିଲେ କଲେଜ ବେଳର ବନ୍ଧୁ। ବିଏ ପାସ୍ ପରେ ଚାକିରି କରିବାକୁ ମନ ବଳାଇଥିଲେ। ମାତ୍ର ପରିବାରର ଅଭାବ, ଅନଟନ ସେମାନଙ୍କୁ ରୋଜଗାର କରିବାକୁ ବାଧ୍ୟ କଲା। ସେମାନେ ପ୍ରଥମେ କଦଳୀ ଚାଷ କରିବାକୁ ସ୍ଥିର କଲେ। ହେଲେ ଏହି ଚାଷରୁ ବେଶି କିଛି ଲାଭ ପାଇଲେ ନାହିଁ। କ୍ଷତି ସହିବା ପରେ ମଧ୍ୟ ନିରାଶ ନ ହୋଇ ମାଛ ଚାଷ କରିବାକୁ ଇଚ୍ଛା କଲେ। ଏବେ ଏହି ମାଛଚାଷରୁ ବର୍ଷକୁ ୩୦ଲକ୍ଷ ଟଙ୍କା ରୋଜଗାର କରିବା ସହ ଶହେରୁ ଊର୍ଦ୍ଧ୍ୱ ପରିବାରକୁ ଆର୍ଥିକ ମାନଦଣ୍ଡ ବୃଦ୍ଧି କରିବାର ରାହା ଦେଖାଇ ଉଦାହରଣ ସୃଷ୍ଟି କରିଛନ୍ତି।
ବାଲେଶ୍ୱର ଜିଲା ସଦର ବ୍ଲକ ରୂପ୍ସା ଥାନା ଅଞ୍ଚଳରେ ଏହି ଦୁଇବନ୍ଧୁ ପ୍ରସନ୍ନ କୁମାର ସାହୁ ଓ ବଂଶୀଧର ପଣ୍ଡାଙ୍କ ଘର। ପ୍ରସନ୍ନଙ୍କ ଘର ପିଞ୍ଛାବଣିଆ ଓ ବଂଶୀଧରଙ୍କ ଘର ତାହାରପୁର ଗ୍ରାମରେ। ଉଭୟେ ୨୦୦୦ମସିହାରେ ନୀଳମଣି କଲେଜରୁ ବିଏ ପାସ୍ କଲେ। ଅଭାବ, ଅନଟନ ଯୋଗୁ ସେମାନଙ୍କୁ ଅର୍ଥ ଚିନ୍ତା ଘାରିଲା। ଚାକିରି ନ ପାଇ ୨୦୦୨ ମସିହାରେ ଲିଜ୍ ସୂତ୍ରରେ ୭ ଏକର ଜମିରେ କଦଳୀ ଚାଷ କରି ଦି ପଇସା ଲାଭ ପାଇଥିଲେ। ମାତ୍ର ୨୦୦୩ରେ ଘୂର୍ଣ୍ଣିଝଡ଼ ଓ କୁଆପଥର ମାଡ଼ ଯୋଗୁ କଦଳୀ ଚାଷରେ ବ୍ୟାପକ କ୍ଷତି ହେଲା। କ୍ଷତିଭରଣା କରି ନ ପାରି ସେମାନେ ନିରାଶ ହେଲେ। ଧାରଉଧାର, କରଜ କରି ୨୦୧୧ରେ ପ୍ରସନ୍ନଙ୍କ ନିଜସ୍ବ ଦେଢ଼ ଏକର ଜମିରେ ମାଛ ଚାଷ ଆରମ୍ଭ ହେଲା। ଲଗାତର ୩ବର୍ଷ ଲାଭବାନ ହେବା ପରେ ଦୁହେଁ ମିଶି ୨୦୧୩ରୁ ‘ଫ୍ରେଣ୍ଡସ୍ ଫିସାରୀ ଫାର୍ମ’ ଗଠନ କରି ୩ ଏକର ପୋଖରୀରେ ମାଛ ଚାଷ କରି ସଫଳତା ପାଇଲେ। ଏକର ପ୍ରତି ୭୦ କୁଇଣ୍ଟାଲ ମାଛ ଆମଦାନି ହେବାରୁ ସେମାନଙ୍କର ଉତ୍ସାହ ଆହୁରି ବଢ଼ିଲା। ୨୦୧୪ରେ ବାଲେଶ୍ୱର ଆଇଟିଆଇ ପଡ଼ିଆରେ ଆୟୋଜିତ କୃଷି ମହୋତ୍ସବରେ ମୁଖ୍ୟମନ୍ତ୍ରୀଙ୍କଠାରୁ ସଫଳ ମାଛଚାଷୀ ଭାବେ ମାନପତ୍ର ଓ ପୁରସ୍କାର ଗ୍ରହଣ କରିଥିଲେ। ୩ଲକ୍ଷ ଟଙ୍କାର ସରକାରୀ ପ୍ରୋତ୍ସାହନ ରାଶି ସେମାନଙ୍କ ମନୋବଳକୁ ସଫଳତାର ଶୀର୍ଷରେ ପହଞ୍ଚାଇଥିଲା। ଏବେ ସେମାନେ ନିଜସ୍ବ ଓ ଲିଜ୍ ସୂତ୍ରରେ ୧୭ ଏକର ପୋଖରୀରେ ଭାକୁର, ରୋହି, ବାହୁଲ, ପଙ୍ଗାସ, ମିଢ଼ ଆଦି ମାଛ ଚାଷ କରୁଛନ୍ତି। ଏଥିସହ ପୋଖରୀ ହୁଡ଼ାରେ କଦଳୀ, ଅମୃତଭଣ୍ଡା, ଭେଣ୍ଡି, ବିଲାତି, ବାଇଗଣ, ଶାଗ ଆଦି ପନିପରିବା ଚାଷକୁ ମଧ୍ୟ ଆଦରିଛନ୍ତି। ଏହି ଫାର୍ମରେ ୫ଜଣ ମଜୁରିଆଙ୍କୁ ରୋଜଗାର ଯୋଗାଇଛନ୍ତି। ପ୍ରସନ୍ନ-ବଂଶୀ କଲିକତା, ଛତିଶଗଡ଼, ଆନ୍ଧ୍ରପ୍ରଦେଶ, ଭୁବନେଶ୍ୱରରେ ଯାଆଁଳ, ମତ୍ସ୍ୟ ଉପତ୍ାଦନ ପାଇଁ ମତ୍ସ୍ୟବିଭାଗ ପକ୍ଷରୁ ଆଧୁନିକ ଜ୍ଞାନକୌଶଳ ଲାଭ ପାଇଁ ପ୍ରଶିକ୍ଷଣ ଗ୍ରହଣ କରିଛନ୍ତି। ଏମାନଙ୍କ ଚାଷ ଶୈଳୀରେ ଅନୁପ୍ରାଣିତ ହୋଇ ପିଞ୍ଛାବଣିଆ ଗ୍ରାମର ୨୫ ପରିବାର ସମେତ ସଦର ବ୍ଲକ ଓ ମୟୂରଭଞ୍ଜ ଅଞ୍ଚଳର ଶହେରୁ ଊର୍ଦ୍ଧ୍ୱ ପରିବାର ଏବେ ୫ଶହ ଏକର ପୋଖରୀରେ ମାଛ ଚାଷ କରି ପରିବାର ପ୍ରତିପୋଷଣ କରୁଛନ୍ତି। ଦୁଇବନ୍ଧୁ ମତ୍ସ୍ୟଚାଷୀମାନଙ୍କୁ ପରାମର୍ଶ ଦେବା ସହ ଔଷଧ, ଦାନା, ଯାଆଁଳ ଯୋଗାଇ ଆସୁଛନ୍ତି।
ପ୍ରସନ୍ନ ଓ ବଂଶୀଙ୍କ କହିବା ଅନୁଯାୟୀ, ଆଧୁନିକ ପ୍ରଣାଳୀରେ ମାଛ ଉପତ୍ାଦନ କରି ଅନ୍ୟ ରାଜ୍ୟ ଓ ଜିଲାକୁ ମାଛ ରପ୍ତାନି କରିବା ଆମର ଲକ୍ଷ୍ୟ। ମତ୍ସ୍ୟଚାଷୀଙ୍କ ପାଇଁ ସରକାର ସ୍ବତନ୍ତ୍ର ବଜାର ସୃଷ୍ଟି କରିବା ସହ ମାଛ ମଣ୍ଡି ଖୋଲିବା ଦିଗରେ ପଦକ୍ଷେପ ନେବା ଉଚିତ। ମତ୍ସ୍ୟ ଅଧିକାରୀ ଓ ବିଭାଗୀୟ ଟେକ୍ନିସିଆନଙ୍କ ଠାରୁ ଅଭିଜ୍ଞତା ହାସଲ କରି ବର୍ଷକୁ ୩୦ଲକ୍ଷ ଟଙ୍କା ରୋଜଗାର କରିପାରୁଛୁ। ପ୍ରତିବର୍ଷ ବିଭାଗ ପକ୍ଷରୁ ଆମ ଫାର୍ମରେ ଅନୁଷ୍ଠିତ କୃଷି ବିଦ୍ୟାଳୟରେ ଜିଲା ଅନ୍ତର୍ଗତ ଶତାଧିକ ଚାଷୀଙ୍କୁ ଆମେ ମାଛଚାଷ ସମ୍ପର୍କରେ ତାଲିମ ଦେଇଆସୁଛୁ। ନିଜର ଆମତ୍ବିଶ୍ୱାସ ଓ ପରିଶ୍ରମ ବଳରେ ଆମେ ଦୁଇବନ୍ଧୁ ସ୍ବାବଲମ୍ବୀ ହୋଇପାରିଛୁ ବୋଲି ସେମାନେ କହିଛନ୍ତି।
