ଲକ୍ଡାଉନ୍ ସମୟରେ ଜଣେ ଅଟୋଚାଳକଙ୍କ ବଦାନ୍ୟତା ଏବେ ଚର୍ଚ୍ଚାରେ ରହିଛି। ମହାରାଷ୍ଟ୍ର ଠାଣେର ପୁରୁଷୋତ୍ତମ ଗୁପ୍ତା ସହରରେ ରହୁଥିବା ଅଟୋଚାଳକ ତଥା ନିର୍ମାଣ ଶ୍ରମିକମାନଙ୍କୁ ମାଗଣାରେ ରାଶନ ବାଣ୍ଟୁଛନ୍ତି। ଅଟୋଚାଳକମାନେ ରୋଜଗାର ହରାଇଥିବାରୁ ସେମାନଙ୍କୁ ସାହାଯ୍ୟ କରିବା ଆବଶ୍ୟକ ବୋଲି କୁହନ୍ତି ଗୁପ୍ତା। ବସ୍ତି ବାସିନ୍ଦାଙ୍କୁ ସେ ଅଧିକ ରାଶନ କିଟ୍ ଦେଉଛନ୍ତି। ସେ ‘ସଦ୍ଭାବନା ହର-ବାହାର ଫାଉଣ୍ଡେଶନ’ ଏନ୍ଜିଓର ସଦସ୍ୟ ରହିଛନ୍ତି। ଏହି ଏନ୍ଜିଓର ଅଫିସିଆଲ ଫେସ୍ବୁକ ପେଜ୍ରେ ଲୋକମାନଙ୍କୁ ଦାନ କରିବା ପାଇଁ ଅନୁରୋଧ କରିବା ପରେ ଲୋକମାନେ ତାଙ୍କୁ ଅର୍ଥ ଦାନ କରୁଛନ୍ତି। ଏହି ଟଙ୍କାରେ ସେ ରାଶନ ସାମଗ୍ରୀ କିଣୁଛନ୍ତିି। ପ୍ରତ୍ୟେକ କିଟ୍ରେ ସେ ୪୬୦ ଟଙ୍କା ମୂଲ୍ୟର ଚାଉଳ, ଡାଲି, ଅଟା ଓ ତେଲ ଦେଉଛନ୍ତି। ରାଶନ କିଟ୍ ପ୍ରସ୍ତୁତ କରିବାରେ ସେ ତାଙ୍କ ପରିବାର ସଦସ୍ୟଙ୍କୁ ଲଗାଇଛନ୍ତି। ସେମାନେ ସାମାଜିକ ଦୂରତ୍ୱ ପାଳନ କରି କିଟ୍ ପ୍ୟାକ କରୁଛନ୍ତି। ଗୁପ୍ତା ଅଟୋରେ କିଟ୍ ନେଇ ଗରିବ ଲୋକଙ୍କ ଘରେ ପହଞ୍ଚାଇ ଦେଉଛନ୍ତି। ଏବେସୁଦ୍ଧା ସେ ୧୫୦ରୁ ଊର୍ଦ୍ଧ୍ୱ ରାଶନ କିଟ୍ ବାଣ୍ଟି ସାରିଲେଣି। ଠାଣେରେ ବୃକ୍ଷରୋପଣ କାର୍ଯ୍ୟକ୍ରମରେ ମଧ୍ୟ ଗୁପ୍ତା ସାମିଲ ହୋଇ ବହୁ ଆଖିଦୃଶିଆ କାର୍ଯ୍ୟ କରିଆସୁଛନ୍ତି।
