ଅହମ୍ମଦାବାଦ,୧୨।୩ : ସ୍ଥାନୀୟ ନରେନ୍ଦ୍ର ମୋଦି ଷ୍ଟାଡିୟମରେ ଖେଳାଯାଇଥିବା ପ୍ରଥମ ଟି୨୦ ମ୍ୟାଚ୍ରେ ଭାରତୀୟ ଦଳକୁ ଲଜ୍ଜାଜନକ ପରାଜୟର ସମ୍ମୁଖୀନ ହେବାକୁ ପଡ଼ିଛି। ଘରୋଇ ଦଳ ପକ୍ଷରୁ ଧାର୍ଯ୍ୟ ୧୨୫ ରନ୍ର ବିଜୟ ଲକ୍ଷ୍ୟକୁ ମାତ୍ର ୧୫.୩ ଓଭରରେ ୮ ଉଇକେଟ କ୍ଷତିରେ ହାସଲ କରି ନେଇଛି ଇଂଲଣ୍ଡ।
ପ୍ରଥମେ ବ୍ୟାଟିଂ କରିଥିବା ଟିମ୍ ଇଣ୍ଡିଆର ପ୍ରାୟ ବ୍ୟାଟ୍ସମ୍ୟାନ ବିଫଳ ହୋଇଥିଲେ। ଶ୍ରେୟାସ ଆୟାର(୬୭)ଙ୍କ ଅର୍ଦ୍ଧଶତକୀୟ ଇନିଂସ ଯୋଗୁ ଧାର୍ଯ୍ୟ ୨୦ ଓଭରରେ ୭ ଉଇକେଟ ହରାଇ ୧୨୪ ରନ୍ କରିଥିଲା। ଘରୋଇ ବ୍ୟାଟ୍ସମ୍ୟାନଙ୍କ ପାଇଁ କାଳ ସାଜିଥିବା ଜୋଫ୍ରା ଆର୍ଚ୍ଚର ନେଇଥିଲେ ସର୍ବାଧିକ ୩ ଉଇକେଟ। ତାଙ୍କୁ ଗୋଟିଏ ଲେଖାଏ ଉଇକେଟ ନେଇ ଆଦିଲ ରସିଦ, ମାର୍କ ଉଡ, କ୍ରିସ ଜୋର୍ଡାନ ଓ ବେନ ଷ୍ଟୋକ୍ସ ସାହାଯ୍ୟ କରିଥିଲେ। ଛୋଟିଆ ବିଜୟ ଲକ୍ଷ୍ୟକୁ ଇଂଲଣ୍ଡ ଦଳ ୨୭ ବଲ ପୂର୍ବରୁ ହାତରେ ୮ ଉଇକେଟ ରଖି ହାସଲ କରି ନେଇଥିଲା। ଦଳ ପାଇଁ ଜାସନ ରୟ ୪୯ ଓ ଜୋସ ବଟଲର ୨୮ ରନ୍ କରି ଆଉଟ୍ ହୋଇଥିବାବେଳେ ଦାଓ୍ବିଦ ମଲାନ ୨୪ ଓ ଜନ୍ନି ବେଆର୍ଷ୍ଟୋ ୨୬ ରନ୍ କରି ଅପରାଜିତ ଥିଲେ। ଭାରତ ପକ୍ଷରୁ ୟୁଜବେନ୍ଦ୍ର ଚହଲ ଓ ଓ୍ବାଶିଂଟନ ସୁନ୍ଦର ଗୋଟିଏ ଲେଖାଏ ସଫଳତା ପାଇଥିଲେ।
