ଦୁବାଇ,୨୬।୧୦:ଆଇପିଏଲର ଚଳିତ ସିଜନରେ ଚେନ୍ନାଇ ସୁପର କିଙ୍ଗ୍ସର ପ୍ଲେଅଫ୍ ଦୌଡରୁ ବାଦ୍ ପଡିଛି। ଦଳକୁ ଆଉ ମାତ୍ର ଦୁଇଟି ମ୍ୟାଚ୍ ଖେଳିବାର ଅଛି। ଚେନ୍ନାଇ ଯଦି ପରବର୍ତ୍ତୀ ଦୁଇଟି ମ୍ୟାଚ ଜିତିବ କେବଳ ୧୨ ପଏଣ୍ଟ ନେଇ ଚଳିତ ଆଇପିଏଲ୍ ଯାତ୍ରା ଶେଷ କରିବ। ପ୍ଲେଅଫ୍ରୁ ଦଳ ବାଦ୍ ପଡିବା ପରେ ଅଧିନାୟକ ମହେନ୍ଦ୍ର ସିଂ ଧୋନୀଙ୍କ ମୁହଁରେ ସେତେଟା ଖୁସି ନ ଥିଲା। ତାଙ୍କ ମୁହଁରେ ବିଷାଦ ଥିବା ସ୍ପଷ୍ଟ ବାରି ହୋଇପଡିଥିଲା। ରୟାଲ୍ ଚ୍ୟାଲେଞ୍ଜର୍ସ ବିପକ୍ଷ ମ୍ୟାଚ୍ ୮ ଉଇକେଟ୍ରେ ଜିତିବା ପରେ ଧୋନୀ କହିଛନ୍ତି, ଭଲ ପ୍ରଦର୍ଶନ ନ କରିବା କଷ୍ଟଦାୟକ। ଆମର ଶେଷ ଯନ୍ତ୍ରଣାଦାୟକ ୧୨ ଘଣ୍ଟା ଟୁର୍ନାମେଣ୍ଟରେ ବାକି ଅଛି। ଆମକୁ ଏହାକୁ ସମ୍ପୂର୍ଣ୍ଣ ଉପଭୋଗ କରିବାକୁ ପଡିବ। ଆମେ ପଏଣ୍ଟ ଟେବୁଲରେ କେଉଁଠାରେ ଥାଉ ଏହା ଗୁରୁତ୍ୱପୂର୍ଣ୍ଣ ନୁହେଁ। ଯଦି ଆପଣ କ୍ରିକେଟ ଉପଭୋଗ କରୁନାହାଁନ୍ତି, ତେବେ ଏହା ନିଷ୍ଠୁର ଏବଂ ଯନ୍ତ୍ରଣାଦାୟକ ହୋଇପାରେ। ଯୁବ ଖେଳାଳିଙ୍କ ପ୍ରଦର୍ଶନକୁ ନେଇ ମୁଁ ଖୁସି ବୋଲି ସେ କହିଛନ୍ତି। ସୂଚନାଯୋଗ୍ୟ, ଆଇପିଏଲ ଇତିହାସର ୧୩ ବର୍ଷରେ ପ୍ରଥମ ଥର ପାଇଁ ଚେନ୍ନାଇ ପ୍ଲେ ଅଫ ରେସରୁ ଓହରିଯାଇଛିି। ୨୦୦୮ରେ ଆଇପିଏଲ ଆରମ୍ଭ ହୋଇଥିଲା ଏବଂ ଧୋନୀଙ୍କ ଦଳ ପ୍ରଥମ ସିଜନରେ ଫାଇନାଲକୁ ଯାଇଥିଲା। ତେବେ ଫାଇନାଲରେ ରାଜସ୍ଥାନ ରୟାଲ୍ସଠାରୁ ପରାଜୟର ସାମ୍ନା କରିବାକୁ ପଡିଥିଲା। ଚେନ୍ନାଇ ଦଳ ୨୦୧୬ ଏବଂ ୨୦୧୭ରେ ନିଲମ୍ବିତ ହୋଇଥିଲା ଏବଂ ୨୦୧୮ରେ ପ୍ରତ୍ୟାବର୍ତ୍ତନ ସହିତ ଚେନ୍ନାଇ ତୃତୀୟ ଥର ପାଇଁ ଆଇପିଏଲ ଟ୍ରଫି ଜିତିଥିଲା। ୨୦୧୯ରେ ଚେନ୍ନାଇ ଦଳ ପୁଣି ଥରେ ଫାଇନାଲରେ ପ୍ରବେଶ କରି ମୁମ୍ବାଇଠାରୁ ହାରିଯାଇଥିଲା। କିନ୍ତୁ ୨୦୨୦ରେ ଚେନ୍ନାଇ ପଏଣ୍ଟ ତାଲିକାର ଶେଷ ସ୍ଥାନରେ ରହିଛି।
