ଚାକିରି ଛାଡି ବ୍ୟକ୍ତିଗତ ଉଦ୍ୟମରେ ଜଣେ ବ୍ୟାଘ୍ର ଅଭୟାରଣ୍ୟ ସୃଷ୍ଟି କରିପାରିବା ଘଟଣା ଆଶ୍ଚର୍ଯ୍ୟ ଲାଗୁଥିଲେ ବି ସତ। ଏମିତି ଏକ ଅଭୟାରଣ୍ୟ ସୃଷ୍ଟି କରିଛନ୍ତି ପୂର୍ବତନ ଆଇଏଏସ୍ ଆଦିତ୍ୟ ସିଂ। ତାଙ୍କୁ ଏଥିରେ ସହଯୋଗ କରିଛନ୍ତି ତାଙ୍କ ସ୍ତ୍ରୀ ପୁନମ୍। ବାଘ-ମଣିଷ ମଧ୍ୟରେ ଲାଗି ରହିଥିବା ଲଢେଇକୁ ରୋକିବା ପାଇଁ ଏମାନେ ଏଭଳି ଏକ ଅଭୟାରଣ୍ୟ ସୃଷ୍ଟି କରିଛନ୍ତି। ଏଥିଲାଗି ତାଙ୍କୁ ୨୦ ବର୍ଷ ଲାଗିଯାଇଛି। ଆଦିତ୍ୟ ସଂଚାର ମନ୍ତ୍ରଣାଳୟରେ ଚାକିରି କରିଥିଲେ। ପରେ ଚାକିରି ଛାଡି ପ୍ରଥମେ ରାଜସ୍ଥାନର ରନ୍ଥମ୍ବୋର ବ୍ୟାଘ୍ର ଅଭୟାରଣ୍ୟ(ଆର୍ଟିଆର୍)ରେ ଜଣେ ଫଟୋଗ୍ରାଫର ଭାବେ ସମୟ କଟାଇଥିଲେ। ପରେ ଆର୍ଟିଆର୍ ନିକଟସ୍ଥ ସହର ସାଓ୍ବି ମାଧପୁରାରେ ରହିଥିଲେ। ଏହି ସମୟରେ ପୁନମ ସିଂ ବି ରନ୍ଥମ୍ବୋରରେ ଏକ ଟୁରିଷ୍ଟ୍ ଲଜ୍ ଆରମ୍ଭ କରିଥିଲେ। ବ୍ୟାଘ୍ର ଅଭୟାରଣ୍ୟ ପାଖରେ ଥିବା ଭଦ୍ଲାଭ ଓ ଏହାର ଆଖପାଖ ଗାଁକୁ ବାଘ ଶିକାର କରିବାକୁ ପଶିଆସୁଥିବା ସେମାନେ ଲକ୍ଷ୍ୟ କରିଥିଲେ। ଏହାଦ୍ୱାରା କୃଷକମାନେ ବହୁ ସମସ୍ୟାର ସମ୍ମୁଖୀନ ହେଉଥିଲେ। ଏହି କାରଣରୁ କୃଷକମାନେ ଅଭୟାରଣ୍ୟକୁ ଲାଗି ରହିଥିବା ସେମାନଙ୍କ ଜମି ବିକ୍ରି କରିଦେଉଥିଲେ। ଆଦିତ୍ୟ ଓ ତାଙ୍କ ସ୍ତ୍ରୀ ପୁନମ ଏହି ସବୁ ଜମି କିଣି ବାଘମାନଙ୍କ ପାଇଁ ଏକ ସୁନ୍ଦର ଜଙ୍ଗଲ ସୃଷ୍ଟି କରିପାରିଛନ୍ତି, ଯାହାଦ୍ୱାରା ଆଉ ବାଘ ଗାଁ ଆଡକୁ ଆସୁନାହାନ୍ତି କି କୃଷକମାନଙ୍କର କୌଣସି କ୍ଷତି ମଧ୍ୟ କରୁନାହାନ୍ତି। ୨୦୦୦ରୁ ଏବେ ସୁଦ୍ଧା ସେମାନେ ୩୫ ଏକରରୁ ଅଧିକ ଜମିରେ ଜଙ୍ଗଲ ସୃଷ୍ଟି କରିସାରିଲେଣି। ଏହାର ନାମ ରଖିଛନ୍ତି ଭଦ୍ଲାଭ ବ୍ୟାଘ୍ର ଅଭୟାରଣ୍ୟ। ଏହା ପୂରା ରନ୍ଥମ୍ବୋର ଅଭୟାରଣ୍ୟକୁ ଲାଗି ରହିଛି। ତା’ ଭିତରେ ବି ଜଳାଶୟ ରହିଛି । ଏହା କଡ଼ରେ ତାର ବାଡ ମଧ୍ୟ ଦେଇଛନ୍ତି ଏହି ଦମ୍ପତି। ବହୁ ସମୟରେ ଆର୍ଟିଆର୍ରୁ ବାଘ ବାହାରକୁ ଆସିଲେ ବି ଏହି ଜଙ୍ଗଲରେ ରହିଯାଉଛନ୍ତି। ଏହାଦ୍ୱାରା ସେଠାରେ ମଣିଷ ଓ ବାଘ ଲଢ଼େଇ ଏକ ପ୍ରକାର ଶେଷ ହୋଇଯାଇଛି। ଜଙ୍ଗଲର ସୁରକ୍ଷା ଲାଗି ଆଦିତ୍ୟ ଗାର୍ଡଙ୍କୁ ବି ନିଯୁକ୍ତି ଦେଇଛନ୍ତି।
