ମୋହନା୧୩।୪(ମନ୍ମଥ ମିଶ୍ର): ଚାନ୍ଦା ଆଦାୟ କରି ମୁମ୍ବାଇରୁ ଆସିଲା ମୃତଦେହ। ଏଭଳି ଏକ ହୃଦୟ ବିଦାରକ ଦୃଶ୍ୟ ଦେଖିବାକୁ ମିଳିଛି ଗଜପତି ଜିଲା ମୋହନା ବ୍ଲକ ଦମାଦୁଆ ଗ୍ରାମ ପଞ୍ଚାୟତ ମଝିକିରିମ୍ବା ଗ୍ରାମରେ।
ଗାଁର ଅନିତା ମଳିକ(୩୪)ଙ୍କ ଘରେ ଆର୍ଥିକ ଅନଟନ ଲାଗି ରହିଥିବାରୁ ସେ ମୁମ୍ବାଇ ଦାଦନ ଖଟିବାକୁ ଯାଇ ପରିବାର ପୋଷଣ କରୁଥିଲେ। ଅନ୍ୟପକ୍ଷେ ଅନିତା ୨୦୨୨ରେ ପଞ୍ଚାୟତରେ ସରପଞ୍ଚ ପ୍ରାର୍ଥୀନୀ ହୋଇଥିଲେ। ସେ ମୁଖ୍ୟ ପ୍ରତିଦ୍ବନ୍ଦୀ ଭାବେ ୫୧୧ ଖଣ୍ଡ ଭୋଟ ପାଇ ପରାଜିତ ହୋଇଥିଲେ। ପରାଜିତ ପରେ ପୁଣି ସେ ଦାଦନ ଖଟିବାକୁ ମୁମ୍ବାଇ ଚାଲିଯାଇଥିଲେ। ସେଠାରେ ସାଙ୍ଗମାନଙ୍କ ସହ ମିଶି କାମ କରୁଥିଲେ। ହେଲେ ଘରେ ରହୁଥିବା ସାଙ୍ଗମାନେ କାମକୁ ଯାଇଥିବା ବେଳେ କୌଣସି କାରଣରୁ ଅନିତା କାମକୁ ଯାଇ ଘରେ ରହିଥିଲେ।
ସାଙ୍ଗମାନେ କାମ ସାରି ଘରକୁ ଆସି ଅନିତାଙ୍କ ମୃତଦେହ ପଡିଥିବା ଦେଖିବାକୁ ପାଇଥିଲେ। ଏନେଇ ସାଙ୍ଗମାନେ ତୁରନ୍ତ ପରିବାର ଲୋକଙ୍କୁ ଖବର ଦେଇଥିଲେ। ପରିବାର ଲୋକେ ଗରିବ ଶ୍ରେଣୀର ହୋଇଥିବାରୁ ଝିଅର ମୃତଦେହ ଆଣିବାକୁ ଅକ୍ଷମ ପ୍ରକାଶ କରି ପଞ୍ଚାୟତଠାରୁ ଆରମ୍ଭ କରି ବ୍ଲକ ପ୍ରଶାସନିକ ଅଧିକାରୀ ଏବଂ ସ୍ଥାନୀୟ ଜନପ୍ରତିନିଧିଙ୍କୁ ସାହାର୍ଯ୍ୟ ମାଗିଥିଲେ। ହେଲେ କୌଣସି ସୁଫଳ ମିଳିପାରି ନ ଥିଲା।
ଏଭଳିସ୍ଥିତିରେ ଅଞ୍ଚଳର କିଛି ଯୁବକ ୫୧ ହଜାର ଟଙ୍କା ଚାନ୍ଦା ଆଦାୟ କରି ମୁମ୍ବାଇରୁ ଏକ ଆମ୍ବୁଲାନ୍ସ ଯୋଗେ ଅନିତାଙ୍କ ମୃତଦେହ ଗାଁକୁ ଆଣିଥିଲେ। ମୃତଦେହ ଗାଁରେ ପହଞ୍ଚିବା ପରେ ଶୋକର ଛାୟା ଖେଳିଯାଇଥିଲା।
