ନୂଆଦିଲ୍ଲୀ, ୨୫।୮: ବିଶିଷ୍ଟ ସାହିତି୍ୟକା ଯଶୋଧାରା ମିଶ୍ର ତାଙ୍କ ରଚିତ କ୍ଷୁଦ୍ରଗଳ୍ପ ସଂକଳନ ‘ସମୁଦ୍ରକୂଳ ଘର’ ପୁସ୍ତକ ପାଇଁ ୨୦୨୦ ନିମନ୍ତେ କେନ୍ଦ୍ର ସାହିତ୍ୟ ଏକାଡେମୀ ପୁରସ୍କାର ପାଇବାକୁ ମନୋନୀତ ହୋଇଛନ୍ତି। କେନ୍ଦ୍ର ସାହିତ୍ୟ ଏକାଡେମୀ ସଭାପତି ଚନ୍ଦ୍ରଶେଖର କମ୍ବର ମଙ୍ଗଳବାର ଯଶୋଧାରାଙ୍କ ନାମ ଘୋଷଣା କରିଛନ୍ତି। ପୁରସ୍କାର ବାବଦରେ ତାଙ୍କୁ ୧ଲକ୍ଷ ଟଙ୍କାର ଚେକ୍ ଏବଂ ଏକ ତାମ୍ର ଫଳକ ମିଳିବ। ବୀଣାପାଣି ମହାନ୍ତି, ପ୍ରତିଭା ଶତପଥୀ ଏବଂ ରମାକାନ୍ତ ରଥଙ୍କୁ ନେଇ ଗଠିତ ବିଚାରକମଣ୍ଡଳୀ ‘ସମୁଦ୍ରକୂଳ ଘର’କୁ ମନୋନୀତ କରିଛନ୍ତି। ଏହି ସଂକଳନ ୨୦୧୬ରେ ପ୍ରକାଶ ପାଇଥିଲା। ଯଶୋଧାରା ୧୫ରୁ ଊର୍ଦ୍ଧ୍ୱ କ୍ଷୁଦ୍ର ଗଳ୍ପ, ପ୍ରବନ୍ଧ, କବିତା ଏବଂ ବହୁ ପୁସ୍ତକ ଅନୁବାଦ କରିଛନ୍ତି। ସେ ପୂର୍ବରୁ ଓଡ଼ିଶା ସାହିତ୍ୟ ଏକାଡେମୀ ପୁରସ୍କାର, କଥା ସମ୍ମାନ, ଓଡ଼ିଶା ବୁକ୍ ଫେୟାର ସମ୍ମାନ ଏବଂ ଗଙ୍ଗାଧର ରଥ ଫାଉଣ୍ଡେଶନ ଦ୍ୱାରା ପ୍ରଦତ୍ତ ସାହିତ୍ୟ ଭାରତୀ ପୁରସ୍କାର ସମତେ ବହୁ ସମ୍ମାନରେ ସମ୍ମାନିତ ହୋଇଛନ୍ତି। ଯଶୋଧାରା ଇଂଲିଶ ବିଭାଗ ପ୍ରାଧ୍ୟାପିକା ଭାବେ କାର୍ଯ୍ୟ କରିଛନ୍ତି। ପ୍ୟାରିସ୍ର ମ୍ୟାସନ ଡି ସାଇନ୍ସରେ ଅତିଥି ଅଧ୍ୟାପିକା ଭାବେ ମଧ୍ୟ କାର୍ଯ୍ୟ କରିବାର ସୁଯୋଗ ପାଇଛନ୍ତି। କେନ୍ଦ୍ର ସାହିତ୍ୟ ପୁରସ୍କାର ପାଇବା ପାଇଁ ମନୋନୀତ ହେବା ପରେ ଯଶୋଧାରା ପ୍ରତିକ୍ରିୟାରେ କହିଛନ୍ତି , ଜଣେ ଲେଖକ କିମ୍ବା କଳାକାରଙ୍କୁ ସାମାଜିକ ସ୍ବିକୃତୀ ମିଳିବା ନିଶ୍ଚିତ ଖୁସିର ଖବର। ସାମାଜିକ ସ୍ବୀକୃତି ଅପେକ୍ଷା ପାଠକୀୟ ସ୍ବୀକୃତି ଅଧିକ ଆନନ୍ଦ ଦେଇଥାଏ। ୧୯୭୦ ଦଶକରୁ ଲେଖାଲେଖି କରୁଛି। ଇତିମଧ୍ୟରେ ବହୁ ପାଠକୀୟ ଆଦ୍ରୁତି ମିଳିଛି। ତଥାପି କେନ୍ଦ୍ର ସରକାରଙ୍କଠାରୁ ଏବେ ଯେଉଁ ସ୍ବୀକୃତି ମିଳିଛି ତାହା ସବୁଠୁ ଅଧିକ ଆନନ୍ଦ ଦେଉଛି।
କେନ୍ଦ୍ର ସାହିତ୍ୟ ଏକାଡେମୀ ପୁରସ୍କାର ପାଇଁ ମନୋନୀତ ଯଶୋଧାରାଙ୍କୁ ମୁଖ୍ୟମନ୍ତ୍ରୀ ଟୁଇଟ କରି ଶୁଭେଚ୍ଛା ଓ ଅଭିନନ୍ଦନ ଜଣାଇଛନ୍ତି। ସାହିତ୍ୟ କ୍ଷେତ୍ରରେ ତାଙ୍କର ଏହି ସଫଳତା ଓଡ଼ିଶା ଲାଗି ଗୌରବର ବିଷୟ। ତାଙ୍କ ସାରସ୍ବତ ସୃଷ୍ଟିଗୁଡ଼ିକ ଓଡ଼ିଆ ସାହିତ୍ୟକୁ ଆହୁରି ସମୃଦ୍ଧ କରିବ ବୋଲି ମୁଖ୍ୟମନ୍ତ୍ରୀ କହିଛନ୍ତି।
ଅପରପକ୍ଷରେ ମାଲାୟଲମ୍ ଭାଷା ପାଇଁ ଲେଖକ ଓମ୍ଚେରି ଏମ୍.ଏମ୍ ପିଲାଇଙ୍କୁ ‘ଆକସ୍ମିକମ୍ ଓମ୍ଚେରିୟୁଟେ ଅର୍ମାକୁରିପୁକଳ’ ନିମନ୍ତେ କେନ୍ଦ୍ର ସାହିତ୍ୟ ଏକାଡେମୀ ପୁରସ୍କାର-୨୦୨୦ ମନୋନୀତ କରାଯାଇଛି।
