ନୂଆଦିଲ୍ଲୀ,୧୯।୬: ଆଇପିଏଲ୍ ୨୦୨୭କୁ ନେଇ କ୍ରିକେଟ୍ ପ୍ରେମୀଙ୍କ ମଧ୍ୟରେ ଏବେଠାରୁ ଚର୍ଚ୍ଚା ଆରମ୍ଭ ହୋଇଗଲାଣି । ସବୁଠାରୁ ବଡ଼ ଖବର ଆସୁଛି ଦିଲ୍ଲୀ କ୍ୟାପିଟାଲ୍ସ ଶିବିରରୁ । ପୂର୍ବତନ ବାମହାତୀ ବ୍ୟାଟର ଯୁବରାଜ ସିଂହ ଆଗାମୀ ସିଜନରେ ଦିଲ୍ଲୀ କ୍ୟାପିଟାଲ୍ସର କୋଚିଂ ଷ୍ଟାଫ୍ରେ ସାମିଲ ହୋଇପାରନ୍ତି । ଯଦି ଏପରି ହୁଏ, ତେବେ ଯୁବରାଜ ଆଗାମୀ ସିଜନରେ ପୂର୍ବତନ ଭାରତୀୟ ଅଧିନାୟକ ସୌରଭ ଗାଙ୍ଗୁଲିଙ୍କ ସହ ମିଶି ଦିଲ୍ଲୀ କ୍ୟାପିଟାଲ୍ସକୁ ଆଇପିଏଲ୍ ଚାମ୍ପିଅନ୍ ବନାଇବା ପାଇଁ ରଣନୀତି ପ୍ରସ୍ତୁତ କରୁଥିବାର ନଜର ଆସିବେ । ରିପୋର୍ଟ ମୁତାବକ, ସୌରଭ ଗାଙ୍ଗୁଲି ଦିଲ୍ଲୀ କ୍ୟାପିଟାଲ୍ସର କୋଚିଂ ସେଟ୍ଅପ୍ର ପ୍ରମୁଖ (Head of Coaching Setup) ଦାୟିତ୍ୱ ତୁଲାଇପାରନ୍ତି ।
ସୂଚନାଯୋଗ୍ୟ ଯେ, ଆଇପିଏଲ୍ ୨୦y୬ ରେ ହେମାଙ୍ଗ ବଦାନୀ ଦିଲ୍ଲୀ କ୍ୟାପିଟାଲ୍ସର ମୁଖ୍ୟ କୋଚ୍ ଥିଲେ । ଟିମ୍ ସେହି ସିଜନରେ ଭଲ ଆରମ୍ଭ କରିଥିଲେ ମଧ୍ୟ ପ୍ଲେ-ଅଫ୍ରେ ପହଞ୍ଚିବାରେ ବିଫଳ ହୋଇଥିଲା ।
ଟିମ୍ ଇଣ୍ଡିଆର ଏହି କିମ୍ବଦନ୍ତୀ ଅଲ୍ରାଉଣ୍ଡରଙ୍କର କୋଚିଂ କ୍ଷେତ୍ରରେ ମଧ୍ୟ ବେଶ୍ ଭଲ ଅନୁଭବ ରହିଛି । ସେ ଅନେକ ଯୁବ ବାମହାତୀ ବ୍ୟାଟରଙ୍କୁ ବ୍ୟକ୍ତିଗତ ଭାବେ ତାଲିମ ଦେଇଛନ୍ତି, ଯେଉଁଥିରେ ଅଭିଷେକ ଶର୍ମା ଏବଂ ପ୍ରିୟାଂଶ ଆର୍ଯ୍ୟଙ୍କ ଭଳି ତାରକା ସାମିଲ ଅଛନ୍ତି । ଏହି ଖେଳାଳିମାନଙ୍କର ‘ବ୍ୟାଟିଂ ଫ୍ଲୋ’ ସୁଧାରିବାରେ ଯୁବରାଜଙ୍କର ବଡ଼ ହାତ ରହିଛି ।
ଏପରିକି ଟିମ୍ ଇଣ୍ଡିଆର ଷ୍ଟାର୍ ବ୍ୟାଟର ଶୁଭମନ ଗିଲ୍ ମଧ୍ୟ ଯୁବରାଜଙ୍କ ଶିଷ୍ୟ । ଗିଲ୍ଙ୍କୁ ଜଣେ ସଫଳ କ୍ରିକେଟର ଭାବେ ଗଢ଼ିତୋଳିବାରେ ଯୁବରାଜଙ୍କ ଗୁରୁତ୍ୱପୂର୍ଣ୍ଣ ଅବଦାନ ରହିଛି । ଏବେ ଦିଲ୍ଲୀ କ୍ୟାପିଟାଲ୍ସ ମଧ୍ୟ ଚାହୁଁଛି ଯେ, ଯୁବରାଜ ସେମାନଙ୍କ ଦଳ ସହ ଯୋଡ଼ି ହୋଇ ବ୍ୟାଟରମାନଙ୍କୁ ଆହୁରି ବିସ୍ଫୋରକ ବନାଇବାରେ ସାହାଯ୍ୟ କରନ୍ତୁ।
ଖାଲି କୋଚିଂ ଷ୍ଟାଫ୍ ନୁହେଁ, ବରଂ ଦଳର ଅଧିନାୟକତ୍ୱ ଏବଂ ଖେଳାଳି ଚୟନରେ ମଧ୍ୟ ବଡ଼ ଓଲଟପାଲଟ ଦେଖିବାକୁ ମିଳିପାରେ । ମିଳିଥିବା ସୂଚନା ଅନୁଯାୟୀ ଅକ୍ଷର ପଟେଲଙ୍କ ସ୍ଥାନରେ କେ.ଏଲ୍ ରାହୁଲଙ୍କୁ ଦିଲ୍ଲୀ କ୍ୟାପିଟାଲ୍ସର ନୂଆ ଅଧିନାୟକ କରାଯାଇପାରେ । କୁଲଦୀପ ଯାଦବଙ୍କ ସ୍ଥାନରେ ଋଷଭ ପନ୍ତ ପୁଣି ଥରେ ଏହି ଦଳରେ ସାମିଲ ହୋଇପାରନ୍ତି । ଏହି ସବୁ ସମ୍ଭାବ୍ୟ ପରିବର୍ତ୍ତନ ପରେ ଆଗାମୀ ସିଜନରେ ଦିଲ୍ଲୀ କ୍ୟାପିଟାଲ୍ସ ଏକ ସମ୍ପୂର୍ଣ୍ଣ ନୂଆ ରୂପରେ ପଡ଼ିଆକୁ ଓହ୍ଲାଇବାକୁ ପ୍ରସ୍ତୁତି କରୁଛି ।
