ଢେଙ୍କାନାଳ ଅଫିସ,୩।୮ଢେଙ୍କାନାଳ ଭାରତୀୟ ଜନସଞ୍ଚାର ସଂସ୍ଥାନ (ଆଇଆଇଏମ୍ସି)ରେ ଶୁକ୍ରବାରଠାରୁ ୨୦୧୯-୨୦ ଶିକ୍ଷାବର୍ଷ ଲାଗି ଉଭୟ ଇଂଲିଶ ଏବଂ ଓଡ଼ିଆ ସାମ୍ବାଦିକତା ସ୍ନାତକୋତ୍ତର ଡିପ୍ଲୋମା ବିଭାଗରେ ପାଠପଢ଼ା ଆରମ୍ଭ ହୋଇଛି। ଏହି ଉପଲକ୍ଷେ ଆୟୋଜିତ କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ଯୋଗଦେଇ ବିଶିଷ୍ଟ ଶିକ୍ଷାବିତ୍ ସୁବୀର ଘୋଷ କହିଲେ, ସମ୍ପ୍ରତି ସାରା ଦେଶରେ ମୂଲ୍ୟବୋଧଭିତ୍ତିକ ସାମ୍ବାଦିକତା ଜରୁରୀ ହୋଇପଡ଼ିଛି। ଏଥିପାଇଁ ପାଠ୍ୟକ୍ରମରେ ନାମ ଲେଖାଇଥିବା ଶିକ୍ଷାର୍ଥୀମାନେ ସଂକଳ୍ପ ନେବା ଆବଶ୍ୟକ। ସଂସ୍ଥାନର ଆଞ୍ଚଳିକ ନିର୍ଦ୍ଦେଶକ ଡ. ମୃଣାଳ ଚାଟ୍ଟାର୍ଜୀ କହିଲେ, ଶିକ୍ଷକମାନେ କେବଳ ରାସ୍ତା ଦେଖାଇବେ। ସେହି ରାସ୍ତାରେ ଚାଲିବା ପିଲାମାନଙ୍କ କାମ। ଅନୁଷ୍ଠାନରେ ପାଠପଢ଼ା ସହିତ ବ୍ୟବହାରିକ ଦିଗକୁ ମଧ୍ୟ ଗୁରୁତ୍ୱ ଦିଆଯାଉଛି। ଛାତ୍ରୀଛାତ୍ରମାନେ ସମୟର ଠିକ୍ ବିନିଯୋଗ କରିବା ଆବଶ୍ୟକ। ଦୃଢ଼ ଇଚ୍ଛାଶକ୍ତି, ନିଷ୍ଠା, ଅଭ୍ୟାସ ଦ୍ୱାରା ଜଣେ ଭଲ ସାମ୍ବାଦିକ ହୋଇପାରିବ ବାଲି ସେ ପରାମର୍ଶ ଦେଇଥିଲେ।
ପ୍ରଥମ ଦିବସରେ ଛାତ୍ରୀଛାତ୍ରମାନେ କପିଳାସ ପୀଠରୁ ରିପୋର୍ଟଂ ଜୀବନର ଆରମ୍ଭ କରିଛନ୍ତି। ସଂସ୍ଥାନ ପରିସରରେ ଅଗଷ୍ଟ ୫ରେ ଓଡ଼ିଆ ସାମ୍ବାଦିକତା ଦିବସ ପାଳନ କରାଯିବ। ଏହି ଅବସରରେ ‘ଭାରତର ସ୍ବାଧୀନତା ସଂଗ୍ରାମରେ ଭାଷାଭିତ୍ତିକ ଖବରକାଗଜ’ର ଭୂମିକା ଉପରେ ସ୍ବତନ୍ତ୍ର ବକ୍ତୃତା ପ୍ରତିଯୋଗିତା ଆୟୋଜିତ ହେବ ବୋଲି ସୂଚନା ଦିଆଯାଇଛି।
