ନୂଆଦିଲ୍ଲୀ, ୧୯ା୫(ପି.ଟି.)-ସ୍ଥାନୀୟ ଏକ କୋର୍ଟ ଫେରାର ଥିବା ଅଲିମ୍ପିକ ପଦକ ବିଜେତା ରେସ୍ଲର ସୁଶୀଲ କୁମାରଙ୍କୁ ଆଗୁଆ ଜାମିନ ଦେବାକୁ ମନା କରିଦେଇଛନ୍ତି। ଛତ୍ରସାଲ ଷ୍ଟାଡିୟମରେ ଜଣେ ରେସଲରଙ୍କୁ ହତ୍ୟା ଘଟଣାରେ ସୁଶୀଲ ସମ୍ପୃକ୍ତ ଥିବା ସନ୍ଦେହ କରାଯାଉଛି। ତାଙ୍କ ବିରୋଧରେ ହତ୍ୟା, ଅପହରଣ ଓ ଆପରାଧିକ ଷଡ଼ଯନ୍ତ୍ର ମାମଲା ଦରଜ ହୋଇଥିବାରୁ ଅତିରିକ୍ତ ସେସନ ଜଜ୍ ଜଗଦୀଶ କୁମାର ଜାମିନ ଆବେଦନକୁ ପ୍ରତ୍ୟାଖ୍ୟାନ କରିଦେଇଛନ୍ତି। ସୁଶିଲ ହେଉଛନ୍ତି ଏହି ହତ୍ୟା ଘଟଣାର ମୁଖ୍ୟ ଅଭିଯୁକ୍ତ। ଅନ୍ୟ କେତେଜଣ ଅଭିଯୁକ୍ତ ଏପର୍ଯ୍ୟନ୍ତ ଗିରଫ ହୋଇ ନାହାନ୍ତି। ତେଣୁ ତାଙ୍କୁ ଜାମିନ ମିଳିବ ନାହିଁ ବୋଲି ବିଚାରପତି ଦର୍ଶାଇଥିଲେ। ଜାତୀୟ ରାଜଧାନୀରେ ଅବସ୍ଥିତ ଛତ୍ରସାଲଷ୍ଟାଡିୟମ ପରିସରରେ ମେ’ ୪ରେ ଘଟିଥିବା ଏକ ମାରପିଟ ଘଟଣାରେ ସାଗର ରାଣା ନାମକ ଜଣେ ରେସ୍ଲରଙ୍କର ପ୍ରାଣହାନି ଘଟିଥିବାବେଳେ ତାଙ୍କର ଦୁଇ ସାଥୀ ସୋନୁ ଓ ଅମିତ କୁମାର ଆହତ ହୋଇଛନ୍ତି। ସୁଶୀଲ କୁମାର ଓ ଅନ୍ୟ କେତେଜଣ ରେସଲର ସେମାନଙ୍କ ଉପରେ ଆକ୍ରମଣ କରିଥିବା ଅଭିଯୋଗ ହୋଇଛି। ଗିରଫଦାରି ଭୟରେ ଏହି ଅନ୍ତର୍ଜାତୀୟ ରେସଲର ଜଣକ ମେ’ ୧୭ରେ ଦିଲ୍ଲୀସ୍ଥିତ ରୋହିଣୀ କୋର୍ଟରେ ଆଗୁଆ ଜାମିନ ପାଇଁ ଆବେଦନ କରିଥିଲେ। ନିଜକୁ ନିର୍ଦ୍ଦୋଷ ବୋଲି ଦର୍ଶାଇବା ସହ ତଦନ୍ତ କାର୍ଯ୍ୟରେ ସହାୟତା କରିବା ଲାଗି ସେ ପ୍ରସ୍ତୁତ ଥିବା ଏଥିରେ ଉଲ୍ଲେଖ କରିଥିଲେ। ଘଟଣାସ୍ଥଳରେ ହୋଇଥିବା ଗୁଳିକାଣ୍ଡ ସହ ସେ ସମ୍ପୃକ୍ତ ନୁହନ୍ତି କିମ୍ବା ଜବତ ଆଗ୍ନେୟାସ୍ତ୍ର ଓ ଗାଡ଼ି ତାଙ୍କର ନୁହେଁ ବୋଲି ମଧ୍ୟ କହିଥିଲେ। ତେବେ ପୋଲିସ ପକ୍ଷରୁ ପ୍ରତିନିଧିତ୍ୱ କରୁଥିବା ପବ୍ଲିକ ପ୍ରସିକ୍ୟୁଟର ଅତୁଲ ଶ୍ରୀବାସ୍ତବ କୋର୍ଟରେ କହିଥିଲେ ସୁଶୀଲ ଏକ ବାଡ଼ିରେ ରେସ୍ଲରଙ୍କୁ ପ୍ରହାର କରୁଥିବା ଦୃଶ୍ୟର ପ୍ରାମାଣିକ ଭିଡିଓ ଫୁଟେଜ ରହିଛି। ଏହାଛଡ଼ା ସୁଶୀଲ କାଳେ ଦେଶ ଛାଡ଼ି ପଳାୟନ କରିବେ ସେଥିଲାଗି ତାଙ୍କ ପାସ୍ପୋର୍ଟକୁ ଜବତ କରିବା ସହ ସମ୍ପୃକ୍ତ ଅଧିକାରୀମାନଙ୍କୁ ଏ ବିଷୟରେ ସତର୍କ କରାଇଦିଆଯାଇଥିବା କହିଥିଲେ। ଅଭିଯୁକ୍ତଙ୍କ ତରଫରୁ ପ୍ରତିନିଧିତ୍ୱ କରୁଥିବା ସିନିୟର ଆଡ୍ଭୋକେଟ ସିଦ୍ଧାର୍ଥ ଲୁଥ୍ରା କୋର୍ଟରେ କହିଥିଲେ ଗଣ୍ଡଗୋଳ ଦିନ କାଲା ଜାଠେରିଆ ଗ୍ୟାଙ୍ଗ୍ର ସୋନୁ ନାମକ ଜଣେ ଅପରାଧୀ ଉପସ୍ଥିତ ଥିଲେ, ଯାହାଙ୍କ ନାମରେ ବିଭିନ୍ନ ଥାନାରେ ଅନେକ ମାମଲା ରହିଛି। ସୂଚନାଯୋଗ୍ୟ, ରାଣାଙ୍କ ମୃତ୍ୟୁ ପରଠାରୁ ସୁଶୀଲ ଫେରାର ହୋଇଯାଇଛନ୍ତି। ତାଙ୍କୁ ଧରିବା ଲାଗି ପୋଲିସ ପକ୍ଷରୁ ଦିଲ୍ଲୀ-ଏନ୍ସିଆର୍ ଅଞ୍ଚଳ ଏବଂ ପଡୋଶୀ ରାଜ୍ୟଗୁଡ଼ିକରେ ବ୍ୟାପକ ଚଢ଼ାଉ କରାଯାଇଥିଲା। ଦିଲ୍ଲୀ ପୋଲିସ ପକ୍ଷରୁ ତାଙ୍କ ବିରୋଧରେ ଭାରତୀୟ ପିଙ୍ଗଳ କୋଡ୍୍ର ବିଭିନ୍ନ ଧାରା ଅନୁସାରେ ଏଫ୍ଆଇଆର ଦରଜ କରାଯାଇଛି।