ଲଣ୍ଡନ,୧୯।୫(ପି.ଟି.): କୋଭିଡ-୧୯ ମହମାରୀର ଆତଙ୍କ ସାରା ବିଶ୍ୱରେ ଜାରି ରହିଥିବା ବେଳେ ଓ୍ବେଷ୍ଟଇଣ୍ଡିଜ କ୍ରିକେଟ ଦଳ ଏକ ୩ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ଖେଳିବା ପାଇଁ ଇଂଲଣ୍ଡ ଗସ୍ତ କରିବାର କାର୍ଯ୍ୟକ୍ରମ ରହିଛି। ଏହି ଗସ୍ତରେ କୌଣସି ଖେଳାଳିଙ୍କ ବାଧ୍ୟ କରାଯିବ ନାହିଁ ବୋଲି ଓ୍ବେଷ୍ଟଇଣ୍ଡିଜ ଅଧିନାୟକ ଜାସନ ହୋଲ୍ଡର କହିଛନ୍ତି। ଏହି ଟେଷ୍ଟ ସିରିଜ ଜୁନ୍ ୪ରେ ଆରମ୍ଭ ହେବାର କାର୍ଯ୍ୟକ୍ରମ ଥିଲା। କରୋନା ଭାଇରସ୍ ସଂକ୍ରମଣ କାରଣରୁ ଏହାକୁ ଘଞ୍ଚାଇ ଦିଆଯାଇଥିଲା। ତେବେ ଏହି ସିରିଜ ଜୁଲାଇରେ ଜୁଲାଇରେ ଖେଳାଯିବ ବୋଲି ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ଆଶା ରଖିଛି।
ନିଷ୍ପତ୍ତି ନେବା ପାଇଁ ସବୁ ଖେଳାଳି ସ୍ବତନ୍ତ୍ର ବୋଲି ସେ କହିଛନ୍ତି। ଇଂଲଣ୍ଡ ଗସ୍ତରେ ଆମେ ଯିବୁ। କିନ୍ତୁ ସ୍ବାସ୍ଥ୍ୟ ଓ ନିରାପତ୍ତାକୁ ପ୍ରଥାମିକତା ଦିଆଯିବ ବୋଲି ସେ କହିଛନ୍ତି। ଓ୍ବେଷ୍ଟଇଣ୍ଡିଜକୁ ବାଦ୍ ଦେଲେ ପାକିସ୍ତାନ ମଧ୍ୟ ଇଂଲଣ୍ଡ ଗସ୍ତ କରିବାର କାର୍ଯ୍ୟକ୍ରମ ରହିଛି। ଏହି ଦୁଇଟି ସିରିଜ ଆୟୋଜନ ପାଇଁ ଅନୁକୂଳ ପରିସ୍ଥିତି ସୃଷ୍ଟି କରିବାକୁ ପ୍ରୟାସ କରାଯିବ ବୋଲି ଆଶଲେ ଜାଇଲ୍ସ କହିଛନ୍ତି। ଏହି ଗସ୍ତରେ କୌଣସି ରିସ୍କ ନିଆଯିବ ନାହିଁ। ତେବେ ସମସ୍ତଙ୍କ ନରାପତ୍ତା ହେଉଛି ସବୁଠାରୁ ବଡ଼ କଥା। ଇସିବି ଗ୍ରହଣ କରିବାକୁ ଥିବା ସବୁ ବ୍ୟବସ୍ଥାରେ ସବୁ ଖେଳାଳି ସହଜ ଅନୁଭବ କରିବାର ଆବଶ୍ୟକତା ରହିଛି ବୋଲି ୨୮ ବର୍ଷୀୟ ହୋଲ୍ଡର କହିଛନ୍ତି। ଇତିମଧ୍ୟରେ ଇଂଲଣ୍ଡ କ୍ରିକେଟରମାନେ ଚଳିତ ସପ୍ତାହ ଟ୍ରେନିଂକୁ ପ୍ରତ୍ୟାବର୍ତ୍ତନ କରିଛନ୍ତି। ତେବେ ଖେଳାଳିମାନେ ବ୍ୟକ୍ତିଗତ ଭାବେ ସୀମିତ ଅଭ୍ୟାସ କରିବେ ବୋଲି ଇସିବି ତରଫରୁ କୁହାଯାଇଛି।
