ମୁମ୍ବାଇ: ବଲିଉଡ୍ରେ ରହିଛି ଅନେକ ପ୍ରେମ କାହାଣୀ। ଅର୍ଥାତ୍ ଏଠାରେ ପରଦାରେ ନାୟକ ନାୟିକାର ଭୂମିକାରେ ଆସିଥିବା କେତେଜଣ କଳାକାର ରିୟଲ ଲାଇଫରେ ପତ୍ନୀପତିଭାବେ ଗଢିଛନ୍ତି ନିଜ ନିଜର ସୁନ୍ଦର ସଂସାର। ହେମାମାଳିନୀ-ଧର୍ମେନ୍ଦ୍ର କୁହନ୍ତୁ ଅବା ଜୟା-ଅମିତାଭ। ହେଲେ ଏଠି ଏମିତିବି କେତେଜଣ କଳାକାର ଅଛନ୍ତି ଯେଉଁମାନଙ୍କ ପ୍ରେମ କାହାଣୀ ଅଧୁରା ହୋଇ ରହିଯାଇଛି। ଆଉ ଆଜିବି ଏହା ଆଲୋଚନା ହେଉଛି।
ସୁରୈୟା-ଦେବ ଆନନ୍ଦ
ବଲିଉଡ୍ରେ କ୍ୟାରିୟର ଆରମ୍ଭ କରିବା ଦିନରୁ ହିଁ ସୁରୈୟାଙ୍କୁ ଦେବ ଆନନ୍ଦଙ୍କ ଦିଲ୍ ଦେଇ ଦେଇଥିଲେ। ହେଲେ ଏହାକୁ ଗ୍ରହଣ କରି ନ ଥିଲେ ସୁରୈୟାଙ୍କ ଜେଜେମା। ଶେଷରେ ଘର ଲୋକଙ୍କ କଥାମାନି ନିଜ ପ୍ରେମକୁ ବଳି ପକାଇଥିଲେ ସୁରୈୟା। ଅବଶ୍ୟ ଏହାକୁ ଖୋଲାଖୋଲି ଭାବେ ଦେବ ସାହେବ ଏକ ସାକ୍ଷାତ୍କାରରେ କହିବା ସହ ବାୟୋଗ୍ରାଫିରେ ମଧ୍ୟ ଉଲ୍ଲେଖ କରିଛନ୍ତି।
ମଧୁବାଳା-ଦିଲ୍ଲୀପ କୁମାର
ପରଦାରେ ଅଭିନୟ କରୁ କରୁ ଏମାନେ ପଡିଥିଲେ ପ୍ରେମରେ। ହେଲେ ସଂସାର ଗଢିବାର ସ୍ବପ୍ନ ଏମାନଙ୍କର ପୂରଣ ହୋଇ ନ ଥିଲା। କାରଣ ମଧୁବାଳା-ଦିଲ୍ଲୀପ କୁମାରଙ୍କ ସମ୍ପର୍କକୁ ଗ୍ରହଣ କରି ନ ଥିଲେ ମଧୁବାଳାଙ୍କ ବାପା। ଅବଶ୍ୟ ଏକଥା ଦିଲ୍ଲୀପ କୁମାର ତାଙ୍କ ବାୟୋଗ୍ରାଫିରେ ଭଲ ଭାବେ ବର୍ଣ୍ଣନା କରିଛନ୍ତି।
ହେମାମାଳିନୀ-ସଞ୍ଜିବ କୁମାର
ଡ୍ରିମ୍ ଗର୍ଲଙ୍କ ପ୍ରେମରେ ପଡିଥିଲେ ୭୦ ଦଶକର ହ୍ୟାଣ୍ଡସମ୍ ନାୟକ ସଞ୍ଜିବ କୁମାର। ହେଲେ ସେତେବେଳକୁ ହେମା ପଡିଥିଲେ ହିମ୍ୟାନ୍ ଅର୍ଥାତ୍ ଧର୍ମେନ୍ଦ୍ରଙ୍କ ପ୍ରେମରେ। ତେଣୁ ସେ ଧର୍ମେନ୍ଦ୍ରଙ୍କୁ ହିଁ ବିବାହ କରିଥିଲେ। ଏପଟେ କିନ୍ତୁ ସାରା ଜୀବନ ଅବିବାହିତ ରହି ଯାଇଥିଲେ ସଞ୍ଜିବ କୁମାର।
ରେଖା-ଅମିତାଭ
ଏମାନଙ୍କ ପ୍ରେମ କାହାଣୀ ବଲିଉଡ୍ରେ ବେଶ୍ ଚର୍ଚ୍ଚିତ। ଏମିତିକି ଏମାନଙ୍କ ପ୍ରେମ କାହାଣୀକୁ ନେଇ ୟଶରାଜ ବ୍ୟାନରେ ମଧ୍ୟ ନିର୍ମାଣ ହୋଇଛି ଏକ ଫିଲ୍ମ। ଯାହାର ଗୀତ ଗୁଡିକ ଆଜିବି ସୁପର ହିଟ୍। ତେବେ ଅମିତାଭ ବି ଘର ଲୋକଙ୍କ କଥାକୁ ନ ଭାଙ୍ଗିପାରି କୁଆଡେ ରେଖାଙ୍କ ପ୍ରେମକୁ ଭୁଲି ଯାଇଥିଲେ ବୋଲି କୁହାଯାଏ। ଆଉ ତାଙ୍କ ଜୀବନରେ ଆସିଥିଲେ ଜୟା। ଯାହାଙ୍କୁ ନେଇ ସେ ଏବେ ଗଢିଛନ୍ତି ତାଙ୍କ ସୁନ୍ଦର ସଂସାର।
ଐଶ୍ୱର୍ଯ୍ୟା-ସଲମାନ
ନୀଳ ନୟନା ଐଶ୍ୱର୍ଯ୍ୟାଙ୍କ ପ୍ରେମରେ ପଡିଥିଲେ ବଲିଉଡ୍ ଭାଇଜାନ୍ ସଲମାନ। ଦୀର୍ଘ ୩ ବର୍ଷ ଧରି ଏମାନେ ପରସ୍ପରକୁ ଭଲପାଇ ବସିଥିଲେ। ହେଲେ ଶେଷରେ ସଲମାନଙ୍କ ବ୍ୟବହାରରେ ଅତିଷ୍ଠ ହୋଇ ଐଶ୍ୱର୍ଯ୍ୟା ତାଙ୍କଠାରୁ ଦୂରେଇ ଯାଇଥିଲେ। ଏମାନଙ୍କ ପ୍ରେମ କାହାଣୀ ମଧ୍ୟ ରହି ଯାଇଥିଲା ଅଧୁରା। ପରେ ଐଶ୍ୱର୍ଯ୍ୟା ସିନା ଗଢିଲେ ତାଙ୍କର ସଂସାର ହେଲେ ଭାଇଜାନ୍ ଆଜି ପର୍ଯ୍ୟନ୍ତ ଏକା ଏକା ହୋଇ ରହିଯାଇଛନ୍ତି।
