ହିଂସ୍ରଜନ୍ତୁ ଭରା ଜଙ୍ଗଲ ଭିତରକୁ ଯିବା କଥା କହିଲେ ଭୟରେ ଦେହ ଥରିଉଠେ। କିନ୍ତୁ ଦୀର୍ଘ ୧୯ ବର୍ଷ ହେବ କେରଳର ଡ. ଭିନ୍ସେଟ ଜାଭିିୟର ଏକୁଟିଆ ଜଙ୍ଗଲ ଭିତରେ ଅସହାୟ ଆଦିବାସୀମାନଙ୍କୁ ଚିକିତ୍ସା କରୁଛନ୍ତି। ତାଙ୍କୁ ବର୍ତ୍ତମାନ ବୟସ ୫୫। ସବୁ ଚିକିତ୍ସା ଉପକରଣ ସାଥିରେ ନେଇ ଚାଲିଚାଲି ପାଥାନମ୍ଥିଟ୍ଟା ଜିଲା ସୀତାଥୋଡ଼େ ଗାଁର ଆଦିବାସୀମାନଙ୍କୁ ଚିକିତ୍ସା କରୁଛନ୍ତି। ପାହାଡ଼ ଜଙ୍ଗଲ ଘେରା ଏହି ଗାଁ ବି ଏକ ପଞ୍ଚାୟତ। ସେଠାକୁ ଯିବା ଲାଗି କୌଣସି ସାଧାରଣ ପରିବହନ ବ୍ୟବସ୍ଥା ନାହିଁ। ଭଲ ରାସ୍ତା ବି ନାହିଁ। ଥିରୁଭାନନ୍ତପୁରମ୍ରେ ଥିବା ତାଙ୍କ ସ୍ତ୍ରୀଙ୍କ ଘରକୁ ଯିବା ଅବସରରେ ସୀତାଥୋଡ଼େ ସମ୍ପର୍କରେ ଜାଣିବା ପରେ ସେଠାରେ ଚାକିରି କରିବାକୁ ନିଷ୍ପତ୍ତିି ନେଇଥିଲେ। ଏହି ଗାଁରେ ପ୍ରାଥମିକ ଚିକିତ୍ସା କେନ୍ଦ୍ର ଥିଲେ ବି ଜଙ୍ଗଲୀ ଜନ୍ତୁଙ୍କ ଭୟରେ ସେଠାକୁ କୌଣସିି ଡାକ୍ତର ଯାଉ ନ ଥିଲେ। ହେଲେ ଚାକିରି କରିବା ପେରେ ଭିନ୍ସେଟ ୨୦୦୧ରୁ ସପ୍ତାହକୁ ୨ ଥର ସେହି ଗାଁକୁ ଯାଇ ଫେରିଆସୁଥିଲେ। ୨୦୦୯ରୁ ସେ ସେଠାରେ ଏକ ଭଡ଼ାଘରେ ସପ୍ତାହରେ ଦୁଇଦିନ ରହି ବିଭିନ୍ନ ଜାଗାକୁ ଯାଇ ଚିକିତ୍ସା କରୁଛନ୍ତି। ତାଙ୍କୁ ସ୍ଥାନୀୟ ଲୋକେ ‘ମାକ୍କା ଡକ୍ଟର’ ବୋଲି ସମ୍ବୋଧନ କରିଥାନ୍ତି। ସେମାନଙ୍କ ଭାଷାରେ ମାକ୍କା ଅର୍ଥ ପିଲା। ପିଲାମାନଙ୍କ ଡାକ୍ତର ଭାବେ ପରିଚିତ ଭିନ୍ସେଟ ୧୯୯୫ରେ ତିରୁନେଲଭେଲି ମେଡିକାଲ କଲେଜରୁ ଏମବିବିଏସ୍ ଡିଗ୍ରୀ ହାସଲ କରିବା ପରେ ତାଙ୍କ ଘର ନାଗେରକୋଲିକୁ ଫେରିଥିଲେ ଓ ସେଠାରେ ୬ ବର୍ଷ ଏକ ମିଶନ ହସ୍ପିଟାଲରେ ଚିକିତ୍ସା କରିବା ପରେ ଏଭଳି ଦୁର୍ଗମ ଅଞ୍ଚଳର ଆଦିବାସୀଙ୍କ ସେବାରେ ଲାଗିଛନ୍ତି। ଅବସର ପରେ ‘ମାକ୍କା ଡକ୍ଟର’ ନାମ ତାଙ୍କୁ ଜୀବନରେ ବହୁ ଶାନ୍ତି ଦେବ ବୋଲି କହନ୍ତି ଭିନ୍ସେଟ।
