ଭୁବନେଶ୍ୱର, ୨୯।୪(ବ୍ୟୁରୋ): କରୋନାକୁ ମୁକାବିଲା କରିବା ପାଇଁ ଏବେ ରାଜ୍ୟର ସବୁ ବିଭାଗ ଏକତ୍ର ହୋଇ କାର୍ଯ୍ୟ କରୁଛି। ରାଜ୍ୟବାସୀଙ୍କୁ କରୋନା କବଳରୁ କିପରି ରକ୍ଷା କରାଯାଇପାରିବ ତାହା ହିଁ ଏବେ ରାଜ୍ୟ ସରକାରଙ୍କ ମୁଖ୍ୟ ଲକ୍ଷ୍ୟ ହୋଇଛି। ଶୀଘ୍ର ନମୁନା ପରୀକ୍ଷା ପାଇଁ ଆସନ୍ତା ୨ମାସ ଭିତରେ ରାଜ୍ୟର ଆଉ ୩ଟି ସ୍ଥାନରେ ଉଚ୍ଚ କ୍ଷମତା ସମ୍ପନ୍ନ କୋଭାସ୍ ମେଶିନ ସ୍ଥାପନ କରିବାକୁ ନିଷ୍ପତ୍ତି ନିଆଯାଇଛି। ବର୍ତ୍ତମାନ ରାଜ୍ୟରେ କେବଳ ଭୁବନେଶ୍ୱରସ୍ଥିତ ଆର୍ଏମ୍ଆର୍ସିରେ ଏହି କୋଭାସ୍ ମେଶିନ ରହିଛି। ତେବେ ଆଗକୁ ବଲାଙ୍ଗୀର, କୋରାପୁଟ ଏବଂ ବାଲେଶ୍ୱରରେ ଥିବା ସରକାରୀ ମେଡିକାଲ କଲେଜ ଓ ହସ୍ପିଟାଲରେ ଏହି ମେଶିନ ସ୍ଥାପନ କରାଯିବ ବୋଲି ଶିଳ୍ପ ବିଭାଗ ସଚିବ ହେମନ୍ତ ଶର୍ମା କହିଛନ୍ତି।
କରୋନା ମୁକାବିଲା ପାଇଁ ଧନ, ଜନ, ଜ୍ଞାନ ବଳରେ ଥିବା ଦେଶମାନେ ମଧ୍ୟ ସାମଗ୍ରୀ ବଳରେ ପଛରେ ପଡ଼ି ଯାଉଛନ୍ତି। ଏପରିସ୍ଥିତିରେ ଛୁଞ୍ଚିଠାରୁ ପିପିଇ, ମାସ୍କଠାରୁ ସାନିଟାଇଜର୍ ଏବଂ ଭିଟିଏମ୍ କିଟ୍ଠାରୁ ଭେଣ୍ଟିଲେଟର ପର୍ଯ୍ୟନ୍ତ ଅତ୍ୟାବଶ୍ୟକ ସାମଗ୍ରୀକୁ ନେଇ ଓଡ଼ିଶାର ସ୍ଥିତି କ’ଣ ରହିଛି ସେନେଇ ରାଜ୍ୟ କୋଭିଡ୍-୧୯ ମୁଖ୍ୟ ମୁଖପାତ୍ର ସୁବ୍ରତୋ ବାଗ୍ଚୀ ଏକ ପ୍ରଶ୍ନ ରଖିଥିଲେ। ଉତ୍ତରରେ ରାଜ୍ୟ ଅତ୍ୟାବଶ୍ୟକ ଚିକିତ୍ସା ସାମଗ୍ରୀ ଓ ଉପକରଣ ଯୋଗାଣ ଦାୟିତ୍ୱରେ ଥିବା ହେମନ୍ତ ଶର୍ମା କହିଥିଲେ, କରୋନା ମୁକାବିଲା ପାଇଁ ଆଗୁଆ ୬ ମାସର ଯୋଜନା ପ୍ରସ୍ତୁତ କରାଯାଇଛି। ଏପରିକି କରୋନା ଯୁଦ୍ଧରେ ବିଜୟ ପାଇଁ ଅତ୍ୟାବଶ୍ୟକ ଚିକିତ୍ସା ସାମଗ୍ରୀ କମ୍ ସମୟରେ ପହଞ୍ଚାଇବା କାର୍ଯ୍ୟକୁ ତିନି ଭାଗରେ ବିଭକ୍ତ କରାଯାଇଛି। ପ୍ରଥମଟି ହେଲା ମେଡିସିନ, ଦ୍ୱିତୀୟଟି ହେଲା ଭେଣ୍ଟିଲେଟରଠାରୁ ଆରମ୍ଭ କରି କୋଭିଡ୍ ହସ୍ପିଟାଲର ଅତ୍ୟାବଶ୍ୟକ ସାମଗ୍ରୀ ଏବଂ ତୃତୀୟ ହେଲା ଟେଷ୍ଟିଂ ସରଞ୍ଜାମ। ପ୍ରତିଦିନ ଗ୍ରୁପ୍ କଲ୍ ମାଧ୍ୟମରେ ଏହି କାର୍ଯ୍ୟକୁ ଆଗେଇ ନିଆଯାଉଛି। କେଉଁଠୁ ଆସିବ ଏବଂ କେମିତି ଆସିବ ସେନେଇ ବିତରକମାନଙ୍କ ସହ ଆଲୋଚନା କରାଯାଉଛି। ନମୁନା ପରୀକ୍ଷଣକୁ ଦ୍ୱିଗୁଣ କରିବାକୁ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକୁ ଅଧିକ ପ୍ରାଥମିକତା ଦିଆଯାଇ ପଦକ୍ଷେପ ନିଆଯାଉଛି। ତେଣୁ କୋଭାସ୍ ମେଶିନ କାର୍ଯ୍ୟକ୍ଷମ ହେବାପରେ ହିଁ ଦିନକୁ ଓଡ଼ିଶାରେ ୨୫୦୦ ଟେଷ୍ଟିଂ କରିବାକୁ ସମ୍ଭବ ହେଉଛି ବୋଲି ହେମନ୍ତ ଶର୍ମା କହିଛନ୍ତି।
