ବେଜିଂ,୨୬।୧୧: ପୂର୍ବ ଲଦାଖର ଏଲ୍ଏସିରେ ଭାରତ ଚାଇନା ମଧ୍ୟରେ ଉତ୍ତେଜଜନା ବଢ଼ିବାରେ ଲାଗିଛି। ଏପରିସ୍ଥଳେ ରାଷ୍ଟ୍ରପତି ଶି ଜିନ୍ପିଙ୍ଗ୍ ଚାଇନା ସୈନ୍ୟ ବାହିନୀକୁ ବାସ୍ତବିକ ଯୁଦ୍ଧ ପାଇଁ ପ୍ରସ୍ତୁତ ରହିବାକୁ ପରାମର୍ଶ ଦେଇଛନ୍ତି। ଜିନ୍ପିଙ୍ଗ୍ ଏଭଳି ମନ୍ତବ୍ୟ ନେଇ ଏବେ ଅନ୍ତର୍ଜାତୀୟସ୍ତରରେ ଚିନ୍ତା ବଢ଼ିବାରେ ଲାଗିଛି। ଏସମ୍ପର୍କିତ ଖବର ଚାଇନା ଗଣମାଧ୍ୟମ ସଂସ୍ଥା ଶିହ୍ନୁଆରେ ପ୍ରକାଶିତ ହୋଇଛି। ସେଣ୍ଟ୍ରାଲ ମିଲିଟାରୀ କମିଶନର ଏକ ବୈଠକରେ ସେ ଏଭଳି କହିଛନ୍ତି। ୬୭ ବର୍ଷ ବୟସ୍କ ଜିନ୍ପିଙ୍ଗ୍ ଦେଶର ରାଷ୍ଟ୍ରପତି ହେବା ସହିତ ସେଣ୍ଟ୍ରାଲ ମିଲିଟାରୀ କମିଶନର ଅଧ୍ୟକ୍ଷ ଭାବେ ମଧ୍ୟ କାର୍ଯ୍ୟ କରୁଛନ୍ତି। ଦେଶର ୨୦ ଲକ୍ଷ ସୈନ୍ୟ ବାହିନୀର ସେ କମାଣ୍ଡିଙ୍ଗ୍ ଅଧିକାରୀ। ବୈଠକରେ ୨୦୨୭ ସୁଦ୍ଧା ଚାଇନାକୁ କିପରି ପ୍ରତିରକ୍ଷା କ୍ଷେତ୍ରରେ ଆମେରିକା ସମକ୍ଷକ କରାଯିବ ସେ ନେଇ ଜିନ୍ପିଙ୍ଗ୍ ମାଷ୍ଟ୍ରର୍ ପ୍ଲାନ୍ ମ୍ୟାପିଂ କରିଥିବା କୁହାଯାଉଛି। ଇତିମଧ୍ୟରେ ଏଲ୍ଏସିରେ ଚାଇନାର ଯୁଦ୍ଧ ବିମାନ ପଇଁତରା ମାରିବା ଘଟଣା ମଧ୍ୟ ବଢ଼ିବାରେ ଲାଗିଛି। ଏହାକୁ ନେଇ ଭାରତୀୟ ଯବାନମାନଙ୍କୁ ମଧ୍ୟ ସତର୍କ ରହିବାକୁ କୁହାଯାଇଛି।
