ଢେଙ୍କାନାଳ ଅଫିସ, ୧୩ା୧୦ – ଗଣପର୍ବ ଲକ୍ଷ୍ମୀପୂଜାକୁ ନେଇ ଉତ୍ସବମୁଖର ହୋଇଉଠିଛି ଢେଙ୍କାନାଳ। ରଙ୍ଗିନ ଆଲୋକମାଳାରେ ଝଲସୁଛି ସହର। ସବୁଠି ଉତ୍ସାହ ଉଦ୍ଦୀପନା। ମା’ଙ୍କ ଅପେକ୍ଷାରେ ପୂଜାମଣ୍ଡପ। ରବିବାର ରାତିରୁ ମା’ ଧନଦାତ୍ରୀ ଧରାବରଣ କରିବେ। ଏହାକୁ ନେଇ ସମସ୍ତ ପ୍ରସ୍ତୁତି ଶେଷ ହୋଇଥିବାବେଳେ ମୃଣ୍ମୟୀ ମୂର୍ତ୍ତିକୁ ଶେଷ ସ୍ପର୍ଶ ଦେଉଛନ୍ତି କାରିଗର।
ପବିତ୍ର କୁମାର ପୂର୍ଣ୍ଣିମା ତିଥିରୁ ମଣ୍ଡପରେ ଦର୍ଶନ ଦେବେ ସିନ୍ଧୁସୂତା। ୨୩ ତାରିଖ ଯାଏ ପୂଜା ଉତ୍ସବ ଅନୁଷ୍ଠିତ ହେବ। ୨୪ ତାରିଖରେ ଧରାପୃଷ୍ଠରୁ ବିଦାୟ ନେବେ ମା’। ଚଳିତବର୍ଷ ୩୮ ମଣ୍ଡପରେ ପୂଜା ଅନୁଷ୍ଠିତ ହେଉଛି। ଜବାହରଚୌକ ପୂଜା ପ୍ରତିଷ୍ଠାନ ୭୫ବର୍ଷ ଏବଂ କୋରିଅଁାସ୍ଥିତ ସ୍ବପ୍ନେଶ୍ୱର ବଜାର ୫୦ବର୍ଷ ପୂର୍ତ୍ତି ଉତ୍ସବ ପାଳନ କରୁଛନ୍ତି। ମିନାବଜାର, କୈବଲ୍ୟ ବଜାର, ଗଣେଶ ବଜାର, ଗୁଡିଆନାଳୀ ପ୍ରମୁଖ ପୂଜା ଅନୁଷ୍ଠାନ ପକ୍ଷରୁ ଚାନ୍ଦିମେଢ଼ କରାଯାଉଛି। ପୂଜା ଉତ୍ସବକୁ ଅଧିକ ଆକର୍ଷଣୀୟ କରିବା ପାଇଁ ପୂଜା କମିଟି କର୍ମକର୍ତ୍ତା ଲାଗିପଡ଼ିଛନ୍ତି। ଅଧିକାଂଶ ସ୍ଥାନରେ ଐତିହ୍ୟ, ପରମ୍ପରାକୁ ମଣ୍ଡପରେ ସ୍ଥାନିତ କରିଛନ୍ତି। ତଦନୁଯାୟୀ ମୂର୍ତ୍ତି, ପାର୍ଶ୍ୱମୂର୍ତ୍ତି ନିର୍ମାଣ ହୋଇଛି। ସୁଉଚ୍ଚ ତୋରଣ ସାଙ୍ଗକୁ ରଙ୍ଗିନ ଆଲୋକମାଳା ସହର ଇନ୍ଦ୍ରପୁରୀର ଭ୍ରମ ସୃଷ୍ଟି କରିଛି। ପୂଜା ପାଇଁ ଶତାଧିକ ଉଠାଦୋକାନୀ ପସରା ମେଲାଇଲେଣି। ମନୋରଞ୍ଜନ ଲାଗି ମିନାବଜାର ମଧ୍ୟ ଖୋଲିଲାଣି।
ଲକ୍ଷ୍ମୀପୂଜା ଅବସରରେ ମହିଷାପାଟ ପଡ଼ିଆରେ ପ୍ରଥମ ଥର ପାଇଁ ଜାତୀୟସ୍ତରୀୟ ସରସ ମେଳା ଆୟୋଜନ କରାଯାଉଛି। ଏହି ମେଳା ୧୪ ତାରିଖରୁ ଆରମ୍ଭ ହୋଇ ୨୩ ଯାଏ ଚାଲିବ। ଗ୍ରାମାଞ୍ଚଳର କାରିଗରଙ୍କ ଦ୍ୱାରା ହସ୍ତଶିଳ୍ପ, ଘରୋଇ ଉପକରଣ ସାମଗ୍ରୀ ସହିତ ସ୍ବାଦିଷ୍ଟ ଖାଦ୍ୟ ଷ୍ଟଲ ପ୍ରଦର୍ଶିତ ହେବ। ସେହିପରି ୧୭ରୁ ୧୯ ତାରିଖ ଯାଏ ମହିଷାପାଟ ପଡ଼ିଆଠାରେ ଜିଲା କଳା ସଂସ୍କୃତି ସଂଘ ଆନୁକୂଲ୍ୟରେ ୩ ଦିନିଆ ଜିଲାସ୍ତରୀୟ ଲୋକକଳା ମହୋତ୍ସବ ଆୟୋଜିତ ହେବ। ଏଥିଲାଗି ମଧ୍ୟ ପ୍ରସ୍ତୁତି ଚୂଡାନ୍ତ ପର୍ଯ୍ୟାୟରେ ପହଞ୍ଚତ୍ଛି।
ସୂଚନାଯୋଗ୍ୟ, ଢେଙ୍କାନାଳର ଐତିହ୍ୟସମ୍ପନ୍ନ ଲକ୍ଷ୍ମୀପୂଜା ୧୯୪୨ରୁ ସାର୍ବଜନୀନ ଭାବେ ଆରମ୍ଭ ହୋଇଛି। ପ୍ରଥମେ ମିନାବଜାର ଏବଂ ଏହାପରେ ଜବାହରଚୌକ, ଲକ୍ଷ୍ମୀବଜାର, ଗଣେଶ ବଜାର, ମହାବୀର ବଜାର ସମେତ ଅନ୍ୟ ପୂଜା ପ୍ରତିଷ୍ଠାନ ଏଥିରେ ସାମିଲ ହୋଇଛନ୍ତି। ଛାମୁଣ୍ଡିଆରୁ ଆରମ୍ଭ ହୋଇଥିବା ପୂଜା ଏବେ ପ୍ରତିଯୋଗିତାମୂଳକ ହେଲାଣି। ଏଥିରେ ଅଜସ୍ର ଟଙ୍କା ଖର୍ଚ୍ଚ ହେଉଛି।
