ପୁରୀ ଅଫିସ,୧୮।୫: ସମ୍ଭାବ୍ୟ ବାତ୍ୟା ଅମ୍ଫନକୁ ନେଇ ଉପକୂଳବର୍ତ୍ତୀ ପୁରୀ ଜିଲାବାସୀ ଭୟଭୀତ ହୋଇପଡ଼ିିଛନ୍ତି। ବର୍ଷକ ତଳେ ଅର୍ଥାତ୍ ୨୦୧୯ ମେ ୩ ତାରିଖରେ ବାତ୍ୟା ଫନୀ ପୁରୀ ଜିଲାରେ ତାଣ୍ଡବ ରଚିଥିଲା। ଏ ପର୍ଯ୍ୟନ୍ତ ସେହି ଦୁଃଖ ଦୂର ହୋଇ ନ ଥିବାବେଳେ ଅଚାନକ କରୋନା ମାଡ଼ି ଆସି ସମସ୍ତଙ୍କ ଜୀବନ ଜୀବିକାକୁ ବିପନ୍ନ କରିଦେଇଛି। ଏଭଳି ସମୟରେ ସମ୍ଭାବ୍ୟ ବାତ୍ୟା ପୁଣି ଜିଲାବାସୀଙ୍କ ମଧ୍ୟରେ ଚିନ୍ତା ଛାଇଦେଇଛି। ଅମ୍ଫନ ମୁକାବିଲା ପାଇଁ ଜିଲା ପ୍ରଶାସନ ସଜାଗ ଥିବାବେଳେ ରବିବାର ପୁରୀରେ ପହଞ୍ଚତ୍ଛନ୍ତି ୨୧ଜଣିଆ ଏନ୍ଡିଆରଏଫ୍ ଟିମ୍।
ଅମ୍ଫନକୁ ଦୃଷ୍ଟିରେ ରଖି ସବୁ ବ୍ଲକରେ ବ୍ୟାପକ ପ୍ରସ୍ତୁତି କରାଯାଇଥିବା ଜିଲାପାଳ ବଲୱନ୍ତ ସିଂ କହିଛନ୍ତି। ଜିଲାର ୬ଟି ଉପକୂଳବର୍ତ୍ତୀ ବ୍ଲକ ବିଶେଷକରି ଅସ୍ତରଙ୍ଗ, କାକଟପୁର, ଗୋପ ସମେତ କୋଣାର୍କ ଏନ୍ଏସିରେ ବାତ୍ୟା ପ୍ରକୋପ ଅଧିକ ଅନୁଭୂତ ହେବା ଆଶଙ୍କା ଥିବାରୁ ପ୍ରଶାସନ ସଜାଗ ରହିଛି। ଜିଲାରେ ୮୮୫ଟି ଆଶ୍ରୟସ୍ଥଳୀ ଚିହ୍ନଟ କରାଯାଇଛି। ପ୍ରାୟ ୯୦ ହଜାର ଲୋକଙ୍କୁ ଆବଶ୍ୟକ ସ୍ଥଳେ ସୁରକ୍ଷିତ ସ୍ଥାନକୁ ସ୍ଥାନାନ୍ତର ଲାଗି ପ୍ରସ୍ତୁତି ସରିଛି। ଏନ୍ଡିଆର୍ଏଫ୍, ଓଡ୍ରାଫ୍, ଗ୍ରାମ୍ୟ ଉନ୍ନୟନ, ପୂର୍ତ୍ତ ଓ ଅଗ୍ନିଶମ ବିଭାଗର ୧୪ଟି ଦଳ ସମେତ ପାଖାପାଖି ୬୦ଟି ଟିମ୍ ଉଦ୍ଧାର ଏବଂ ଥଇଥାନ କାର୍ଯ୍ୟରେ ନିୟୋଜିତ ହେବେ। ଏଥିସହ ଆବଶ୍ୟକ ପଦକ୍ଷେପ ଗ୍ରହଣ ପାଇଁ ପୋଲିସ ପ୍ରଶାସନକୁ ଦାୟିତ୍ୱ ଦିଆଯାଇଛି। ଘଣ୍ଟା ପ୍ରତି ୪୦ କିମି ବେଗରୁ ଅଧିକ ପବନ ହେଲେ ବିଦ୍ୟୁତ୍ ଯୋଗାଯୋଗ ବନ୍ଦ କରାଯିବ। ଡାକ୍ତରଖାନା ଓ ଜଳଯୋଗାଣ ଭଳି ଗୁରୁତ୍ୱପୂର୍ଣ୍ଣ ସେବା ପ୍ରଦାନ ଲାଗି ୩୦ଟି ଜେନେରେଟର ସେଟ୍ ବନ୍ଦୋବସ୍ତ କରାଯାଇଛି। ଜିଲାରେ ପର୍ଯ୍ୟାପ୍ତ ପରିମାଣର ଖାଦ୍ୟ ସାମଗ୍ରୀ ମହଜୁଦ୍ ରହିଛି। ଜିଲାର ପ୍ରାୟ ୧୫୦୦ ହେକ୍ଟର ଚାଷଜମିରେ ଫସଲ ଅମଳ ହେବାକୁ ବାକି ଥିବାରୁ ଫସଲ ହାନିର ଏତେଟା ଆଶଙ୍କା ନାହିଁ। ସୋମବାର ସୁଦ୍ଧା ଫସଲ ସୁରକ୍ଷା ପାଇଁ ପଦକ୍ଷେପ ଗ୍ରହଣ କରିବାକୁ କୃଷି ଅଧିକାରୀ ଏବଂ କୃଷକମାନଙ୍କୁ ପରାମର୍ଶ ଦିଆଯାଇଛି। ସ୍ଥାନାନ୍ତର ହେବାକୁ ଥିବା ଲୋକେ ୧୯ ତାରିଖ ସନ୍ଧ୍ୟା ସୁଦ୍ଧା ସେମାନଙ୍କ ପାଇଁ ଚିହ୍ନଟ ଆଶ୍ରୟସ୍ଥଳୀକୁ ଯିବା ଲାଗି କୁହାଯାଇଛି। ବାତ୍ୟା ପ୍ରକୋପ କମିବା ଓ ରାସ୍ତାଘାଟ ସଫା ହେବା ପରେ ଘରକୁ ଫେରିବା ପାଇଁ ସେମାନଙ୍କୁ ପରାମର୍ଶ ଦିଆଯାଇଛି। ଆଶ୍ରୟସ୍ଥଳୀଗୁଡ଼ିକରେ ଆନୁଷଙ୍ଗିକ ବ୍ୟବସ୍ଥା ହୋଇଛି। ମତ୍ସ୍ୟଜୀବୀଙ୍କୁ ସମୁଦ୍ର ମଧ୍ୟକୁ ନ ଯିବା ପାଇଁ କୁହାଯାଇଛି। ଜିଲାରେ ସମସ୍ତ କର୍ମଚାରୀଙ୍କ ଛୁଟି ବାତିଲ କରାଯାଇଛି। ବ୍ଲକସ୍ତରରେ କାର୍ଯ୍ୟରତ ଟିମ୍ ଏବଂ ପ୍ରଶାସନକୁ ସହଯୋଗ କରିବା ପାଇଁ ଲୋକଙ୍କୁ ଅନୁରୋଧ କରାଯାଇଛି।
