ନୂଆଦିଲ୍ଲୀ,୨୬।୨: ପୂର୍ବତନ ଭାରତୀୟ ଅଲରାଉଣ୍ଡର ୟୁସୁଫ ପଠାନ ଶୁକବ୍ରାର ସମସ୍ତ ପ୍ରକାର ଅନ୍ତର୍ଜାତୀୟ କ୍ରିକେଟରୁ ସନ୍ନ୍ୟାସ ଗ୍ରହଣ କରିଛନ୍ତି। ପୂର୍ବତନ ଅଲରାଉଣ୍ଡର ଇର୍ଫାନ ପଠାନଙ୍କ ବଡ଼ ଭାଇ ୟୁସୁଫ ୨୦୦୭ ଟି୨୦ ବିଶ୍ୱକପ୍ ଚାମ୍ପିୟନ ଭାରତୀୟ ଦଳର ସଦସ୍ୟ ଥିଲେ। ଆଉ ୨୦୧୧ରେ ତାଙ୍କ ପ୍ରତିନିଧିତ୍ୱରେ ଭାରତ ହାତେଇଥିଲା ଆଇସିସି ବିଶ୍ୱକପ୍।
” ମିଳିଥିବା ସମର୍ଥନ ଓ ଭଲ ପାଇବା ପାଇଁ ମୋ ପରିବାର, ବନ୍ଧୁ, ପ୍ରଶଂସକ, ଦଳ, କୋଚ୍ ଓ ପୂରା ଦେଶକୁ ହୃଦୟରୁ ଧନ୍ୟବାଦ ଦେଉଛି “ ବୋଲି ୟୁସୁଫ ଟୁଇଟ୍ କରି ଅବସର ଘୋଷଣା କରିଛନ୍ତି। ଏହି ପୋଷ୍ଟରେ ଉଭୟ ବିଶ୍ୱକପ୍ର ଦୁଇଟି ଫଟୋ ମଧ୍ୟ ଶେୟାର କରିଛନ୍ତି ୟୁସୁଫ।
୨୦୦୭ରେ ଟିମ୍ ଇଣ୍ଡିଆ ପାଇଁ ପଦାର୍ପଣ କରିଥିବା ୟୁସୁଫ ଅନ୍ତର୍ଜାତୀୟ ସ୍ତରରେ ଖେଳିଥିଲେ ମୋଟ ୭୯ଟି ମ୍ୟାଚ୍। ୫୭ ଦିନିକିଆ ମ୍ୟାଚ୍ରେ ଦୁଇଟି ଶତକ ସହ ୮୧୦ ରନ ଓ ୨୨ଟି ଟି୨୦ ମ୍ୟାଚ୍ରେ ୨୩୬ ରନ୍ ସଂଗ୍ରହ କରିଥିଲେ ଏହି ବିସ୍ଫୋରକ ବ୍ୟାଟ୍ସମ୍ୟାନ।
