ପୁରୀ ଅଫିସ, ୧୧ା୨: ଗତ କିଛିଦିନ ଧରି ଏକ ଆନ୍ତଃରାଜ୍ୟ ଲୁଟେରା ଗ୍ୟାଙ୍ଗ ପୋଲିସର ମୁଣ୍ଡବ୍ୟଥା ବଢାଇ ଦେଇଥିଲା। ଲୁଟେରାମାନଙ୍କୁ ଧରିବାକୁ ପୋଲିସ ଜାଲ ବିଛାଇଥିଲା। ସୋମବାର ପୁରୀ ପୋଲିସ ଏକ ଆନ୍ତଃରାଜ୍ୟ ଲୁଟେରା ଗ୍ୟାଙ୍ଗର ୮ ସଦସ୍ୟଙ୍କୁ ଗିରଫ କରିଛି। ସେମାନେ ହେଲେ ଯାଜପୁରର ପିଣ୍ଟୁ ଓରଫ ଶୁଭ୍ରଜିତ ପରିଡ଼ା, ଜଗତ୍ସିଂହପୁରର ବୁବୁନା ଓରଫ ସୁଶାନ୍ତ ସ୍ବାଇଁ, ହାପି ଓରଫ ରାକେଶ ରାୟ, ବାପୁ ଓରଫ ରାଜେନ୍ଦ୍ର କୁମାର ସ୍ବାଇଁ, ନୟାଗଡ଼ର ବିପିନ ଓରଫ ବିପିନ ପୃଷ୍ଟି, କୋଣାର୍କର ରାଜା ଓରଫ ରାକେଶ ଖୁଣ୍ଟିଆ, ସତ୍ୟବାଦୀର କାହ୍ନା ଓରଫ ଭବାନୀ ଶଙ୍କର ମହାପାତ୍ର ଏବଂ କଟକର ଶିବୁନା ଓରଫ ଜିତେନ୍ଦ୍ର କୁମାର ଖଟୁଆ। ଏମାନଙ୍କଠାରୁ ୩ଟି ଇନୋଭା କାର, ଗୋଟିଏ ଟାଟା ଇଣ୍ଡିଗୋ,୨ଟି ବାଜାଜ୍ ପଲସର ବାଇକ୍, ଗୋଟିଏ ସୋନି ଏଲଇଡି ଟିଭି, ୮ଟି ମୋବାଇଲ ଫୋନ୍, ଇଲେକ୍ଟ୍ରିକାଲ ଯନ୍ତ୍ରପାତି, ଗୋଟିଏ ବନ୍ଧୁକ ଓ ଜୀବନ୍ତ ଗୁଳି ସମେତ ଲକ୍ଷାଧିକ ଟଙ୍କାର ସୁନାରୁପା ଅଳଙ୍କାର ଜବତ କରାଯାଇଛି। ୬ ଗିରଫ ଅଭିଯୁକ୍ତ ପିପିଲି ଥାନାର କେସ୍ ନମ୍ବର ୨୪୩/୧୯ ଏବଂ ୧୩/୨୦ ମାମଲାରେ ପୃଥକ ଭାବେ ଜଡ଼ିତ। ଗିରଫ ଅଭିଯୁକ୍ତମାନଙ୍କୁ ବାପୁ ଓ ଶିବୁନା ସହଯୋଗ କରିଥିବା ସୋମବାର ଏସ୍ପି ଡ. ଉମାଶଙ୍କର ଦାଶ ସୂଚନା ଦେଇଛନ୍ତି।
ଏସ୍ପି କହିଛନ୍ତି ଯେ, ଗିରଫ ଅଭିଯୁକ୍ତଙ୍କୁ ସୋମବାର ଅପରାହ୍ନରେ ପିପିଲି ପୋଲିସକୁ ହସ୍ତାନ୍ତର କରାଯାଇଛି। ମଙ୍ଗଳବାର ସେମାନଙ୍କୁ କୋର୍ଟଚାଲାଣ କରାଯିବ। କୋର୍ଟରେ ହାଜର କରାଯିବା ପରେ ତଥ୍ୟ ହାସଲ ଲାଗି ସେମାନଙ୍କୁ ରିମାଣ୍ଡରେ ଅଣାଯିବ। ଗିରଫ ଅଭିଯୁକ୍ତମାନେ ଭଦ୍ରକ, ଯାଜପୁର, କେନ୍ଦ୍ରପଡ଼ା, ଜଗତସିଂହପୁର, କଟକ, ଭୁବନେଶ୍ୱର, ଖୋର୍ଦ୍ଧା, ପୁରୀ, ନୟାଗଡ଼, ସମ୍ବଲପୁର ଜିଲା ସମେତ ଆନ୍ଧ୍ରପ୍ରଦେଶ ଏବଂ ପଶ୍ଚିମବଙ୍ଗରେ ନିଜ କାୟାବିସ୍ତାର କରିଥିଲେ। ଏମାନଙ୍କ ନାମରେ ଓଡ଼ିଶାର ବିଭିନ୍ନ ଥାନା ସମେତ ପଡୋଶୀ ରାଜ୍ୟର ଥାନାରେ ମଧ୍ୟ ମାମଲା ରହିଛି। ଗତ ୨୬.୯.୧୯ରେ ପିପିଲି ଥାନା ଅନ୍ତର୍ଗତ ଦକ୍ଷିଣ ନୂଆଗଁାର ଚନ୍ଦ୍ରଶେଖର ଦାଶ ଅଭିଯୋଗ କରିଥିଲେ ଯେ, କେତେଜଣ ଦୁର୍ବୃତ୍ତ ତାଙ୍କ ଘର ଗ୍ରୀଲ ତାଡ଼ି ଘରେ ପଶିି ଲକ୍ଷାଧିକ ଟଙ୍କାର ସୁନା ଗହଣା ଏବଂ ନଗଦ ୯୪ହଜାର ଟଙ୍କା ଲୁଟି ନେଇଥିଲେ। ଏ ନେଇ ଥାନାରେ ଆଇପିସି ଦଫା ୪୫୭, ୩୮୦ରେ କେସ୍ ନଂ. ୨୪୩ ରୁଜୁ ହୋଇଥିଲା। ସେହିପରି ମଙ୍ଗଳପୁରର ରଞ୍ଜନା ବିଶ୍ୱାଳ ଅଭିଯୋଗ କରିଥିଲେ ଯେ, ଗତ ଜାନୁୟାରୀ ୧୯ ତାରିଖ ସନ୍ଧ୍ୟା ୬ଟାରେ ୩ଜଣ ଦୁର୍ବୃତ୍ତ ତାଙ୍କ କବାଟ ବାଡ଼େଇଥିଲେ। କବାଟ ଖୋଲିବା ମାତ୍ରେ ଘରେ ପଶିିି ବନ୍ଧୁକ ଦେଖାଇ ୨ଟି ସୁନାଚେନ ଏବଂ ନଗଦ ୪୦ହଜାର ଟଙ୍କା ଲୁଟି ନେଇଥିଲେ। ଏ ନେଇ ଥାନାରେ ଆଇପିସି ଦଫା ୪୫୭, ୩୯୪,୨୫ ଓ ୨୭ ଆମର୍ସ ଆକ୍ଟରେ କେସ୍ ନମ୍ବର ୧୩/୨୦ ରୁଜୁ ହୋଇଥିଲା। ଏଭଳି ଅଭିଯୋଗ ମିଳିବା ପରେ ଏସ୍ପିଙ୍କ ନେତୃତ୍ୱରେ ପୋଲିସ ବିଭିନ୍ନ ସ୍ଥାନରେ ତଦନ୍ତ ଜାରି ରଖିଥିଲା। ଏମାନେ ବନ୍ଦ ଘରକୁ ଟାର୍ଗେଟ କରିଥାନ୍ତି। ନିକଟରେ ରାତ୍ର ପାଟ୍ରୋଲିଂ ବେଳେ ଜଣେ ଅଭିଯୁକ୍ତଙ୍କୁ ପୁରୀ ପୋଲିସ ଧରିଥିଲା। ତାଙ୍କୁ ପଚରାଉଚୁରା ବେଳେ ସେମାନେ ବିଭିନ୍ନ ଥାନା ଅଞ୍ଚଳରେ ଘଟିଥିବା ଚୋରିରେ ସମ୍ପୃକ୍ତ ଥିବା ସ୍ବୀକାର କରିଥିଲେ।
