ମୁମ୍ବାଇ: ବଲିଉଡ୍ର ଦଙ୍ଗଲ ଗର୍ଲ ଭାବେ ପରିଚିତ ଜାୟରା ୱାସିମ ଅଭିନୟ ଛାଡିବାର ୨ ବର୍ଷ ପରେ ସୋସିଆଲ ମିଡିଆରେ ତାଙ୍କର ଫଟୋ ଶେୟାର କରିଛନ୍ତି । ଜାୟରାଙ୍କ ଏହି ଫଟୋ ଦେଖି ପ୍ରଶଂସକ ବହୁତ ରିଆକ୍ସନ ଦେଉଥିବା ଦେଖାଯାଇଛି । ଏହି ଫଟୋ ଶେୟାର କରି ଜାୟରା ଲେଖିଛନ୍ତି, ଅକ୍ଟୋବରରେ ଏତେ ଖରା । ଜାୟରାଙ୍କ ଏହି ଫଟୋକୁ ପ୍ରଶଂସକମାନେ ବେଶ୍ ପସନ୍ଦ କରୁଛନ୍ତି । ଅଭିନେତ୍ରୀ ପୋଲ ଉପରେ ଠିଆ ହୋଇଥିବାର ଏକ ଫଟୋ ଶେୟାର କରିଛନ୍ତି । ଖୁବ୍ କମ୍ ଦିନ ପାଇଁ ବଲିଉଡକୁ ଆସିଥିବା ଜାୟରା କିନ୍ତୁ ଏବେବି ପ୍ରଶଂସକଙ୍କ ହୃଦୟରେ ରହିଛନ୍ତି । ସେ ‘ଦଙ୍ଗଲ’, ‘ସିକ୍ରେଟ ସୁପରଷ୍ଟାର’ ଓ ‘ଦ ସ୍କଏ ପିଙ୍କ’ ରେ କାମ କରି ସାରିଛନ୍ତି । ଦୁଇବର୍ଷ ପୂର୍ବେ ଯେତେବେଳେ ସେ ଅଭିନୟ ଛାଡିବା କଥା ଘୋଷଣା କରିଥିଲେ ସେତେବେଳେ ସମସ୍ତେ ଚମକି ପଡିଥିଲେ । ଜାୟରା କହିଥିଲେ ଅଭିନୟ କ୍ଷେତ୍ରରେ ମୋତେ ସମ୍ପୂର୍ଣ୍ଣ ସହଯୋଗ ମିଳିଛି । ହେଲେ ଏହି ରାସ୍ତା ମୋତେ ଅଜ୍ଞାନତାର ଅନ୍ଧାର ଭିତରକୁ ଠେଲି ଦେଉଛି । ତେଣୁ ମୁଁ ଅଭିନୟ ଛାଡିବାକୁ ନିଷ୍ପତ୍ତି ନେଇଛି ବୋଲି ଜାୟରା ଲେଖିଥିଲେ ।
