ନୂଆଦିଲ୍ଲୀ/ଶ୍ରୀନଗର,୧୮ା୯: ଜମ୍ମୁ-କଶ୍ମୀରର ସ୍ବାୟତ୍ତତା ପ୍ରତ୍ୟାହାରକୁ ମଙ୍ଗଳବାର ୪୪ ଦିନ ପୂରିଛି। ଅଗଷ୍ଟ ୫ରେ କେନ୍ଦ୍ର ସରକାର ନେଇଥିବା ଏହି ନିଷ୍ପତ୍ତି ପରେ ସ୍ଥିତି କ୍ରମଶଃ ସ୍ବାଭାବିକ ହେବାରେ ଲାଗିଛି ବୋଲି ଉଭୟ କେନ୍ଦ୍ର ସରକାର ଓ ଜମ୍ମୁ-କଶ୍ମୀର ପ୍ରଶାସନ ଦାବି କରୁଥିବାବେଳେ ଅନ୍ତର୍ଜାତୀୟ ଗଣମାଧ୍ୟମ ଏହାର ଓଲଟା ଚିତ୍ର ସାମ୍ନାକୁ ଆଣିବାରେ ଲାଗିଛି। ବ୍ୟବସାୟୀଙ୍କୁ ଦୋକାନବଜାର ବନ୍ଦ ରଖିବାକୁ ଆତଙ୍କବାଦୀମାନେ ବାରମ୍ବାର ଧମକ ଦେଇଆସୁଥିବାବେଳେ ସେନା ପକ୍ଷରୁ ଦୋକାନ ବଜାର ଖୋଲା ରଖିବାକୁ ଅନୁରୋଧ କରାଯାଉଛି। ଏଭଳି ସ୍ଥିତିରେ ଅଧିକାଂଶ ସ୍ଥାନରେ ଔଷଧ ଓ ଅନ୍ୟ ଅତ୍ୟାବଶ୍ୟକ ସାମଗ୍ରୀ ମଧ୍ୟ ମିଳୁନାହିଁ। ଯାନବାହନ ଚଳାଚଳ ସମଗ୍ର ଉପତ୍ୟକାରେ ବାଧାପ୍ରାପ୍ତ ହୋଇ ରହିଛି। ସ୍କୁଲଗୁଡ଼ିକୁ ଖୋଲାଯାଉଥିଲେ ବି ଛାତ୍ରୀଛାତ୍ରଙ୍କୁ ପାଠ ପଢ଼ିବା ପାଇଁ ସେମାନଙ୍କ ମା’ବାପା ସୁରକ୍ଷିତ ମଣୁନାହାନ୍ତି। ସେହିପରି ସରକାରୀ ଅଫିସ୍ଗୁଡ଼ିକ ଖୋଲା ରହୁଥିଲେ ହେଁ ସାଧାରଣ ପରିବହନରେ ଅବ୍ୟବସ୍ଥା ଯୋଗୁ କର୍ମଚାରୀ କିମ୍ବା କାମ ପାଇଁ ଲୋକେ ଯାଉନାହାନ୍ତି। ଅଧିକାଂଶ ସ୍ଥାନରେ ଲ୍ୟାଣ୍ଡଲାଇନ୍ ଟେଲିଫୋନ୍ ସେବାକୁ ସ୍ବାଭାବିକ କରାଯାଇଛି। ହେଲେ ମୋବାଇଲ୍ ଫୋନ୍ରେ କଥାହେବା ପାଇଁ ଉପତ୍ୟକାବାସୀ ଏଯାଏ ସୁଯୋଗ ପାଇନାହାନ୍ତି। ଇଣ୍ଟରନେଟ ସେବା ଏକପ୍ରକାର ସ୍ବପ୍ନ ହୋଇଯାଇଛି। ୩ ପୂର୍ବତନ ମୁଖ୍ୟମନ୍ତ୍ରୀ ମେହବୁବା ମୁଫ୍ତି, ଫାରୁକ୍ ଅବ୍ଦୁଲ୍ଲା ଓ ଓମାର ଅବ୍ଦୁଲ୍ଲାଙ୍କ ସମେତ ବହୁନେତା ଏବେ ମଧ୍ୟ ଗୃହବନ୍ଦୀ ଅଥବା ଗିରଫ ହୋଇ ରହିଛନ୍ତି। ବିଚ୍ଛିନ୍ନତାବାଦୀଙ୍କୁ ଅଘଟଣ ଏଡାଇବା ପାଇଁ ଜେଲ୍ରେ ପୂରାଇ ଦିଆଯାଇଛି। ଏସବୁ ଅବ୍ୟବସ୍ଥାକୁ ନେଇ କଶ୍ମୀରୀମାନେ ଫସିଯାଇଛନ୍ତି।
ଅନୁପ୍ରବେଶ କଲେଣି ୬୦ ଆତଙ୍କବାଦୀ
ଅଗଷ୍ଟ ୫ରେ ଜମ୍ମୁ-କଶ୍ମୀରର ସ୍ବତନ୍ତ୍ର ମାନ୍ୟତା ପ୍ରତ୍ୟାହାର ପରଠାରୁ ଉପତ୍ୟକାକୁ ୬୦ ଆତଙ୍କବାଦୀ ଅନୁପ୍ରବେଶ କରିଛନ୍ତି। ପାକିସ୍ତାନୀ ସେନା ସେମାନଙ୍କୁ ନିଷ୍କ୍ରିୟ ପଥ ଦେଇ ଅନୁପ୍ରବେଶ କରାଇଛି। ଉତ୍ତର କଶ୍ମୀର ଏବଂ ଜମ୍ମୁ ଅଞ୍ଚଳର ପୁଞ୍ଚ୍ ଓ ରାଜୌରୀ ସଂଲଗ୍ନ ନିୟନ୍ତ୍ରଣରେଖା (ଏଲ୍ଓସି)ରେ ରହିଥିବା ନିଷ୍କ୍ରିୟ ପଥ ଦେଇ ସର୍ବାଧିକ ଆତଙ୍କବାଦୀ ଆସିଥିବା ମଙ୍ଗଳବାର ଜଣେ ଅଧିକାରୀ ସୂଚନା ଦେଇଛନ୍ତି। ତେବେ ଏନେଇ ସେନା ପକ୍ଷରୁ ଆନୁଷ୍ଠାନିକ ଭାବେ କିଛି କୁହାଯାଇନାହିଁ। ପ୍ରକାଶ ଯେ, କେତେଜଣ ଆତଙ୍କବାଦୀ ଅନୁପ୍ରବେଶରେ ସଫଳ ହୋଇଥିବାବେଳେ ଆଉ କେତେକଙ୍କ ଉଦ୍ୟମକୁ ପଣ୍ଡ କରାଯାଇଥିବା ଜମ୍ମୁ-କଶ୍ମୀର ପୋଲିସ ମହାନିର୍ଦ୍ଦେଶକ ନିକଟରେ ସ୍ବୀକାର କରିଥିଲେ।
