ସମ୍ବଲପୁର,୨୬ା୧(ପ୍ରମୋଦ ବହିଦାର): ସମ୍ବଲପୁର ଅଇଁଠାପାଲି ତଳି ଛକରେ ଆମବସ୍ ଧକ୍କାରେ ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଛି। ମୃତକ ହେଲେ ସମ୍ବଲପୁର ପ୍ରେସ୍କ୍ଲବ କର୍ମଚାରୀ ଅନୁଗୋଳ ଜିଲା ଜରପଡ଼ା ଥାନା ଅନ୍ତର୍ଗତ କଞ୍ଜରା ଗ୍ରାମର ନୀରଦ କୁମାର ସାହୁ(୪୮)। ଜିଲା ମୁଖ୍ୟ ଚିକିତ୍ସାଳୟରେ ଡାକ୍ତର ମୃତ ଘୋଷଣା ପରେ ନୀରଦଙ୍କ ମୃତଦେହ ଶବଗୃହରେ ରଖାଯାଇଛି। ଅପରପକ୍ଷରେ ପୋଲିସ ଦୁର୍ଘଟଣା ଘଟାଇଥିବା ବସ୍କୁ ଜବତ କରିବା ସହ ଚାଳକଙ୍କୁ ଅଟକ ରଖିଛି। ପରିବାର ଲୋକେ ଆସିଲା ପରେ ସୋମବାର ମୃତଦେହ ବ୍ୟବଚ୍ଛେଦ କରାଯିବ ବୋଲି ପୋଲିସ କହିଛି।
ମିଳିଥିବା ସୂଚନା ଅନୁସାରେ ନୀରଦ ପ୍ରେସ୍କ୍ଲବରେ ରହୁଥିଲେ। ରବିବାର ରାତି ପ୍ରାୟ ସାଢ଼େ ୭ଟାରେ ସେ ଅଇଁଠାପାଲି ପିଏଚ୍ଡି ପଡ଼ିଆରେ ଚାଲିଥିବା ପୁସ୍ତକ ମେଳା ଦେଖି ପ୍ରେସ୍କ୍ଲବକୁ ଫେରୁଥିଲେ। ସେ ତଳିଛକରେ ରାସ୍ତା ପାରି ହେଉଥିବା ସମୟରେ ଚିପିଲିମାରୁ ସମ୍ବଲପୁରକୁ ଆସି ଅଇଁଠାପାଲି ତଳିଛକରେ ସହରକୁ ପ୍ରବେଶ କରୁଥିବା ଆମବସ୍ ସମ୍ମୁଖରେ ପଡ଼ି ଯାଇଥିଲେ। ଏହି ସମୟରେ ବସ୍ ତାଙ୍କୁ ଧକ୍କା ଦେଇଥିଲା। ଦୁର୍ଘଟଣା ପରେ ବସ୍ ଚାଳକ ଅଇଁଠାପାଲି ଥାନାରେ ଅମତ୍ସମର୍ପଣ କରିଥିବା ଜଣା ପଡ଼ିଛି।
ଏସମ୍ପର୍କରେ ଖବର ପାଇ ଆମବସ୍ ଚଳାଚଳ ଦାୟିତ୍ୱରେ ଥିବା ସିଆର୍ୟୁଟି ସମ୍ବଲପୁର ଶାଖା ପ୍ରବନ୍ଧକ ବିଶ୍ୱଜିତ ପଣ୍ଡା ମୃତକଙ୍କ ପରିବାରଙ୍କୁ ଆବଶ୍ୟକ ସହାୟତା ଯୋଗାଇ ଦିଆଯିବ ବୋଲି ପ୍ରତିଶ୍ରୁତି ଦେଇଛନ୍ତି। ଆର୍ଟିଓ ରାମଦାସ ଟୁଡୁ ଜିଲା ଚିକିତ୍ସାଳୟ ଯାଇ ନୀରଦଙ୍କ ପରିବାରଙ୍କୁ କ୍ଷତିପୂରଣ ପ୍ରଦାନ କରିବାକୁ ପ୍ରତିଶ୍ରୁତି ଦେଇଛନ୍ତି। ୨୦୨୧ମସିହାରୁ ପ୍ରେସ୍କ୍ଲବର କର୍ମଚାରୀ ଭାବେ ନୀରଦ କାର୍ଯ୍ୟ କରି ଆସୁଥିଲେ। ସେ ବିବାହିତ ହୋଇଥିବା ବେଳେ ତାଙ୍କ ମାତାପିତା ଜୀବିତ ଅଛନ୍ତି। ତାଙ୍କ ସ୍ତ୍ରୀ, ଦୁଇ ଝିଅ ନିଜ ଗ୍ରାମ କଞ୍ଜରାରେ ମାତାପିତାଙ୍କ ସହିତ ରହୁଛନ୍ତି।
