ଦୁବାଇ, ୧୨।୧୧(ପି.ଟି.)- ବାଂଲାଦେଶ ବିପକ୍ଷ ଅନ୍ତିମ ତଥା ୩ୟ ଟି୨୦ ମ୍ୟାଚ୍ରେ ୭ ରନ୍ରେ ୬ ଉଇକେଟ୍ ଅକ୍ତିଆର କରି ବିଶ୍ୱ ରେକର୍ଡ କରିଥିବା ଭାରତୀୟ ଦ୍ରୁତ ବୋଲର ଦୀପକ ଚହରଙ୍କ ମାନ୍ୟତାରେ ଆଖିଦୃଶିଆ ଉନ୍ନତି ଘଟିଛି। ଅନ୍ତର୍ଜାତୀୟ କ୍ରିକେଟ୍ ପରିଷଦ (ଆଇସିସି) ପକ୍ଷରୁ ସଦ୍ୟ ପ୍ରକାଶିତ ଟି୨୦ ବୋଲିଂ ର଼୍ୟାଙ୍କିଙ୍ଗ୍ରେ ଦୀପକ ଏକାବେଳେ ୮୮ଟି ପାହାଚ ଉପରକୁ ଉଠି ୪୨ତମ ସ୍ଥାନରେ ରହିଛନ୍ତି। ବାଂଲାଦେଶ ବିପକ୍ଷରେ ରବିବାର ନାଗପୁରରେ ଖେଳାଯାଇଥିବା ୩ୟ ଟି୨୦ରେ ଚହର ତାଙ୍କ ୪ ଓଭର ସ୍ପେଲ୍ରେ ୭ ରନ ବ୍ୟୟକରି ୬ ଉଇକେଟ୍ ନେଇଥିଲେ, ଯେଉଁଥିରେ ଏକ ହ୍ୟାଟ୍ରିକ ସାମିଲ ରହିଛି। ଏଥିସହ ଟି୨୦ କ୍ରିକେଟ୍ରେ ପ୍ରଥମ ଭାରତୀୟ ଭାବେ ସେ ହ୍ୟାଟ୍ରିକ ନେବାର କୃତିତ୍ୱ ହାସଲ କରିଛନ୍ତି। ଚହରଙ୍କ ଏହି ମାରାତ୍ମକ ସ୍ପେଲ୍ ଯୋଗୁ ଭାରତ ୩୦ ରନ୍ରେ ମ୍ୟାଚ୍କୁ ଜିତିବା ସହ ସିରିଜ ୨-୧ରେ ହାତେଇ ନେଇଛି।
ବୋଲିଂ ବିଭାଗରେ ସ୍ଲୋ ବୋଲରଙ୍କ ରାଜୁତି ଦେଖିବାକୁ ମିଳିଛି। ଶ୍ରେଷ୍ଠ-୫ ତଥା ଶ୍ରେଷ୍ଠ-୯ ଜଣଙ୍କ ମଧ୍ୟରେ ୮ଜଣ ସ୍ପିନର ରହିଛନ୍ତି। ନ୍ୟୁଜିଲାଣ୍ଡର ମିଚେଲ ସାଣ୍ଟନର ତାଲିକାରେ ଆଫଗାନିସ୍ତାନର ରଶିଦ ଖାଁଙ୍କ ପଛକୁ ୨ୟ ସ୍ଥାନରେ ରହିଛନ୍ତି। ଅପରପକ୍ଷରେ ବ୍ୟାଟିଂ ତାଲିକାରେ ‘ହିଟ୍ମ୍ୟାନ’ ଭାବେ ପରିଚିତ ରୋହିତ୍ ଶର୍ମା ୭ମ ସ୍ଥାନରେ ଅପରିବର୍ତ୍ତିତ ରହିଛନ୍ତି। ସେହିଭଳି ରବିବାର ଅର୍ଦ୍ଧଶତକୀୟ ଇନିଂସ୍ ଖେଳିଥିବା ଲୋକେଶ ରାହୁଲ ଗୋଟିଏ ପାହାଚ ଉପରକୁ ଉଠି ୮ମ ସ୍ଥାନ ଲାଭ କରିଛନ୍ତି। ଇଂଲଣ୍ଡର ଡେଭିଡ୍ ମଲାନ ତାଲିକାର ୩ୟ ସ୍ଥାନକୁ ଉଠିଛନ୍ତି। ପାକିସ୍ତାନର ବାବର ଆଜାମ ଓ ଅଷ୍ଟ୍ରେଲିଆର ବିସ୍ଫୋରକ ବ୍ୟାଟ୍ସମ୍ୟାନ ଆରୋନ ଫିଞ୍ଚ୍ ଯଥାକ୍ରମେ ତାଲିକାର ପ୍ରଥମ ଓ ୨ୟ ସ୍ଥାନରେ ରହିଛନ୍ତି। ଇଂଲଣ୍ଡ ଅଧିନାୟକ ଇଅନ ମୋର୍ଗାନ ଓ ନ୍ୟୁଜିଲାଣ୍ଡ ଓପ୍ନର ମାର୍ଟିନ ଗୁପ୍ଟିଲ ଯୁଗ୍ମଭାବେ ୯ମ ସ୍ଥାନରେ ରହିଥିବାବେଳେ ଜନ୍ନୀ ବେୟାରଷ୍ଟୋ ପ୍ରଥମଥର ଲାଗି ଶ୍ରେଷ୍ଠ-୪୦ ମଧ୍ୟରେ ପ୍ରବେଶ କରିଛନ୍ତି। ଅଲ୍ରାଉଣ୍ଡ ତାଲିକାରେ ଅଷ୍ଟ୍ରେଲିଆର ଗ୍ଲେନ୍ ମ୍ୟାକ୍ସଓ୍ବେଲଙ୍କୁ ପଛରେ ପକାଇ ଆଫଗାନିସ୍ତାନର ମହମ୍ମଦ ନବି ଶୀର୍ଷସ୍ଥାନ ହାସଲ କରିଛନ୍ତି। ସେହିଭଳି ଟିମ୍ ତାଲିକାରେ ପାକିସ୍ତାନ, ଅଷ୍ଟ୍ରେଲିଆ, ଇଂଲଣ୍ଡ, ଦକ୍ଷିଣ ଆଫ୍ରିକା ଓ ଭାରତ ଯଥାକ୍ରମେ ଶ୍ରେଷ୍ଠ-୫ ମଧ୍ୟରେ ରହିଛନ୍ତି। ନିକଟରେ ଅଷ୍ଟ୍ରେଲିଆ-ପାକିସ୍ତାନ, ନ୍ୟୁଜିଲାଣ୍ଡ-ଇଂଲଣ୍ଡ ଏବଂ ଭାରତ ଓ ବାଂଲାଦେଶ ମଧ୍ୟରେ ସିରିଜ ଶେଷ ହେବାପରେ ଆଇସିସି ପକ୍ଷରୁ ଏହି ର଼୍ୟାଙ୍କିଙ୍ଗ୍ ପ୍ରକାଶ କରାଯାଇଛି।
