ସେବା କରିବାର ଦୃଢ ଇଚ୍ଛାଶକ୍ତି ଆଗରେ ଭୟର କୌଣସି ସ୍ଥାନ ନ ଥାଏ। ନିର୍ଭୟରେ ସବୁ ପ୍ରତିକୂଳ ପରିବେଶକୁ ପ୍ରତିହତ କରି ସେବକମାନେ ଆଗେଇ ଚାଲନ୍ତି ଲକ୍ଷ୍ୟ ପଥରେ, ଯାହା କରୁଛନ୍ତି ଜମ୍ମୁ ସହରର ରବିନହୁଡ୍ ଆର୍ମି ସଦସ୍ୟମାନେ। ଏମାନେ ରାତିରେ ଘରୁ ବାହାରିଯାଆନ୍ତି ଭୋକିଲାଙ୍କ ପେଟ ଭରିବାକୁ । ଏମାନଙ୍କୁ ନ ଥାଏ ଆତଙ୍କବାଦୀ କି ଥଣ୍ଡାକୁ ଭୟ । ବସ୍ତି , ରେଲଓ୍ବେଷ୍ଟେଶନ ଓ ପ୍ଲାଏଓଭର୍ ତଳେ ରହୁଥିବା ଲୋକମାନଙ୍କୁ ଖାଇବାକୁ ଦେଉଛନ୍ତି ଏମାନେ।
କିଛି ବର୍ଷ ପୂର୍ବେ ଏହି ଆର୍ମି ଗଠନ କରିଥିଲେ ଗାନ୍ଧୀନଗର ନିବାସୀ ବିନସ ସେଠୀ। ଧୀରେ ଧୀରେ ଏଥିରେ ସ୍ଥାନୀୟ ଯୁବକମାନେ ସାମିଲ ହୋଇ ହୋଟେଲ, ରେସ୍ତୋରାଁ, ବେକରି ସହ ବିଭିନ୍ନ ସ୍ଥାନରେ ଏହାର ପୋଷ୍ଟର୍ ଲଗାଇ ବଳକା ଖାଦ୍ୟ ଦେବା ଲାଗି ଅନୁରୋଧ କରିଥିଲେ। ପ୍ରଥମେ ସେମାନଙ୍କୁ କେହି ବିଶ୍ୱାସକୁ ନେଇ ନ ଥିଲେ। କିନ୍ତୁ ଗୋଟିଏ ବେକରି ବଳକା ଖାଦ୍ୟ ଦେବାରୁ ସେମାନେ ଏହାକୁ ନେଇ ରାତିରେ ବାଣ୍ଟିବା ଆରମ୍ଭ କରିଥିଲେ। ଏହାପରେ ହୋଟେଲ ଓ ରେସ୍ତୋରଁାରୁ ଖାଦ୍ୟ ମିଳିବା ଆରମ୍ଭ ହୋଇଥିଲା। ସବୁ ଖାଦ୍ୟ ରାତି ୧୦ଟା ପରେ ମିଳେ। ଏହି ସମୟରେ ଜମ୍ମୁରେ ଖାଦ୍ୟ ବାଣ୍ଟିବା ସହଜ ନୁହେଁ। କିନ୍ତୁ ବିନସଙ୍କ ନେତୃତ୍ୱରେ ଏହାକୁ ସଫଳତାର ସହ କରାଯାଉଛି। ରାତି ୧୧ଟା ବେଳକୁ ସେମାନେ ଖାଦ୍ୟ ବାଣ୍ଟିବାକୁ ଯାଉଛନ୍ତି। ଭୋକିଲାମାନେ ଖାଇବା ପରେ ତାଙ୍କ ମୁହଁର ଚେନାଏ ହସରେ ସଦସ୍ୟମାନେ ସବୁ ଦୁଃଖ ଭୁଲିଯାଆନ୍ତି ବୋଲି କୁହନ୍ତି ବିନସ। ଜମ୍ମୁର କୌଣସି ଡଷ୍ଟବିନରେ ଯେମିତି ଖାଦ୍ୟ ନ ପଡେ ସେଥିତ୍ପାଇଁ ଏହି ଆର୍ମି ମଧ୍ୟ ଅଭିଯାନ ଆରମ୍ଭ କରିଛିି।
