କୋଭିଡ-୧୯ କରୋନା ଭାଇରସ୍କୁ ପ୍ରତିରୋଧ କରିବା ଲାଗି ସାରା ବିଶ୍ୱ ସବୁ ବଳ ଖଟାଇ ଦେଇଛି। ହେଲେ ତାହାକୁ କାବୁ କରାଯାଇପାରୁନାହିଁ। ପ୍ରତିଦିନ ହଜାର ହଜାର ଲୋକ ଏଥିରେ ପ୍ରାଣ ହରାଉଛନ୍ତି। ବିଶ୍ୱରେ ବୈଜ୍ଞାନିକମାନେ ଓଷଧ ବିକାଶ କରିବାରେ ଲାଗିଥିବାବେଳେ ଭାରତରେ ଦୁଇଜଣ ପୂର୍ବତନ ଆଇଆଇଟି ଛାତ୍ର କରୋନା ଭାଇରସ୍କୁ ରୋକିବା ଲାଗି ଏକ ରୋବୋ ନିର୍ମାଣ କରିଛନ୍ତି। ଏହି ଦୁଇଜଣ ଯୁବ ବୈଜ୍ଞାନିକ ହେଉଛନ୍ତି ଦେବଯାନ ଶାହା ଓ ଡ. ଶଶି ରଞ୍ଜନ। ମଣିଷ ଭଳି ଦେଖିବାକୁ ଏହି ରୋବୋର ନାମ‘ ଏୟାରଲେନ୍ସ ମାଇନସ୍ କରୋନା’ ରଖାଯାଇଛି। ହସ୍ପିଟାଲ, ବସଷ୍ଟାଣ୍ଡ୍,ରେଲଓ୍ବେ ଷ୍ଟେଶନ, ଶପିଂ ମଲ୍ ଆଦି ସ୍ଥାନରେ ଏହି ରୋବୋ ଆଇଓନାଇଜଡ୍ ଓ୍ବାଟର ସ୍ପ୍ରେ କରି କରୋନା ଭୂତାଣୁକୁ ଶେଷ କରିପାରିବ ବୋଲି କହନ୍ତି ଶାହା। ସ୍ପ୍ରେ ମାଧ୍ୟମରେ କରୋନା ଭୂତାଣୁର ପ୍ରୋଟିନ କୋଟିଂକୁ ନଷ୍ଟ କରିପାରିବ। ଲକ୍ଡାଉନ ସମୟରେ ଶହା କୋଲକାତାରେ ଓ ଡ. ଶଶି ଦିଲ୍ଲୀରେ ରହୁଥିଲେ ମଧ୍ୟ ସେହି ଅଞ୍ଚଳରେ ଉପଲବ୍ଧ ହେଉଥିବା ସଂସାଧନକୁ ଉପଯୋଗ କରି ସେମାନେ ଏହାର ପ୍ରୋଟୋଟାଇପ୍ ବା ପ୍ରତିକୃତି ନିର୍ମାଣ କରିଛନ୍ତି। ଏହାର ପରୀକ୍ଷା ପାଇଁ ବିଜ୍ଞାନ ଓ ଜ୍ଞାନକୌଶଳ ବିଭାଗ ଅଧୀନରେ ଥିବା ଜ୍ଞାନକୌଶଳ ବିକାଶ ବୋର୍ଡ ନିକଟକୁ ପଠାଇଛନ୍ତି। ତେବେ ଏହି ସଂକଟ ସମୟରେ ଏଭଳି ଅଧିକ ରୋବୋ ନିର୍ମାଣ କରିବାକୁ ଇଞ୍ଜିନିୟରମାନଙ୍କୁ ପ୍ରୋତ୍ସାହିତ କରିବା ପାଇଁ ସେମାନେ ବିଭାଗକୁ ପ୍ରସ୍ତାବ ମଧ୍ୟ ଦେଇଛନ୍ତି।
