ନୟାଗଡ଼ ଅଫିସ,୨।୨: ନୟାଗଡ଼ ବନଖଣ୍ଡରେ ଜଙ୍ଗଲ ନିଆଁ ଚିନ୍ତାର କାରଣ ହୋଇଛି । ଗତବର୍ଷ ନୟାଗଡ଼ ବନଖଣ୍ଡର ୧୮୪ ପଏଣ୍ଟର ୧୩୯ ହେକ୍ଟରରେ ନିଆଁ ଲାଗିଥିଲା । ଗଛର ପତ୍ରଝଡ଼ା ପରେ ନିଆଁ ଲାଗିବାର ସମ୍ଭାବନା ରହୁଛି । ଫେବୃୟାରୀରୁ ଆରମ୍ଭ ହୋଇଥାଏ ଜଙ୍ଗଲରେ ନିଆଁ ଲାଗିବା। ଜଙ୍ଗଲରେ ନିଆଁ ମନୁଷ୍ୟକୃତ ହୋଇଥିଲେ ହେଁ ଏହା ଉପରେ ଲଗାମ ଲାଗିପାରୁନି । ବଣ ଜଙ୍ଗଲ ଘେରା ନୟାଗଡ଼ ଜିଲାର ବିଭିନ୍ନ ଜଙ୍ଗଲରେ ନିଆଁ ଲାଗିବା ଦ୍ୱାରା ନୟାଗଡ଼ ସହର ସମେତ ଜିଲାର ବିଭିନ୍ନ ଗଁା ଧୂଆଁମୟ ହୋଇ ଯାଇଥାଏ। ଯାହାର ଭୟାବହତା ୨୦୨୧ ଫେବୃୟାରୀ ଓ ମାର୍ଚ୍ଚରେ ଦେଖିବାକୁ ମିଳିଥିଲା । ଜିଲା ସଦର ମହକୁମାରେ ସହର ସାରା ନିଆଁ ଜମି ରହିଥିଲା । ନିଆଁର ନିଆଁରେ ଆଖି ପୋଡ଼ିଥିଲା, ଏପରିକି ନିଃଶ୍ୱାସ ପ୍ରଶ୍ୱାସ ନେବା କଷ୍ଟ ହୋଇଥିଲା। ନିଆଁର ପ୍ରକୋପ କମିବା ବଦଳରେ ବଢ଼ିଥିଲା । ଫଳରେ ଆକାଶ ମେଘାଚ୍ଛନ୍ନ ଥିବାବେଳେ ପରିବେଶରେ ଧୂଆଁ କୁହୁଡିର ଭ୍ରମ ସୃଷ୍ଟି କରିଥିଲା। ସେହି ବର୍ଷ ନିଆଁରେ ପୋଡ଼ି ହୋଇ ଏକାଧିକ ବନ୍ୟଜନ୍ତୁ ପ୍ରାଣ ହରାଇଥିଲେ।
ବହୁ ଜୀବଜନ୍ତୁ ଗଁା ଓ ସହର ମୁହଁା ହୋଇ ଶିକାର ପାଲଟିଥିଲେ। ଗଛର ପତ୍ରଝଡା ସମୟରେ ଜଙ୍ଗଲରେ ନିଆଁ ଲଗାଇ ଜୀବଜନ୍ତୁଙ୍କୁ ସୁବିଧାରେ ଶିକାରୀ ଶିକାର କରିଥାଆନ୍ତି । ସେହିପର ଅଙ୍ଗାର ପାଇଁ ମଧ୍ୟ ଜଙ୍ଗଲରେ ନିଆଁ ଲାଗେ । କେତେଜଣ ଲୋକ ପୋଡୁ ଚାଷ କରି ଜଙ୍ଗଲକୁ ପଦା କରିବା ପାଇଁ ନିଆଁ ଲଗାଇଥାନ୍ତି । ଏପରି ବିଭିନ୍ନ କାରଣରୁ ଜଙ୍ଗଲ ଜଳେ। ନିଆଁ ଲଗାଇବା ଦଣ୍ଡନୀୟ ଅପରାଧ। ନିଆଁ ଲଗାଉଥିବା ବ୍ୟକ୍ତିଙ୍କୁ ଓଡ଼ିଶା ଜଙ୍ଗଲ ଆଇନ ୧୯୭୨ ଧାରା ୨୭(୧)(ଏ)୩(ବି) ଅନୁସାରେ ୩ରୁ ୭ବର୍ଷ ଜେଲ ଦଣ୍ଡ ରହିଛି । ସବୁ ସତ୍ତ୍ୱେ ଜଙ୍ଗଲରେ ନିଆଁ ଲାଗିବା ପ୍ରତି ବର୍ଷ ବଢ଼ି ଚାଲିଛି।
