ପାରାଦୀପ,୨ା୭(ସ୍ବ.ପ୍ର.): ପାରାଦୀପ ତୈଳ ବିଶୋଧନାଗାର ଆଗରେ ଗତମାସ ୨୪ ତାରିଖରୁ ଜମିହରା କୃଷକ ଏକତା ମଞ୍ଚ ପକ୍ଷରୁ ନିଯୁକ୍ତି ଦାବିରେ ଧାରଣା ଜାରି ରହିଛି। ଏ ସମ୍ପର୍କରେ ସୋମବାର ସନ୍ଧ୍ୟାରେ ପାରାଦୀପ ଅତିରିକ୍ତ ଜିଲାପାଳଙ୍କ ପ୍ରକୋଷ୍ଠରେ ଏକ ବୈଠକ ହୋଇଥିଲା। ତେବେ ଦୀର୍ଘ ସମୟ ଧରି ଆଲୋଚନା ପରେ ଏହା ବିଫଳ ହୋଇଥିବା ଜଣାପଡିଛି। ଅର୍ଥାତ ନିଯୁକ୍ତି ପ୍ରସଙ୍ଗରେ କମ୍ପାନୀ ଓ ଜମିହରା କୃଷକ ଏକତା ମଞ୍ଚ ମଧ୍ୟରେ ସହମତି ପ୍ରକାଶ ପାଇଲା ନାହିଁ। ଏ ସମ୍ପର୍କରେ ମଞ୍ଚ ପକ୍ଷରୁ କୁହାଯାଇଛି ଯେ, ଆଉ କମ୍ପାନୀର ପ୍ରତିଶ୍ରୁତ ଚଳିବ ନାହିଁ, ନିଶ୍ଚିତ ନିଯୁକ୍ତି ତାଲିକା ଦେଲେ ଯାଇ ଧାରଣା ହଟିବ। ସେହିପରି ଯେ ପର୍ଯ୍ୟନ୍ତ ନିଯୁକ୍ତି ଗ୍ୟାରେଣ୍ଟି ନ ଦେଇଛନ୍ତି ସେ ପର୍ଯ୍ୟନ୍ତ ଧାରଣା ବଳବତ୍ତର ରହିବ ବୋଲି ମଞ୍ଚର ମୁଖିଆ ଅରିନ୍ଦମ ସର୍ଖେଲ (ବାପି) କହିଛନ୍ତି। ବୈଠକରେ ଅତିରିକ୍ତ ଜିଲାପାଳ କାହ୍ନୁଚରଣ ଧିର, ଆଇଓସିଏଏଲ୍ର ଜି.କେ. ସାହୁ, ଜମିହରା କୃଷକ ଏକତା ମଞ୍ଚର ନବୀନ ପ୍ରଧାନଙ୍କ ସମେତ ୧୦ରୁ ଊର୍ଦ୍ଧ୍ୱ ଆଗଧାଡ଼ିର ସଦସ୍ୟ ଉପସ୍ଥିତ ଥିଲେ। ତୈଳ ବିଶୋଧନାଗାର ପ୍ରକଳ୍ପ ପାଇଁ ଯେଉଁ ୩୩୪୪ ଏକର ଜମି ଯାଇଛି, ସେଥିରେ ୨୨ ଗ୍ରାମର ୧୭୫୨ ପରିବାର ଜମି ହରାଇଛନ୍ତି ଓ ୧୪୩ ଜଣ ବିସ୍ଥାପିତ ହୋଇଛନ୍ତି। ସେମାନଙ୍କୁ ଅଦ୍ୟାବଧି ନିଯୁକ୍ତି ନ ମିଳିବାରୁ ଗତ ୧୦ବର୍ଷ ହେଲା ବିରୋଧ ଚାଲିଛି। ଜମିହରାମାନେ ଏବେ ଏକତ୍ର ଭାବେ ବିରୋଧ କରୁଛନ୍ତି। ପୂର୍ବରୁ ସେମାନେ ଦୁଇ ଭାଗରେ ଥିଲେ। ଗୋଟିଏ ଗୋଷ୍ଠୀ ଅଭୟ ସାହୁଙ୍କ ପାଖରେ ଓ ଅନ୍ୟ ଗୋଷ୍ଠୀ ସର୍ଖେଲଙ୍କ ପାଖରେ ରହିଥିଲେ। ଅନ୍ୟପକ୍ଷରେ ଆଉ ଜଣେ ଶ୍ରମିକ ନେତା ଧାରଣା ଭଣ୍ଡୁର କରିବା ପାଇଁ ମେଳି କରିବା ସହ ଭିନ୍ନ ଭିନ୍ନ ଉଦ୍ୟମ ଚଳାଇଥିବା ଜଣାଯାଇଛି। ଏ ସମ୍ପର୍କରେ ଅତିରିକ୍ତ ଜିଲାପାଳ କାହ୍ନୁଚରଣ ଧିର କହିଛନ୍ତି ଯେ, ଆଇଓସିଏଲ ୪୦ଜଣଙ୍କୁ ନିଯୁକ୍ତି ଦେବାକୁ ପ୍ରସ୍ତାବ ଦେଇଥିଲା। କିନ୍ତୁ ମଞ୍ଚ ୧୦୦ଜଣଙ୍କ ତତ୍କାଳ ନିଯୁକ୍ତି ଦାବି କରିଥିଲା। ଏଥିରେ ସହମତି ପ୍ରକାଶ ନ ପାଇବାରୁ ସେମାନେ ପଳାଇଥିଲେ।
