ପ୍ୟାରିସ,୪ା୭: ଫ୍ରାନ୍ସ ରାଷ୍ଟ୍ରପତି ଇମାନୁଏଲ୍ ମାକ୍ରଁ ଶୁକ୍ରବାର ଜିନ୍ କାଷ୍ଟେକ୍ସଙ୍କୁ ଦେଶର ନୂଆ ପ୍ରଧାନମନ୍ତ୍ରୀ ନିଯୁକ୍ତ କରିଛନ୍ତି। ସେ ଏଡୁଆର୍ଡ ଫିଲିପ୍ଙ୍କ ସ୍ଥାନରେ ଦାୟିତ୍ୱ ଗ୍ରହଣ କରିବେ। ଫିଲିପ୍ ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେଇଥିଲେ। ଲକ୍ଡାଉନ ପରେ ଦେଶର ଅର୍ଥନୀତିକୁ ସଜାଡ଼ିବା ଉପରେ ରାଷ୍ଟ୍ରପତି ଗୁରୁତ୍ୱ ଦେଉଥିବାରୁ କ୍ୟାବିନେଟରେ ପରିବର୍ତ୍ତନ କରିଛନ୍ତି। ୫୫ ବର୍ଷୀୟ କାଷ୍ଟେକ୍ସ ପେସାରେ ଜଣେ ପବ୍ଲିକ୍ ସର୍ଭ୍ୟାଣ୍ଟ। ସେ ବିଭିନ୍ନ ସରକାରରେ କାର୍ଯ୍ୟ କରିଆସିଛନ୍ତି। କରୋନା ମହାମାରୀ ପରେ ସେ ଦେଶର ଅନ୍ଲକ୍ ରଣନୀତି ପ୍ରସ୍ତୁତିରେ ସହଯୋଗ କରିଥିଲେ, ଯାହା ବେଶ୍ ସଫଳ ହୋଇଛି। ତେବେ ପୂର୍ବତନ ପ୍ରଧାନମନ୍ତ୍ରୀ ଫିଲିପ୍ଙ୍କ ଗତ ୩ ବର୍ଷର କାର୍ଯ୍ୟକୁ ମଧ୍ୟ ରାଷ୍ଟ୍ରପତି ଇମାନୁଏଲ୍ ଉଚ୍ଚ ପ୍ରଶଂସା କରିଛନ୍ତି। କିଛିଦିନ ପୂର୍ବରୁ ଫ୍ରାନ୍ସରେ ହୋଇଥିବା ସ୍ଥାନୀୟ ନିର୍ବାଚନରେ ଇମାନୁଏଲ୍ଙ୍କ ଦଳ ଦେଶର ବୃହତ ସହର ସମେତ ବିଭିନ୍ନ ସ୍ଥାନରେ ପରାଜିତ ହୋଇଥିଲା। କରୋନା ସଙ୍କଟ ବେଳେ ସରକାର ସମାଲୋଚିତ ହେବା ସହ ବିରୋଧର ସମ୍ମୁଖୀନ ହୋଇଥିଲେ। ତେଣୁ ରବିବାର ଭୋଟ ପୂର୍ବରୁ ଇମାନୁଏଲ୍ କ୍ୟାବିନେଟରେ ପରିବର୍ତ୍ତନ କରିଛନ୍ତି।
