ସମ୍ବଲପୁର, ୩୦।୩ (ବ୍ୟୁରୋ)-କରୋନା ମୁକାବିଲା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆର୍ଥିକ ସହାୟତା ଯୋଗାଇ ଦେବାକୁ ଆହ୍ବାନ ଦେଇଛନ୍ତି। ଅନ୍ୟପକ୍ଷେ ନିଷ୍ଠାପର ସେବା ପାଇଁ ସ୍ବାସ୍ଥ୍ୟ ବିଭାଗ ଡାକ୍ତର, କର୍ମଚାରୀଙ୍କୁ ୪ ମାସର ଅଗ୍ରୀମ ଦରମା ଦେବାକୁ ଘୋଷଣା କରିଛନ୍ତି । ହେଲେ ଏଭଳି ସ୍ଥିତିରେ ବୀରସୁରେନ୍ଦ୍ର ସାଏ ମେଡିକାଲ ଆଣ୍ଡ ରିସର୍ଜ ସେଣ୍ଟର (ଭିମସାର) ଡାକ୍ତରମାନେ ମାନବିକତା ଦେଖାଇଛନ୍ତି। ପ୍ରାୟ ୨୪ଜଣ ଡାକ୍ତରଙ୍କ ସ୍ବାକ୍ଷରତପତ୍ର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ପଠାଇଛନ୍ତି। ଏଥିରେ ସେମାନେ ଉଲ୍ଲେଖ କରିଛନ୍ତି ଯେ, ସରକାର ଘୋଷଣାକୁ ସ୍ବାଗତ କରିଛୁ। ହେଲେ ସଙ୍କଟର ଏହି ସମୟରେ ଆମକୁ ଅଗ୍ରୀମ ଦରମା ଦିଆ ନ ଯାଉ । ଏକସମୟରେ ଏଭଳି ଦରମା ଦେଲେ ରାଜ୍ୟ ସରକାରଙ୍କ ଆର୍ଥିକ ବୋଝ ବଢ଼ିଯିବ। ନିୟମିତ ଭାବେ ଯେଭଳି ଦରମା ଦିଆଯାଉଥିଲା ସେହିଭଳି ଦିଆଯାଉ। ଡାକ୍ତରଙ୍କୁ ମାକ୍ସ, କରୋନା ମୁକାବିଲା ପାଇଁ ସୁରକ୍ଷା ସାମଗ୍ରୀ ଯୋଗାଇ ଦେବାକୁ ସ୍ମାରକପତ୍ରର ଉଲ୍ଲେଖ କରାଯାଇଛି। ସିନିୟର ଡା. ଶଙ୍କର ରାମଚନ୍ଦାନୀ, ବଳଦେବ କୌର, ଜିତେନ୍ଦ୍ର କୁମାର ପାଣିଗ୍ରାହୀ, ସୁମନ କୁମାର ସାହୁ, ବଳରାମ ଖମାରୀ, ଅନୀଲ ଦେ, ବିଜୟ କୁମାର ଦୋରା ପ୍ରମୁଖଙ୍କ ଏଥିରେ ସ୍ବାକ୍ଷର ରହିଛି ।
