ଗଞ୍ଜାମ,୨୭ା୩(ଡି.ଏନ.ଏ.)- ଉତ୍ତରପ୍ରଦେଶରେ ଗଞ୍ଜାମର ୧୪ ଜଣଙ୍କ ସମେତ ଓଡିଶାର ମୋଟ ୫୧ ତୀର୍ଥଯାତ୍ରୀ ଫସି ରହିଛନ୍ତି। ସେମାନଙ୍କ ମଧ୍ୟରୁ ଗଞ୍ଜାମ ଏନ୍ଏସି ଦାମୋଦରପୁର ଗ୍ରାମର ୧୨ ଓ ଛତ୍ରପୁର ବ୍ଲକ ଅଗସ୍ତିନୂଆଗଁାର ୨ ଜଣ ମହିଳା ରହିଛନ୍ତି। ଅନ୍ୟମାନେ ପୁରୀ ଓ ଟିଟିଲାଗଡ଼ ଅଞ୍ଚଳର ବୋଲି ଜଣାପଡିଛି। ଏକ ୫୧ ଜଣିଆ ତୀର୍ଥଯାତ୍ରୀ ଉତ୍ତରପ୍ରଦେଶରେ ଫସି ରହିଛନ୍ତି। ସେମାନେ ଏକ ଭିଡିଓ ମାଧ୍ୟମରେ ଉଦ୍ଧାର ପାଇଁ ରାଜ୍ୟ ସରକାରଙ୍କୁ ନିବେଦନ କରିଛନ୍ତି। ବର୍ତ୍ତମାନ ଉତ୍ତରପ୍ରଦେଶର ନୈମିସାରନର ଏକ ଆଶ୍ରମରେ ସେମାନେ ଆଶ୍ରୟ ନେଇଥିବା ସୂଚନା ଦେଇଛନ୍ତି। ସେମାନେ ୨୪ ତାରିଖରେ ଓଡ଼ିଶା ଅଭିମୁଖେ ଟ୍ରେନରେ ଆସିବାର ଥିଲା। କିନ୍ତୁ ଲକ୍ଡାଉନ୍ ଯୋଗୁ ଟ୍ରେନ ବାତିଲ ହୋଇଯାଇଛି। ସେମାନଙ୍କ ମଧ୍ୟରେ ଅଧିକାଂଶ ବରିଷ୍ଠ ନାଗରିକ ରହିଛନ୍ତି। ଡାଇବେଟିସ, ଉଚ୍ଚ ରକ୍ତଚାପ ଓ ଶ୍ୱାସରୋଗୀ ମଧ୍ୟ ଅଛନ୍ତି। ଖାଇବା ପିଇବାରେ ବହୁ ଅସୁବିଧା ହେଉଥିବାବେଳେ ଟଙ୍କା ସରିଆସିଲାଣି। ଭିକାରୀ ବେହେରା, ସରସ୍ବତୀ ବେହେରା, ବସନ୍ତ ବେହେରା, ଅହଲ୍ୟା ବେହେରା, ଚନ୍ଦ୍ରମା ବେହେରା, କୈଳାସ ବେହେରା, ପାର୍ବତୀ ବେହେରା, ସିମାଦ୍ରୀ ବେହେରା, ପାର୍ବତୀ ବେହେରା, ପି.ଆଦିଆମ୍ମା ରେଡ୍ଡୀ ଡି.ସାହେବ ରେଡ୍ଡୀ, ଡି.ଲଛମି ରେଡ୍ଡୀ ପ୍ରମୁଖ ଦାମୋଦରପୁର ଗ୍ରାମର ହୋଇଥିବାବେଳେ ମିଲି ଦାସ ଓ ଲକ୍ଷ୍ମୀ ଦାସ ଦୁଇଜଣ ମହିଳା ଛତ୍ରପୁର ବ୍ଲକ ଅଗସ୍ତି ନୂଆଗଁାର।
ଏନେଇ ଗ୍ରାମବାସୀ ଛତ୍ରପୁର ବିଧାୟକ ସୁବାସ ଚନ୍ଦ୍ର ବେହେରାଙ୍କୁ ଭେଟିଛନ୍ତି। ବିଧାୟକ ଡିଜି ପୋଲିସ ଅପରେଶନ ଅମିତାଭ ଠାକୁରଙ୍କ ସହ ଯୋଗାଯୋଗ କରି ତାଙ୍କ କଣ୍ଟ୍ରୋଲ ରୁମ୍ର କମ୍ଲେନ୍ ରେଜିଷ୍ଟେସନ କରାଯିବା ବୋଲି କହିଛନ୍ତି। ଏହାପରେ ଉତ୍ତର ପ୍ରଦେଶରେ ଫସି ରହିଥିବା ନିକଟସ୍ଥ ପ୍ରଶାସନକୁ ଏନେଇ ଅବଗତ କରି ସେମାନଙ୍କ ପାଇଁ ଆନୁସଙ୍ଗିକ ବ୍ୟବସ୍ଥା କରାଯିବ ବୋଲି ପ୍ରତିଶ୍ରୁତି ଦେଇଥିଲେ। ୫ ଦିନପରେ ସେଠିକାର ସରକାରଙ୍କ ସହ ଯୋଗାଯୋଗ କରାଯାଇ ଓଡିଶାକୁ ଫେରାଇ ଆଣିବା ବ୍ୟବସ୍ଥା କରାଯିବ ବୋଲି ବିଧାୟକ ବେହେରା କହିଛନ୍ତି।
