ମୁମ୍ବାଇ, ୨୧।୪-କରୋନା ଭାଇରସ୍ ସଂକ୍ରମଣ ଜନିତ ଲକ୍ଡାଉନ୍ ସ୍ଥିତିରେ ଏବେ ବିଶେଷ କାର୍ଯ୍ୟ ନ ଥିଲେ ଘରୁ ବାହାରିବା ମନା। ଅତ୍ୟାବଶ୍ୟକ ସାମଗ୍ରୀ ବ୍ୟତୀତ ଅନ୍ୟ ସବୁ ଉପରେ କଟକଣା। ତେଣୁ ଘରେ ଏକ ପ୍ରକାର ବନ୍ଦ ହୋଇ ରହିଥିବା ଖେଳାଳିମାନେ ନିଜ କାମ ନିଜେ କରିବାକୁ ପସନ୍ଦ କରୁଛନ୍ତି। ଏପରି ଏକ କାର୍ଯ୍ୟକରି ଏବେ ଚର୍ଚ୍ଚାରେ ରହିଛନ୍ତି ୪୬ବର୍ଷୀୟ କ୍ରିକେଟ ଲିଜେଣ୍ଡ ସଚିନ ତେନ୍ଦୁଲକର। ସେ ପରିବାରର କୌଣସି ସଦସ୍ୟଙ୍କୁ ଭରସା କରିବା ଅପେକ୍ଷା ନିଜ ଚୁଟି ନିଜେ କାଟିଛନ୍ତି। ଏକଦା କ୍ରିକେଟ ପଡ଼ିଆରେ ଅପର୍ କଟ୍, ସ୍କୋୟାର କଟ୍ ମାରି ଦର୍ଶକଙ୍କୁ ଉଲ୍ଲସିତ କରୁଥିବା ସଚିନ ଏବେ ନିଜେ ଦର୍ପଣ ସମ୍ମୁଖରେ କଇଞ୍ଚତ୍ ଧରି ନୂଆ ହେୟାର କଟ୍ ବନଉଥିବା ଭିଡିଓ ସୋସିଆଲ ମିଡିଆରେ ଦେଖିବାକୁ ମିଳୁଛି। ନିଜେ ଚୁଟି କାଟୁଥିବାର ଏକାଧିକ ଫଟୋ ସଚିନ ସୋସିଆଲ ମିଡିଆରେ ଶେୟାର କରିଛନ୍ତି। ଏହାର କ୍ୟାପ୍ଶନରେ ସେ ”ସ୍କୋୟାର କଟ୍ଠାରୁ ଆରମ୍ଭ କରି ନିଜ ହେୟାର କଟ୍ ପର୍ଯ୍ୟନ୍ତ ବିଭିନ୍ନ କାର୍ଯ୍ୟ କରିବାରେ ମୁଁ ଆନନ୍ଦ ଅନୁଭବ କରେ“ ବୋଲି ସଚିନ ଲେଖିଛନ୍ତି। ପ୍ରଥମ ୨ଟି ଫଟୋରେ ଲିଟିଲ ମାଷ୍ଟର ଏକ ହାତକଟା ଗ୍ରୀନ୍ ଜର୍ସି ପିନ୍ଧି ଚୁଟି କାଟୁଥିବା ଦେଖାଯାଉଛି। ପରବର୍ତ୍ତୀ ୨ଟି ଫଟୋରେ ସେ ଦର୍ପଣ ସମ୍ମୁଖରେ ହେୟାର କଟ୍କୁ ଦେଖୁଛନ୍ତି ଏବଂ କ୍ୟାମେରା ସମ୍ମୁୁଖରେ ହସୁଥିବା ପରିଲକ୍ଷିତ ହେଉଛି। ପ୍ରକାଶଯୋଗ୍ୟ ଯେ, ସଚିନ କ୍ରିକେଟରୁ ଅବସର ନେଇଥିଲେ ହେଁ ଏବେ ମଧ୍ୟ ଅନେକ କ୍ରିକେଟ ପ୍ରେମୀଙ୍କ ହୃଦୟରେ ରହିଛନ୍ତି। ନିଜେ ଚୁଟି କାଟିବା ଫଟୋ ଛାଡ଼ି ସଚିନ ସଚେତନତା ବାର୍ତ୍ତା ମଧ୍ୟ ଦେଇଛନ୍ତି। ସମସ୍ତେ ସାମାଜିକ ଦୂରତ୍ୱ ରକ୍ଷା କରିବା ଉଚିତ ବୋଲି ସେ ଅନ୍ୟ ଏକ କ୍ୟାପଶନରେ ଲେଖିଛନ୍ତି।
