କାର୍ କିମ୍ବା ବସ୍ ଭିତରେ ଏସି ଲାଗିବା ସାଧାରଣ କଥା। କିନ୍ତୁ ଟ୍ରାକ୍ଟରରେ ଏସି, ଶୁଣି ତାଜୁବ ଲାଗିବା ସ୍ବାଭାବିକ। ଏହା କରିଦେଖାଇଛନ୍ତି ଯୁବ ଚାଷୀ ଗୁରଦୀପ ସିଂହ। ଉତ୍ତରପ୍ରଦେଶ ମେରଠର ରାଜପୁରା ଗ୍ରାମର ଗୁରଦୀପ ସିଂହ ଏବେ କମ୍ପ୍ୟୁଟର ସାଇନ୍ସରେ ବିଟେକ୍ କରୁଛନ୍ତି। ପାଠ ପଢ଼ିବା ସହିତ ସେ ଘରର ଚାଷ କାମରେ ମଧ୍ୟ ସାହାଯ୍ୟ କରନ୍ତି। ଚାଷ କାମରେ ଅନେକ ସମୟରେ ତାଙ୍କୁ ଟ୍ରାକ୍ଟର ଚଲାଇବାକୁ ପଡୁଥିଲା। କିନ୍ତୁ ଦ୍ୱି’ପ୍ରହରର ଅତ୍ୟଧିକ ଖରାରେ ବେଶି ସମୟ ବିଲରେ କାମ କରିବା ତାଙ୍କ ପକ୍ଷେ କଷ୍ଟକର ହେଉଥିଲା। ଏହି ସମସ୍ୟାର ସମାଧାନ ପାଇଁ ସେ ଟ୍ରାକ୍ଟରରେ ଏସି ଲଗାଇବାକୁ ଚିନ୍ତା କରିଥିଲେ। ଏ କଥା ସେ ଘର ଲୋକ ଓ ସାଙ୍ଗମାନଙ୍କୁ ଜଣାଇବାରୁ ପ୍ରଥମେ ସମସ୍ତେ ତାଙ୍କୁ ଥଟ୍ଟା କରିଥିଲେ। ହେଲେ ସେ ନିଜ ନିଷ୍ପତ୍ତିରେ ଦୃଢ ରହିଥିଲେ। ଗାଁର ଜଣେ ମିସ୍ତ୍ରୀଙ୍କ ସାହାଯ୍ୟରେ ସେ ନିଜେ ଟ୍ରାକ୍ଟରରେ ଏସି ସେଟିଂ କରିଦେଇଥିଲେ। ଏହାପରେ ବେଶ୍ ସହଜରେ ଖରାରେ ଘଣ୍ଟା ଘଣ୍ଟା କାମ କରୁଛନ୍ତି। ଖରା ଯୋଗୁ ଯେତେବେଳେ ମାତ୍ର ୪ରୁ ୫ ଘଣ୍ଟା ପରିଶ୍ରମ କରିପାରୁଥିଲେ ଏବେ ଏସି ଲଗାଇବା ପରେ ୧୦ରୁ ୧୨ ଘଣ୍ଟା କାମ କରୁଛନ୍ତି। ତେଣୁ ନିଜ ଆବଶ୍ୟକତା ପୁରଣ ପାଇଁ ସେ ଯେଉଁଭଳି ଜ୍ଞାନକୌଶଳ ବ୍ୟବହାର କରିଛନ୍ତି ତାହା ଏବେ ସମସ୍ତଙ୍କ ପାଇଁ ପ୍ରେରଣା ପାଲଟିଛି।
